ແປ້ງນົວ ເຮັດໃຫ້ອາຫານແຊບຂຶ້ນໄດ້ແນວໃດ

ດ້ວຍສະພາບສັງຄົມທີ່ຕ້ອງເຮັດວຽກແຂ່ງກັບເວລາ ເຮັດໃຫ້ຫລາຍຄົນຕ້ອງຝາກທ້ອງໄວ້ກັບພັດຕາຄານ, ຮ້ານອາຫານ, ຮ້ານເຝີ-ເຂົ້າປຽກ, ຮ້ານຂາຍຂອງກິນສຸກແຄມທາງ ຫຼື ອື່ນໆ ຊຶ່ງເຮັດໃຫ້ມີຄວາມສະດວກວ່ອງໄວ, ເລືອກກິນໄດ້ຕາມໃຈມັກທັງບໍ່ຈໍາເປັນຕ້ອງມານັ່ງລ້າງຖ້ວຍ, ບ່ວງ, ຈອງ, ຊາມອີກ ແຕ່ຄວາມສະດວກສະບາຍເຫລົ່ານັ້ນ ມັນມາພ້ອມກັບຂໍ້ເສັຍບາງຢ່າງເຊັ່ນ: ເຮົາບໍ່ມີໂອກາດຮູ້ເລີຍວ່າເຂົາເຈົ້າເອົາຫຍັງມາໃຫ້ເຮົາກິນແດ່?

ເພື່ອໃຫ້ອາຫານແຊບເຮັດໃຫ້ລູກຄ້າຕິດໃຈແນ່ນອນວ່າ ສິ່ງທີ່ຂາດບໍ່ໄດ້ແມ່ນແປ້ງນົວນັ້ນເອງຊຶ່ງອາດຈະເປັນອົງປະກອບສໍາຄັນທີ່ຂາດບໍ່ໄດ້ໃນການປຸງແຕ່ງອາຫານກໍວ່າໄດ້ ໂດຍນັກວິຊາການບາງທ່ານໄດ້ບອກໄວ້ວ່າ: ປະລິມານທີ່ເໝາະສົມສຳລັບການໃສ່ແປ້ງນົວແມ່ນ ປະມານຕິດປາຍບ່ວງເທົ່ານັ້ນ ແຕ່ເທົ່າທີ່ເຄີຍເຫັນ ແມ່ຄ້າສ່ວນໃຫຍ່ຈະຊວ້ານເອົາເທື່ອລະບ່ວງສອງບ່ວງແນ່ນອນວ່າຫາກກິນໄປເລື້ອຍໆສະສົມໄປໃນໄລຍະຍາວເປັນອັນຕະລາຍຢ່າງຫລີກບໍ່ມົ້ມ.

ແປ້ງນົວຄືສານເຄມີຊະນິດໜຶ່ງຊື່ວ່າ ໂມໂນໂຊດຽມກລູຕາເມດ (MSG) ຮູບຮ່າງພາຍນອກເປັນເມັດກ້ອນສີຂາວ ບໍ່ມີລົດ ບໍ່ມີກິ່ນ ໂມໂນໂຊດຽມກລູຕາເມດ ເປັນເກືອຂອງກົດກລູຕາມິກຊຶ່ງກົດອະມິໂນຊະນິດນີ້ກໍເປັນອົງປະກອບທີ່ຢູ່ໃນໂປຣຕີນທົ່ວໄປທັງຈາກພືດ ແລະ ສັດ.

ຈຸດເລີ່ມຕົ້ນຂອງ ແປ້ງນົວ ແມ່ນມາຈາກປະເທດຍີ່ປຸ່ນເກີດຈາກການຄົ້ນພົບລົດຊາດທີ່ສະກັດໄດ້ຈາກສາຫລ່າຍທະເລທີ່ຮຽກວ່າ ລົດອູມາມິ ຫຼື ລົດແຊບ ຊຶ່ງຄົ້ນພົບມາເປັນຮ້ອຍໆປີແລ້ວ ຫລັງຈາກນັ້ນ, ກໍເລີ່ມມີການຜະລິດແປ້ງນົວໃນລະບົບອຸດສາຫະກໍາຫລາຍຂຶ້ນ ແຕ່ໃນພາຍຫລັງໄດ້ປ່ຽນທັງວັດຖຸດິບ ແລະ ວິທີການຜະລິດ, ປະຈຸບັນ ແປ້ງນົວ ຜະລິດຈາກແປ້ງມັນຕົ້ນຜ່ານຂະບວນການທາງເຄມີຫລາຍຂັ້ນຫລາຍຕອນທັງໝັກ ແລະ ໃຊ້ສານເຄມີຫລາຍຊະນິດ ເພາະສະນັ້ນຖ້າກິນເຂົ້າໄປຫລາຍໆຈະເກີດອັນຕະລາຍແນ່ນອນເຖິງວ່າສ່ວນປະກອບຫລັກຈະມາຈາກທຳມະຊາດກໍຕາມ.

