ແຮຣີ້ ເຄນ! ສ້າງປະຫວັດສາດເປັນນັກເຕະຄົນທຳອິດຂອງອັງກິດ ຍິງ 6 ປະຕູຈາກ 3 ນັດໃນບານໂລກ!!

ນຳທິມດວນຈຸດໂທດຜ່ານ ໂຄໂລມເບຍ ວຸດວິດ!!! ກຽມປະທະກັບ ສະວີເດັນ ຮອບ 8 ທິມ! ບານໂລກ 2018

+ ວານນີ້ການແຂ່ງຂັນຮອບ 16 ທິມ 2 ຄູ່ສຸດທ້າຍ, ອັງກິດ ປະທະກັບ ໂຄໂລມເບຍ (ໂຄໂລມບີ) ທີ່ສະຫນາມສະປາຕັກ ໃນນະຄອນຫລວງມົດສະກູ ມີແຟນບານເຂົ້າຊົມເຕັມຄວາມຈຸຂອງສະໜາມ 44,000 ກວ່າຄົນ.

+ ຄູ່ນີ້ ເຄິ່ງເວລາທີ 1 ບໍ່ມີປຕູເກີດຂຶ້ນ, ມາເຄິ່ງຫລັງທິມຊາດອັງກິດ ມາໄດ້ຈຸດໂທດຈາກຈັງຫວະເຕະແຈ ແຮຣີ້ ເຄນ ຫົວຫນ້າທິມຂອງອັງກິດຖືກ ຄາຣລັອສ ຊານເຊັສ ກອງກາງຂອງໂຄໂລມບີ ດັນລົ້ມໃນເຂດໂທດ ແລະ ເປັນ ແຮຣີ້ ເຄນ ລຸກມາສັງຫານໃຫ້ອັງກິດຂຶ້ນນຳ 1-0 ນາທີ 57'. ເວລາທີ່ເຫລືອ ທັງສອງທິມເດີນເກມບຸກຕອບໂຕ້ກັນໄດ້ດີ ແຕ່ມີໂອກາດຍິງຊື່ປະຕູບໍ່ຫລາຍ, ທ້າຍເກມ ໂຄໂລມບີ ໄດ້ເຕະແຈ ເຢີຣີ້ ມີນ້າ ກອງຫລັງ ບາຣເຊໂລນ້າ ແຜງລິດອີກຄັ້ງ ຂຶ້ນເອົາຫົວສັບບານເປັນປະຕູຕີສະເໝີ ນາທີ 90+3 ເປັນປະຕູທີ 3 ຂອງ ມີນ້າ ຍິງດ້ວຍຫົວໃນບານໂລກຄັ້ງນີ້ ຈົບເກມ 90' ນາທີ ສະເໝີກັນ 1-1 ຕໍ່ເວລາພິເສດອີກ 30' ນາທີ ຍັງສະເໝີກັນ 1-1 ຕ້ອງດວນຈຸດໂທດຕັດສິນ 5 ຄົນຂອງໂຄໂລມບີ ຍິງບໍ່ເຂົ້າ 2 ຄົນຄື: ມາຕີອຸສ ອູຣີເບ້ ແລະ ຄາຣລັອສ ບັກກ້າ, ສ່ວນ 5 ຄົນຂອງອັງກິດຍິງບໍ່ເຂົ້າ 1 ຄົນຄື: ຈໍແດນ ເຮັນເດີສັນ ອັງກິດ ຊະນະດວນຈຸດໂທດ ໂຄໂລມບີ 4-3 ເຂົ້າຮອບ 8 ທິມອີກຄັ້ງໃນຮອບ 12 ປີ ຕໍ່ຈາກປີ 2006 ທີ່ເຢຍລະມັນ.

- ຂະນະທີ່ ໂຄໂລມບີ ຕົກຮອບນັອກເອົ້າບານໂລກເປັນຄັ້ງທີ 3 ຈາກການເຂົ້າຮ່ວມ 6 ຄັ້ງ (ປີ 1990 ຕົກຮອບ 16 ທິມ, ປີ 2014 ຕົກຮອບ 8 ທິມ ແລະ ປີນີ້ຕົກຮອບ 16 ທິມ).

