ແມ່ນ້ຳ ສາຍທີສອງ ລົ້ນຝັ່ງຂຶ້ນຖ້ວມ ໃນພາກເໜືອ ຍີ່ປຸ່ນ

ແມ່ນ້ຳສາຍທີ 2 ໃນເຂດພາກເໜືອຂອງຍີ່ປຸ່ນ ທີ່ຖືກລົມພາຍຸໄຕ້ຝຸ່ນພັດເຂົ້າຖະຫຼົ່ມ ໄດ້ລົ້ນຝັ່ງຂຶ້ນຖ້ວມ ເຮັດໃຫ້ປະຊາຊົນ ຈຳນວນຫຼາຍໆສິບຄົນຕົກຄ້າງ ແລະເພີ້ມຄວາມກົດດັນຫຼາຍຂຶ້ນຕໍ່ເຈົ້າໜ້າທີ່ກູ້ໄພ ທີ່ຮັບມືກັບໄພນ້ຳຖ້ວມ ຮ້າຍແຮງສຸດ ຢູ່ໃນຂົງເຂດ ໃນຮອບຫຼາຍໆທົດສະວັດ.

ແມ່ນ້ຳ Shibui ໄດ້ລົ້ນຝັ່ງຂຶ້ນຖ້ວມ ທົ່ງນາ ແລະ ເຮືອນຊານຂອງປະຊາຊົນ ໃນຕອນເຊົ້າຂອງວັນສຸກມື້ນີ້ຢູ່ໃນເຂດເມືອງOsaki ທີ່ສອກຫລີກ ປະມານ 350 ຫຼັກກິໂລແມັດຫ່າງຈາກ ນະຄອນຫຼວງໂຕກຽວໄປທາງທິດເໜືອ. ເຈົ້າໜ້າທີ່ເວົ້າວ່າ ມີຢ່າງໜ້ອຍ 40 ຄົນໄດ້ຕົກຄ້າງຢູ່ທີ່ນັ້ນ.

ພວກກູ້ໄພໄດ້ຮີບຮ້ອນພາກັນໄປຊ່ອຍເຫຼືອປະຊາຊົນຫຼາຍຮ້ອຍຄົນທີ່ຕົກຄ້າງຢູ່ໃນເມືອງJoso ຊຶ່ງຕັ້ງຢູ່ໃນພາກເໜືອ ຂອງຍີ່ປຸ່ນຄືກັນ ບ່ອນທີ່ແມ່ນ້ຳ Kinugawa ລົ້ນຝັ່ງຂຶ້ນຖ້ວມ ໃນມື້ວານນີ້ ເຮັດໃຫ້ປະຊາຊົນຕ້ອງໄດ້ປີນຂຶ້ນໄປຢູ່ຕາມລະບຽບ ແລະຫຼັງຄາເຮືອນ ເພື່ອ ຊອກສະແຫວງຫາການຊ່ອຍເຫລືອ.

ເຮືອບິນເຮຣີຄອບເຕີ້ແລະເຮືອທະຫານໄດ້ຊ່ອຍປະຊາຊົນຫຼາຍສິບຄົນໃນຄືນແລ້ວນີ້ຈາກ ຫລັງຄາເຮືອນໃນເມືອງ Joso. ເຈົ້າໜ້າທີ່ເວົ້າວ່າ ມີຢ່າງໜ້ອຍ 25 ຄົນຍັງຫາຍສາບສູນ.ຍີ່ປຸ່ນໄດ້ປະເຊີນກັບຝົນຕົກໜັກໃນອາທິດນີ້ຈາກລົມໄຕ້ຝຸ່ນ Etau ຊຶ່ງຢູ່ໃນບາງເຂດມີຝົນ ຕົກໜັກຫລາຍກວ່າ 60 ຊັງຕີແມັດ.

ມາຮອດປັດຈຸບັນ ເຈົ້າໜ້າທີ່ກ່າວວ່າ ມີຜູ້ເສຍຊີວິດແລ້ວຍ້ອນນ້ຳຖ້ວມ 3 ຄົນຮວມທັງແມ່
ຍິງຄົນນຶ່ງ ອາຍຸ 63 ປີ ທີ່ໄດ້ຖືກດິນເຈື່ອນຊຸເອົາໄປ ທີ່ເມືອງ Kanuma ທີ່ຕັ້ງຢູ່ທາງເໜືອ ຂອງເມືອງ Joso.ມີປະຊາຊົນຫຼາຍກວ່ານຶ່ງແສນຄົນ ໃນພາກຕາເວັນອອກສຽງເໜືອຂອງຍີ່ປຸ່ນຖືກສັ່ງໃຫ້ຍົກ ຍ້າຍໜີຈາກບ້ານເຮືອນຂອງພວກເຂົາເຈົ້າ ຍ້ອນລົມພາຍຸດັ່ງກ່າວ.

ທີ່ມາ http://lao.voanews.com/