ແຟນຫົງຕ້ອງຍິ້ມເພາະເຈີຫຼາດບອກວ່າອີກບໍ່ດົນຈະກັບບ້ານ

 

ແຟນບານ “ເດິ ຄັອບ” ທີ່ຢາກເຫັນ ສະຕີເວັນ ເຈີຫຼາດ ກັບມາຮ່ວມງານກັບ ລີເວີພູ ສໍ່ແວວວ່າຈະສົມຫວັງຫຼັງຈາກທີ່ອະດີດກອງກາງກັບຕັນທີມເປີດເຜີຍວ່າມີແຜນຈະກັບມາຢູ່ກັບທີມໃນອີກບໍ່ດົນນີ້ ເຫດຜົນຍ້ອນວ່າຄິດຮອດໝູ່ ແລະ ຄອບຄົວໃນບ້ານເກີດ.

 

ສະຕີເວັນ ເຈີຫຼາດ ຕຳນານກອງກາງຂອງ ລີເວີພູ ຍັກໃຫຍ່ຈາກ ພຣີເມຍລີກ ອອກມາຍອມຮັບເມື່ອວັນຈັນທີ່ຜ່ານມາຄິດຮອດໝູ່ ແລະ ຄອບຄົວໃນແດນຜູ້ດີ ພ້ອມກັບເປີດເຜີຍວ່າຈະມີການກັບຄືນສູ່ຖິ່ນ ແອນຟິວ ໃນໄວໆນີ້.

 

ອະດີດກັບຕັນທີມຊາດອັງກິດທີ່ຍ້າຍໄປຫຼິ້ນໃຫ້ກັບ ແອວເອ ກາແລັກຊີ ໃນ ເມເຈີລີກ ຊັອກເກີ ອະເມລິກາ ຫຼັງຈາກທີ່ໝົດສັນຍາກັບ “ຫົງແດງ” ເມື່ອປີ 2015 ກ່າວວ່າ “ຂ້ອຍຈະກັບມາບ້ານໃນອີກບໍ່ດົນ ຂ້ອຍບໍ່ຕ້ອງການເລີ່ມຕົ້ນຂ່າວລືໃດໆ ຂ້ອຍມີຄວາມສຸກແລ້ວກັບບ່ອນທີ່ຂ້ອຍຢູ່ເວລານີ້ ແຕ່ຂ້ອຍແນ່ໃຈວ່າອີກບໍ່ດົນຂ້ອຍຈະກັບໄປຮ່ວມງານກັບ ລີເວີພູ ອີກ”.

 

“ຂ້ອຍຄິດຮອດບ້ານ ແລະ ຄອບຄົວ ຄິດຮອດສະພາບອາກາດໜາວອີກ ຂ້ອຍຄິດຮອດການເຂົ້າໄປເບິ່ງເກມ ຂ້ອຍໃຊ້ເວລາ 35 ປີໃນທີມ ລີເວີພູ ມັນເປັນບ້ານຂອງຂ້ອຍ ແລະ ມັນຈະເປັນແບບນັ້ໜຕະຫຼອດໄປ ທີ່ນີ້ເປັນບ້ານຫຼັງທີສອງຂອງຂ້ອຍໃນເວລາສັ້ນໆ ໃນໄວໆນີ້ອີກບໍ່ດົນຂ້ອຍຈະກັບຄືນສູ່ສະໜາມບ່ອນທີ່ຂ້ອຍຢູ່ແລ້ວຜ່ອນຄາຍຮ່ວມກັບຄົນທີ່ຂ້ອຍຮັກ ແລະ ມັນແມ່ນ ລີເວີພູ” ເຈີຫຼາດ ກ່າວ.

 

ຢ່າງໃດກໍຕາມ ເຈີຫຼາດ ຍອມຮັບວ່າ ເວລານີ້ມີຄວາມສຸກຢ່າງຍິ່ງກັບການໃຊ້ຊີວິດໃນ ລອສ ແອັງເຈີລິສ ໂດຍລະບຸວ່າ “ເຫັນໄດ້ວ່າເມືອງນີ້ເປັນເມືອງທີ່ວິເສດຢ່າງຍິ່ງສຳລັບຂ້ອຍ ແລະ ຄອບຄົວຂອງຂ້ອຍ ທັງສະພາບອາກາດ ແລະ ມີຫຍັງຫຼາຍຢ່າງໃຫ້ເຮັດ ຂ້ອຍບໍ່ຕົກເປັນເປົ້າສົນໃຈຫຼາຍເຊິ່ງມັນເປັນຄືກັບຂອງແຖມ ແຕ່ທ້າຍທີ່ສຸດເຮົາກໍຈະຍ້າຍໄປຕັ້ງຮາກຖານຢູ່ທີ່ ລີເວີພູ”.