ແຟນມ້າລາຍເຮ!!! ປານິດຈໍ່ຮ່ວມທັບແລ້ວ

 

ມິຣາເລມ ປານິດ ມິດຟິວດາວດັງຂອງ ໂຣມາ ໃກ້ແລ້ວທີ່ຈະຍ້າຍໄປຢູ່ກັບ ຢູເວັນຕຸດ ຫຼັງຈາກທີ່ຕົວແທນຂອງນັກເຕະຢືນຢັນດ້ວຍຕົນເອງ ຄາດວ່າຈະໄດ້ຮັບບົດສະຫຼຸບໃນໄວໆນີ້.

 

ອາດິສ ຢູນູໂຊວິດ ຕົວແທນຂອງ ມິຣາເລມ ປານິດ ກອງກາງໂຕເກັ່ງຂອງ ໂຣມາ ສະໂມສອນດັງຂອງ ກັນໂຊ ຊີຣີ ອາ ເປີດເຜີຍວ່ານັກເຕະຄວາມດູແລຂອງຕົນກຳລັງຈະຍ້າຍໄປຮ່ວມທີມ ຢູເວັນຕຸດ ສະໂມສອນຄູ່ແຂ່ງຮ່ວມລີກດ້ວຍຄ່າຫົວ 38 ລ້ານເອີໂຣ.

ດາວເຕະທີມຊາດບອສເນຍຕົກເປັນຂ່າວພັນກັບເລື່ອງການຍ້າຍທີມຢ່າງຕໍ່ເນື່ອງເຊິ່ງກໍມີຫຼາຍສະໂມສອນທີ່ໃຫ້ຄວາມສົນໃຈທັງ ເປເອັດເຊ, ບາເຊໂລນາ, ເຊວຊີ ແຕ່ຫຼ້າສຸດ “ມ້າລາຍ” ເປັນທີມທີ່ກຳລັງຈະໄດ້ນັກເຕະໄປຮ່ວມທັບ ຫຼັງຈາກທີ່ຍອມຈ່າຍຄ່າຈີກສັນຍາຂອງນັກເຕະທີ່ລະບຸເອົາໄວ້.

 

“ຢູເວັນຕຸດ ໄດ້ຕົກລົງຈ່າຍເງິນ 38 ລ້ານເອີໂຣຕາມຄ່າຈີກສັນຍາ ແລະ ເຮົາກໍຄາດຫວັງທີ່ຈະໄດ້ບົດສະຫຼຸບເລື່ອງການຍ້າຍທີມໃນໄວໆນີ້ ມີຫຼາຍສະໂມສອນທີ່ໃຫ້ຄວາມສົນໃຈເຂົາທັງ ເປເອັດເຊ, ບາຊາ, ເຊວຊີ ແຕ່ວ່າ ມ້າລາຍ ເປັນທີມທີ່ລົງມືໄວທີ່ສຸດ ແລະ ເບິ່ງຄືຈິງຈັງຫຼາຍທີ່ສຸດ” ຢູນູໂຊວິດ ກ່າວ.