ໂຄສົກກະຊວງການຕ່າງປະເທດຈີນໃຫ້ສຳພາດກ່ຽວກັບຕົວປະກັນຊາວຈີນຄົນໜຶ່ງຖືກກຸ່ມ IS ສັງຫານ

ຕາມຂ່າວສານຊິນຮວາ: ວັນທີ 19 ພະຈິກນີ້, ທ່ານຮົງເຫຼີຍ, ໂຄສົກກະຊວງການຕ່າງປະເທດຈີນໄດ້ໃຫ້ສຳພາດກ່ຽວກັບກຸ່ມ IS ສັງຫານຕົວປະກັນຊາວຈີນ, ໂດຍກ່າວວ່າ, ພົນລະເມືອງຈີນຜູ້ໜຶ່ງໄດ້ຖືກກຸ່ມຫົວຮຸນແຮງ IS ລັກພາຕົວ ແລະສັງຫານຢ່າງທາລຸນ. ພວກເຮົາຂໍສະແດງຄວາມໄວ້ອາໄລຕໍ່ຜູ້ປະສົບເຄາະຮ້າຍ, ແລະສະແດງຄວາມເຫັນໃຈດ້ວຍຄວາມຈິງໃຈຕໍ່ຄອບຄົວຂອງຜູ້ປະສົບເຄາະຮ້າຍ.

ທ່ານຮົງເຫຼີຍກ່າວຕື່ມວ່າ, ອົງການກໍ່ການຮ້າຍບໍ່ເອົາຫົວຊານຳຈັນຍາທຳ, ແຕະຕ້ອງເຖິງຂີດຈຳກັດດ້ານຄຸນສົມບັດຂອງມວນມະນຸດ, ແລະນຳໃຊ້ຄວາມຮຸນແຮງທີ່ໄຮ້ມະນຸດສະທຳ. ລັດຖະບານຈີນກ່າວປະນາມຢ່າງຮຸນແຮງຕໍ່ການກະທຳອັນທາລຸນທີ່ໄຮ້ສັນຊາດຕະຍານດັ່ງກ່າວ, ແລະຍ່ອມຈະລົງໂທດພວກຕ້ອງໂທດຕາມກົດໝາຍຢ່າງແນ່ນອນ.

ທ່ານຮົງເຫຼີຍກ່າວອີກວ່າ, ລັດທິກໍ່ການຮ້າຍແມ່ນສັດຕູຮ່ວມຂອງມວນມະນຸດ, ລັດຖະບານຈີນເດັດດ່ຽວຄັດຄ້ານລັດທິກໍ່ການຮ້າຍທຸກຮູບທຸກແບບ, ແລະຈະປາບປາມການກະທຳຜິດແບບກໍ່ການຮ້າຍດ້ວຍຄວາມຮຸນແຮງທຸກໆຢ່າງທີ່ທ້າທາຍຕໍ່ຂີດຈຳກັດຂອງອາລະຍະທຳມວນມະນຸດ. ຝ່າຍຈີນຈະສືບຕໍ່ເພີ່ມທະວີການຮ່ວມມືກັບປະຊາຄົມໂລກໃນການຕ້ານການກໍ່ການຮ້າຍ ເພື່ອປົກປັກຮັກສາສັນຕິພາບແລະຄວາມສະຫງົບຂອງໂລກ.