ແຜ່ນດິນໄຫວໃນກົວເຕມາລາຮຸນແຮງ 6.8 ແມັກນິຈູດ

 

ເກີດແຜ່ນດິນໄຫວຮຸນແຮງນອກຊາຍຝຣັ່ງປະເທດກົວເຕມາລາ ວັດແທກໄດ້ 6.8 ແມັກນີຈູດເມື່ອວັນພະຫັດທີ 22 ມີຖຸນາ ສົ່ງຜົນໃຫ້ອາຄານບ້ານເຮືອນເສຍຫາຍ ຕົ້ນໄມ້ຫັກລົ້ມ ແລະ ໄຟຟ້າຂັດຂ້ອງໃນປະເທດເພື່ອນບ້ານຄື ເອວ ຊາວາດໍອີກນຳແຕ່ຍັງບໍ່ມີລາຍງານຜູ່ເສຍຊີວິດ ຫຼື ໄດ້ຮັບບາດເຈັບ.

ສຳນັກຂ່າວຕ່າງປະເທດລາຍງານຈາກນະຄອນກົວເຕມາລາຊີຕີປະເທດກົວເຕມາລາເມື່ອວັນທີ 22 ມິຖຸນາວ່າ ສຳນັກງານສຳຫຼວດທໍລະນີວິທະຍາສະຫະລັດແຈ້ງເຫດແຜ່ນດິນໄຫວຮຸນແຮງນອກຊາຍຝັ່ງປະເທດກົວເຕມາລາ ເມື່ອເວລາປະມານ 06:31 ນາທີຂອງວັນພະຫັດທີ 22 ມິຖຸນາຕາມເວລາທ້ອງຖິ່ນກົງກັບ 19:31 ນາທີມື້ດຽວກັນຕາມເວລາໃນປະເທດລາວ ວັດແທກໄດ້ 6.8 ແມັກນິຈູດໂດຍມີຈຸດສູນກາງຢູ່ໃນມະຫາສະໝຸດປາຊິຟິກຫ່າງ 23 ກິໂລແມັດທາງທິດຕະເວັນຕົກສຽງໃຕ້ຂອງເປີໂຕ ຊານ ໂຮເຊ ແລະ ຢູ່ເລິກ 46.8 ກິໂລແມັດ.

ແຜ່ນດິນໄຫວຮຸນແຮງໃນລະດັບຄວາມເລິກດຽວກັນນີ້ເຄີຍເກີດຂຶ້ນມາແລ້ວເມື່ອວັນ 14 ມິຖຸນາທີ່ຜ່ານມາ ວັດແທກແຮງສັ່ນສະເທືອນໄດ້ 6.9 ແມັກນິຈູດໃນປະເທດກົວເຕມາລາ ແລະ ທາງຕອນໃຕ້ຂອງແມັກຊິໂກ ມີລາຍງານຜູ່ເສຍຊີວິດ 5 ສົບ ບ້ານເຮືອນເສຍຫາຍ ແລະ ກະແສໄຟຟ້າຂັດຂ້ອງ ອິເລຍນາ ເຣຊິນອສ ໂຄສົກຍິງຂອງສຳນັກງານໜ່ວຍສຸກເສີນແຫ່ງຊາດຄອນແຣດຂອງກົວເຕມາລາເປີດເຜີຍວ່າ ຈາກການກວດສອບໃນພື້ນທີ່ 13 ແຂວງຂອງທັງໝົດ 22 ແຂວງຂອງກົວເຕມາລາ ຍັງບໍ່ພົບລາຍງານຜູ່ເສຍຊີວິດ ຫຼື ໄດ້ຮັບບາດເຈັບ ມີພຽງແຕ່ລາຍງານຄວາມເສຍຫາຍເລັກໜ້ອຍສຳລັບໂຄງສ້າງອາຄານໃນ 2 ແຂວງຄື ອັນຕິກົວ ກົວເຕມາລາ ແລະ ໂຕໂຕນິຄາປັນ.

ສ່ວນທ່ານ ເອັດວິນ ເດີ ລີອອນ ໂຄສົກໜ່ວຍດັບເພີງຂອງກົວເຕມາລາກ່າວວ່າ ແຜ່ນດິນໄຫວເຮັດໃຫ້ບ້ານເຮືອນໄດ້ຮັບຄວາມເສຍຫາຍຫຼັງຄາບ້ານແຕກກະຈາຍ ແຕ່ຍັງບໍ່ພົບຜູ່ເສຍຊີວິດ ຫຼື ບາດເຈັບ.

ຂະນະທີ່ເພື່ອນບ້ານຄືເອວ ຊໍວາດໍກໍສາມາດຮັບຮູ້ແຮງສັ່ນສະເທືອນຈາກແຜ່ນດິນໄຫວເຊັ່ນກັນ ໂດຍໂຄສົກຂອງໜ່ວຍສຸກເສີນຂອງເອວ ຊໍວາດໍ ຖະແຫຼງວ່າຍັງບໍ່ໄດ້ຮັບລາຍງານຜຸູ່ເສຍຊີວິດ ຫຼື ບາດເຈັບ ແລະ ລັດຖະບານບໍ່ໄດ້ແຈ້ງເຕືອນໄຟເລື່ອງຄື້ນຍັກສຶນາມິຈາກຜົນຂອງແຜ່ນດິນໄຫວ.

ທ່ານ ຫຼຸຍ ເຟລິບເປ ປວນເຕ ຫົວໜ້າສຳນັກງານປ້ອງກັນໄພຝ່າຍພົນລະເຮືອນຂອງແມັກຊິໂກກ່າວວ່າ ແຮງສັ່ນສະເທືອນຈາກແຜ່ນດິນໄຫວສາມາດຮັບຮູ້ໄດ້ໃນລັດເຊຍປາດເຊິ່ງມີພົມແດນຕິດກັບກົວເຕມາລາ ແຕ່ຍັງບໍ່ມີລາຍງານຄວາມເສຍຫາຍ.

ໂຄສົກສຳນັກງານບໍລິການສຸກເສີນຂອງຮອນດູຣັສຖະແຫຼງວ່າ ແຮງສັ່ນສະເທືອນຈາກແຜ່ນດິນໄຫວຮັບຮູ້ໄດ້ໃນພື້ນທີ່ທາງຕະເວັນຕົກຂອງປະເທດແຕ່ບໍ່ມີລາຍງານຄວາມເສຍຫາຍ.