ແຟນປືນໂລ່ງໃຈ!!ເບເຢຣິນອາການດີຂຶ້ນຫຼັງຖືກນັອກ

 

ເອັກຕໍ ເບເຢຣິນ ດາວເຕະຂອງ ອາເຊນອນ ເຜີຍຂ່າວດີວ່າຕອນນີ້ອາການບາດເຈັບຈາກກໍລະນີທີ່ປະທະກັບ ມາກອສ ອາລອນໂຊ ເກມລອນດອນດາບີແມັດເມື່ອວັນເສົາຄ່ອຍໆດີຂຶ້ນຢ່າງຕໍ່ເນື່ອງພ້ອມກັບຢືນຢັນຈະກັບມາຊ່ວຍທີມໃນໄວໆນີ້ ທາງດ້ານຂອງ ອາແຊນ ເວນເກີ ນາຍໃຫຍ່ຍັງເຄືອງກັບ ມາຕິນ ແອັດກິນສັນ ກຳມະການຢູ່ທີ່ບໍ່ເປົ່າຟາວຈັງຫວະດັ່ງກ່າວ.

 

ເອັກຕໍ ເບເຢຣິນ ຟູແບັກທີມຊາດສະເປນຂອງ ອາເຊນອນ ສະໂມສອນຍັກໃຫຍ່ຂອງ ພຣີເມຍລີກ ເຜີຍຕອນນີ້ອາການບາດເຈັບຈາກກໍລະນີທີ່ປະທະ ມາກອສ ອາລອນໂຊ ດາວເຕະຂອງ ເຊວຊີ ດີຂຶ້ນເລື້ອຍໆແລ້ວ ແລະ ຈະກັບມາຊ່ວຍທັບ “ປືນໃຫຍ່” ໄດ້ໃນໄວໆນີ້.

 

ເຫດການດັ່ງກ່າວເກີດຂຶ້ນໃນນາທີ 13 ເມື່ອ ອາລອນໂຊ ຊິງຈັງຫວະຂຶ້ນໂໝ່ງໄດ້ກ່ອນ ເບເຢຣິນ ແລະ ໂໝ່ງເຂົ້າໄປຢ່າງສວຍງາມ ແຕ່ວ່າພາບຊ້າສະແດງໃຫ້ເຫັນວ່າສອກຂວາຂອງແບັກຊ້າຍ ເຊວຊີ ແກວ່ງໄປເຂົ້າທີ່ໜ້າຂອງ ເບເຢຣິນ ແຕ່ວ່າ ມາຕິນ ແອັດກິນສັນ ກຳມະການບໍ່ໄດ້ເປົ່າເປັນລູກໄໝແຕ່ຢ່າງໃດ ຂະນະທີ່ດາວເຕະເລືອດກະທິງເຊິ່ງນັອກໄປເລີຍໃນຕອນນັ້ນຖືກປ່ຽນອອກນາທີ 17.

 

ທາງດ້ານນັກເຕະໄດ້ສະແດງຄວາມເຫັນວ່າ “ຂອບໃຈສຳຫຼັບທຸກໆຂໍ້ຄວາມທີ່ສົ່ງໃຫ້ ການພັກຟື້ນຮ່າງກາຍຂ້ອຍທີ່ບ້ານມັນຄ່ອຍໆດີຂຶ້ນເລື້ອຍໆ ແລະ ຈະກັບມາລົງສະໜາມຊ່ວຍທີມໄດ້ອີກໃນໄວໆນີ້”.

 

ທາງດ້ານຂອງ ເວນເກີ ອອກມາຕຳໜີ ແອັດກິນສັນ ທີ່ບໍ່ເປົ່າຟາວຈັງຫວະດັ່ງກ່າວ “ມັນຟາວແນ່ນອນຖ້າເຈົ້າໄດ້ເຫັນຈາກຫຼາຍໆເກມເມື່ອໄວໆນີ້ ແນ່ນອນເຮົາຮູ້ສຶກເສຍໃຈກັບເລື່ອງນີ້ ຂ້ອຍຂໍຢືນຢັນວ່າມັນເປັນຈັງຫວະ 100% ມັນເປັນການຫຼິ້ນທີ່ອັນຕະລາຍໂຄດໆ”.