- ອັງກິດ ຊະນະດວນຈຸດໂທດໃນບານໂລກຮອບສຸດທ້າຍຄັ້ງທຳອິດ, ຜ່ານມາ 3 ຄັ້ງ ເສຍຫມົດ.

- ອັງກິດ ເສຍປະຕູໃນໄລຍະຕໍ່ເວລາບາດເຈັບຫລັງ 90' ນາທີ ເປັນຄັ້ງທຳອິດໃນບານໂລກ.

- ແຮຣີ້ ເຄນ ກາຍເປັນນັກເຕະອັງກິດຄົນທຳອິດ ລົງຫລິ້ນ 3 ນັດໃນບານໂລກຮອບສຸດທ້າຍ ຍິງໄດ້ 6 ປະຕູ ເປັນດາວຍິງສູງສຸດໃນບານໂລກຄັ້ງນີ້ ນຳ ໂຣເມຣູ ລູກາກູ ຈາກແບນຊິກ 2 ປະຕູ.

- ບານໂລກຄັ້ງນີ້ ແຮຣີ້ ເຄນ ມີໂອກາດຍິງຊື່ປະຕູ 6 ຄັ້ງ, ເປັນປະຕູທັງ 6 ຄັ້ງ ແລະ ເປັນປະຕູທີ 14 ຈາກ 10 ນັດທີ່ລົງຫລິ້ນໃຫ້ທິມຊາດອັງກິດ, ໄດ້ຮັບລາງວັນນັກເຕະດີເດັ່ນໃນນັດນີ້.

+ ຮອບ 8 ທິມສຸດທ້າຍ ອັງກິດ ໄປພົບກັບ ສະວີເດັນ (ຊູແອັດ) ທີ່ຊະນະ ສະວິດເຊີແລນ 1-0 ຈາກປະຕູໄຊຂອງ ເອມິວ ຟັອສເບີກ ນາທີ 66' ເປັນປະຕູທຳອິດຂອງ ຟັອສເບີກ ໃນບານໂລກຮອຍສຸດທ້າຍ, ທ້າຍເກມ ໄມເຄິນລາງ ກອງຫລັງສະວິດເຊີແລນ ໄດ້ໃບແດງຈາກຈັງຫວະສະກັດ ມາຕິນ ໂອສັນ ໃນຫນ້າເຂດໂທດ, ຈົບເກມ ຊູແອັດ ຊະນະ ສະວິດເຊີແລນ 1-0 ເຂົ້າຮອບ 8 ທິມ ອີກຄັ້ງໃນຮອບ 24 ປີ ຫລ້າສຸດ ປີ 1994 ທີ່ສະຫະລັດອາເມຣິກາ ຄັ້ງນັ້ນໄດ້ທີ 3.

- ຂະນະທີ່ ສະວິດເຊີແລນ ຕົກຮອບ 16 ທິມ ເປັນຄັ້ງທີ 4 ຈາກ 5 ຄັ້ງຫລັງສຸດ ແລະ ເສຍນັດທຳອິດຈາກ 9 ນັດຫລັງສຸດ.

ຮອບ 8 ທິມສຸດທ້າຍໄດ້ຄົບ 4 ຄູ່:

- ອູຣູໄກວ ພົບ ຝຣັ່ງ; ເບຣຊິນ ພົບ ເບວຢ້ຽມ (ແບນຊິກ) ຈະແຂ່ງຂັນໃນວັນທີ 6 ກໍລະກົດນີ້

- ສະວີເດັນ ພົບ ອັງກິດ; ຣັດເຊຍເຈົ້າພາບ ພົບ ໂຄຣອາຊີ ຈະແຂ່ງຂັນໃນວັນທີ 7 ກໍລະກົດນີ້.

Info: FIFA World Cup
Photo: FIFA World Cup