ແປ້ງນົວຊ່ວຍໃຫ້ອາຫານແຊບຂຶ້ນແທ້ບໍ? ອັນທີ່ຈິງແລ້ວ ແປ້ງນົວ ບໍ່ໄດ້ເຮັດໃຫ້ອາຫານແຊບຂຶ້ນແຕ່ຢ່າງໃດ ເພາະແປ້ງນົວບໍ່ມີສີ ບໍ່ມີກິ່ນບໍ່ມີຄຸນຄ່າທາງສານອາຫານ ແລະ ບໍ່ມີລົດຊາດເປັນຂອງໂຕເອງຄືກັບ ນໍ້າປາ, ນໍ້າຕານ ແຕ່ທີ່ເຮົາຮູ້ສຶກແຊບຂຶ້ນກໍເພາະຄຸນສົມບັດຂອງມັນຈະໄປກະຕຸ້ນປະສາດໃນປາກ ແລະ ລໍາຄໍ ກະຕຸ້ນຕ່ອມຮັບລົດໃນລີ້ນໃຫ້ຂະຫຍາຍໂຕຈິ່ງເຮັດໃຫ້ຮັບລົດຊາດໄດ້ໄວກວ່າປົກກະຕິເວລາກິນຈະຊ່ອຍໃຫ້ລົດຕ່າງໆ ຄ້າງຢູ່ໃນປາກໄດ້ດົນຂຶ້ນກວ່າເກົ່າເຮົາຈະຮູ້ສຶກວ່າລົດຊາດມັນກົມກືນຂຶ້ນນັ້ນເອງ.

ການຮັບເອົາ ແປ້ງນົວ ເຂົ້າຮ່າງກາຍຫລາຍເກີນໄປ ຈະເຮັດໃຫ້ເກີດຜົນເສັຍຫລາຍຢ່າງໃນໄລຍະສັ້ນທີ່ເຫັນຜົນໄດ້ທັນທີກໍຄືຈະຮູ້ສຶກມຶນລີ້ນ ຫີວນໍ້າຫລາຍອາການນີ້ເກີດຂຶ້ນໄດ້ເລື້ອຍໆ ແຕ່ຖ້າຫາກກິນຫລາຍເກີນໄປກວ່າທີ່ຮ່າງກາຍຈະຮັບໄດ້ ຍັງມີອາການອື່ນໆອີກເຊັ່ນ ຮ້ອນທີ່ໃບໜ້າແໜ້ນໜ້າເອິກເຈັບຫົວປວດຮາກມີຕຸ່ມຜື່ນຂຶ້ນ ຫຼື ໄມເຄຣນກໍາເລີບຂຶ້ນໄດ້. ນອກຈາກນີ້, ຍັງສົ່ງຜົນເສັຍຕໍ່ລະບົບປະສາດສ່ວນອື່ນໆໃນຮ່າງກາຍໄລ່ຕັ້ງແຕ່ລະບົບສະໝອງລະບົບຄວບຄຸມນໍ້າຕານ, ລະບົບສົມດູນ ຊຶ່ງຜ່ານມາເຄີຍໄດ້ມີການທົດລອງກັບໜູ ເພື່ອກວດສອບອັບຕະລາຍຈາກແປ້ງນົວພົບວ່າ ຖ້າໃຫ້ແປ້ງນົວໃນປະລິມານຫລາຍຄື 1 ກຣາມຕໍ່ນໍ້າໜັກໂຕ 1 ກິໂລກຣາມ ຈະເຮັດໃຫ້ທໍາລາຍສະໝອງຂອງໜູ 100% ແຕ່ຖ້າໃຫ້ປະລິມານແປ້ງນົວຫລຸດລົງເຫລືອ 0,5 ກຣາມສະໝອງຈະຖືກທໍາລາຍເຄິ່ງໜຶ່ງ ຖ້າຫລຸດລົງເຫລືອ 0,25 ຈະບໍ່ມີຜົນກະທົບໃດໆເກີດຂຶ້ນ.

ເມື່ອຮູ້ແນວນີ້, ຫລາຍທ່ານຄົງບໍ່ຢາກກິນອາຫານໃສ່ແປ້ງນົວ ແຕ່ກໍຄອາດຈະຫລີກເວັ້ນໄດ້ຍາກຫາກເຮົາຍັງຝາກທ້ອງໄວ້ນອກເຮືອນ ບໍ່ວ່າຈະເປັນອາຫານຕາມຮ້ານ ໝີ່ເກິ່ງສຳເລັດຮູບ ຫຼື ຂະໜົມຫຍໍ້າກິນຫລິ້ນ ກໍໜີບໍ່ມົ້ມແປ້ງນົວແລ້ວທາງທີ່ພໍຈະຫລີກໄດ້ແດ່ ກໍຄືເຮັດກິນເອງໂດຍບໍ່ໃສ່ແປ້ງນົວ ຊຶ່ງອາດຈະໄດ້ອາຫານທີ່ບໍ່ແຊບປານໃດ ແຕ່ປອດໄພກວ່າ.

...............................................................................................................................................................

ທີ່ມາ : http://vtlaos.com/