ໂຄງການລົດໄຟລາວ-ຈີນ ທົບທວນຄ່າທົດແທນປະຊາຊົນ

ໂຄງການລົດໄຟລາວ-ຈີນ ທົບທວນຄ່າທົດແທນປະຊາຊົນ

ກອງປະຊຸມທົບທວນຄືນກ່ຽວກັບການທົດແທນຄືນຄ່າເສຍຫາຍໃຫ້ແກ່ ປະຊົນທີ່ໄດ້ຮັບຜົນກະທົບຈາກໂຄງການກໍ່ສ້າງເສັ້ນທາງລົດໄຟລາວ-ຈີນ ຊ່ວງແຂວງອຸດົມໄຊຈັດຂຶ້ນໃນທ້າຍອາທິດທີ່ຜ່ານມາທີ່ຫ້ອງປະຊຸມພະແນກ ຍທຂ ຂອງແຂວງໂດຍເປັນປະທານຂອງທ່ານ ຄຳພຽງ ຢາຈົງວາ ຮອງເຈົ້າແຂວງອຸດົມໄຊ, ມີບັນດາຄະນະປະຈຳພັກແຂວງ, ກຳມະການພັກແຂວງ, ເລຂາພັກເມືອງ, ເຈົ້າເມືອງ ແລະພະແນກການກ່ຽວຂ້ອງເຂົ້າຮ່ວມ.

ການດໍາເນີນກອງປະຊຸມໃນຄັ້ງນີ້ ແມ່ນເພື່ອທົບທວນຄືນກ່ຽວກັບລາຄາ, ຫົວໜ່ວຍທີ່ເໝາະ ສົມໃຫ້ແກ່ປະຊາຊົນທີ່ໄດ້ຮັບຜົນກະທົບຈາກໂຄງການກໍ່ສ້າງເສັ້ນທາງລົດໄຟລາວ-ຈີນລະຫວ່າງ ຊ່ວງແຂວງອຸດົມໄຊພາຍຫຼັງທີ່ຄະນະ ຮັບຜິດຊອບໄກ່ເກ່ຍໄດ້ລົງເຄື່ອນໄຫວ ເກັບກຳຂໍ້ມູນຜູ້ທີ່ໄດ້ຮັບຜົນກະທົບຕົວຈິງເປັນຕົ້ນແມ່ນເນື້ອທີ່ດິນນາອາຄານບ້ານເຮືອນ ແລະຕົ້ນໄມ້ຕ່າງໆລວມທັງກຳນົດອັດຕາຄ່າເສຍຫາຍເປັນຕົວເລກແລ້ວ ໃນການດຳເນີນກອງປະຊຸມຄັ້ງທີ່ຜ່ານມາ ຊຶ່ງການທົບທວນ ແລະກໍານົດຄ່າທົດແທນໃນຄັ້ງນີ້ແມ່ນອີງໃສ່ລະບຽບຫຼັກການບັນດາແຂວງທີ່ຖືກເສັ້ນທາງດັ່ງກ່າວເປັນຕົ້ນແມ່ນນະຄອນຫຼວງ, ຫຼວງນ້ຳທາ ແລະແຂວງຫຼວງພະບາງທັງໝົດນີ້ກໍເພື່ອເຮັດໃຫ້ເໝາະສົມ ແລະຍຸຕິທຳລະຫວ່າງພາກ ລັດກັບປະຊາຊົນ ແຕ່ຢ່າງໃດກໍຕາມການທົດແທນຄ່າເສຍຫາຍຄືນໃຫ້ແກ່ປະຊາຊົນແມ່ນຕ້ອງເຮັດໃຫ້ເສດຖະກິດຂອງຄອບຄົວຂອງເຂົາເຈົ້າເຫຼົ່ານັ້ນດີຂຶ້ນກວ່າເກົ່າ.

ສະເພາະຜູ້ທີ່ໄດ້ຮັບຜົນກະທົບຈາກ ເສັ້ນທາງລົດໄຟ ລາວ-ຈີນ ຢູ່ທົ່ວແຂວງອຸດົມໄຊ ແມ່ນມີທັງໝົດ 3 ເມືອງ ຄື ເມືອງໄຊ, ເມືອງງາ ແລະເມືອງນາໝໍ້ ລວມມີ 41 ບ້ານເມືອງໄຊ 16 ບ້ານ 396 ຄອບຄົວ, ເມືອງງາ 13 ບ້ານ, 296 ຄອບຄົວ ແລະເມືອງນາໝໍ້ 12 ບ້ານ, 261 ຄອບຄົວ ລວມທັງໝົດ 953 ຄອບຄົວ ໃນນັ້ນ ມີດິນທີ່ຖືກຜົນກະທົບ ຈຳ ນວນ 609, 32 ເຮັກຕາ ສິ່ງປຸກສ້າງ 417 ຫຼັງ ລວມທັງຕົ້ນໄມ້ອຸດສາຫະກຳ ແລະຕົ້ນໄມ້ໃຫ້ໝາກຈຳນວນ 2 ແສນ 3 ໝື່ນກວ່າຕົ້ນ.

ມາຮອດປະຈຸບັນນີ້ ການຄິດໄລ່ອັດຕາຄ່າທົດແທນໃຫ້ແກ່ປະຊາຊົນແມ່ນຢູ່ໃນລະຫວ່າງການຕົກລົງເຫັນດີເປັນເອກະພາບກັນຂອງຄະນະກຳມະການ ຊີ້ນຳໂຄງການກໍ່ສ້າງທາງລົດໄຟຂັ້ນແຂວງ ເນື່ອງຈາກການລົງເກັບກຳຂໍ້ມູນ ຂອງຄະນະຮັບຜິດຊອບຍັງບໍ່ທັນລະອຽດຈະແຈ້ງລວມທັງປະຊາຊົນບາງຄອບຄົວຮຽກຮ້ອງເອົາຄ່າຕອບແທນຕາມຄວາມພໍໃຈຂອງຕົນເອງ ເພື່ອຊອກຫາແນວ ທາງໃນການແກ້ໄຂບັນຫາໃນຄັ້ງນີ້ໃຫ້ສຳເລັດໄປໄດ້ດ້ວຍດີນັ້ນບັນດາຜູ້ເຂົ້າຮ່ວມໄດ້ສະເໜີ ແລະມີຄຳເຫັນແລກປ່ຽນບົດຮຽນເຊິ່ງກັນ ແລະ ກັນ.

Cr:http://www.sedthakid.la