ແຟນກອຟແຫ້ວ..ວູດ ຂໍຖອນໂຕຈາກ ເຊຟເວ ໂອເພັນ

 

ໄທເກີ້ ວູດ ກ້ານເຫຼັກຊື່ດັງຂໍຖອນຕົວຈາກລາຍການ ເຊຟເວ ໂອເພັນ ທັງທີ່ຈະແຂ່ງຂັນກັນໃນອີກ 3 ມື້ຕໍ່ຈາກນີ້ແລ້ວໂດຍ ໂນຕາ ບີເກ ໜຶ່ງໃນສະຫາຍຂອງເຂົາລະບຸວ່າມັນເປັນຍ້ອນ ວູດ ຍັງຮູ້ສຶກວ່າຟອມການຕີຍັງບໍ່ເຂົ້າທີ່ເຂົ້າທາງປານໃດ.

 

ໄທເກີ ວູດ ໂປຣກອຟຊາຍຄົນດັງຂໍຖອນຕົວຈາກການແຂ່ງຂັນ ພີຈີເອ ທົວ ລາຍການ ເຊຟເວ ໂອເພັນ ເປັນທີ່ຮຽບຮ້ອຍ ທັງທີ່ມັນຈະເລີ່ມແຂ່ງກັນໃນວັນພະຫັດທີ 13 ຕຸລານີ້.

 

ວູດ ເຄີຍຕ້ອງພັກດົນເຖິງ 14 ເດືອນຫຼັງຈາກທີ່ໄດ້ຮັບການຜ່າຕັດບໍລິເວນແຜ່ນຫຼັງເຖິງ 3 ເທື່ອເຊິ່ງອະດີດກ້ານເຫຼັກມື 1 ຂອງໂລກຕັ້ງເປົ້າທີ່ຈະກັບມາແຂ່ງໃນລາຍການ ເຊຟເວ ໂອເພັນ ໃຫ້ໄດ້ແຕ່ສຸດທ້າຍກໍບໍ່ເປັນໄປຕາມແຜນ.

 

ທັງນີ້ ໂນຕາ ບີເກ ໝູ່ສະນິດຂອງ “ພະຍາເສືອ” ເຜີຍວ່າສາເຫດທີ່ເຂົາຂໍຖອນໂຕຈາກລາຍການນີ້ນັ້ນເປັນຍ້ອນວ່າເຂົາຮູ້ສຶກວ່າຕົນເອງຍັງໄດ້ບໍ່ດີເທົ່າໃດ “ຫຼັງຈາກທີ່ຂ້ອຍໄດ້ລົມກັບເຂົາເມື່ອຕອນເຊົ້າຂອງມື້ນີ້ ເຂົາບອກວ່າເຂົາບໍ່ຮູ້ສຶກວ່າເກມການຫຼິ້ນຂອງຕົນຢູ່ໃນຈຸດທີ່ຄວນຈະເປັນ ເຂົາຈະເລື່ອນເວລາການຄືນສະໜາມໄປເປັນອີກ 2 ເດືອນຕໍ່ຈາກນີ້ ແລະ ຫວັງວ່າຈະກັບມາແຂ່ງໄດ້ໃນອະນາຄົດ”.