ໂຄງການກໍ່ສ້າງ ຕານມີໄຊ ຫາ ໜອງບຶກ ຄວາມຄືບໜ້າ 20%

ທ່ານ ທ່ານ ຫຸມພັນ ດວງພະເດດ ຫົວໜ້າໂຄງການກໍ່ສ້າງເສັ້ນທາງ ແຕ່ 4 ແຍກໄຟແດງຕານມີໄຊ ຫາ ສາມແຍກໜອງບຶກກ່າວວ່າ: ໂຄງການກໍ່ສ້າງສ້ອມແປງເສັ້ນທາງ ແຕ່ 4 ແຍກໄຟແດງຕານມີໄຊ ຫາ ສາມແຍກໜອງບຶກ ເປັນໂຄງການບູລິມະສິດໜຶ່ງ ຂອງນະຄອນຫຼວງວຽງຈັນ ເນື່ອງຈາກວ່າ ເປັນເສັ້ນທາງຫຼັກໃນການຄົມມະນາຄົມຂົນສົ່ງສິນຄ້າ ລະຫວ່າງ ດ່ານຂົວມິດຕະພາບຜ່ານເສັ້ນ ທາງ 450 ປີອອກສູ່ເສັ້ນທາງເລກທີ 13 ເໜືອ ແລະ ລົດທີ່ຈະແລ່ນຈາກເສັ້ນທາງເລກທີ 13 ເໜືອ ຫາ ເລກທີ 13 ໃຕ້ ຫຼື ອອກສູ່ຂົວມິດຕະພາບລາວ-ໄທ 1.

ໂຄງການກໍ່ສ້າງເສັ້ນທາງນີ້ໄດ້ເລີ່ມລົງມືປະຕິບັດມາແຕ່ ເດືອນຕຸລາ 2016 ໄລຍະການກໍ່ສ້າງ 24 ເດືອນ ( ເດືອນຕຸລາ 2018 ສຳເລັດ), ມູນຄ່າການກໍ່ສ້າງທັງໝົດ 45 ລ້ານໂດລາ, ໄລຍະທາງ 9.3 ກິໂລແມັດ, ໂດຍແມ່ນກຸ່ມ ບໍລິສັດຕັ້ງຈະເລີນ ເປັນຜູ້ຮັບເໝົາກໍ່ສ້າງ ແລະ ລົງທຶນກ່ອນ 100%.

ທ່ານກ່າວຕື່ມວ່າ: ເສັ້ນທາງແມ່ນຈະສ້າງເປັນທາງເບຕົງເສີມເຫຼັກ, ມີ 6 ເລນ, ປັດຈຸບັນໂຄງການ ມີຄວາມຄືບໜ້າປະມານ 20%, ໜ້າວຽກທີ່ບັນລຸແມ່ນວຽກອະນາໄມ, ລົງທໍ່ຮ່ອງລະບາຍນ້ຳ 10 ພັນກວ່າແມັດ, ວາງທໍ່ຂ້າມທາງໃກ້ສຳເລັດ ແຕ່ປັດຈຸບັນກໍ່ເປັນລະດູຝົນໂຄງການຈຶ່ງບໍ່ສາມາດເຮັດວຽກດິນ ສະນັ້ນ, ພວກເຮົາຈຶ່ງສຸມໃສ່ວຽກວາງທໍ່ ແລະ ໃນໄລຍະຝົນລົດທຽວຫຼາຍ, ທາງເປ່ເພ.

ຂໍ້ມູນຈາກ: ຂ່າວເສດຖະກິດ-ການຄ້າ Lao Economic Daily