ແບຣັດເຕີ ເອີ່ຍປາກບໍ່ເຄີຍເຮັດຜິດ ປະກາດນັ່ງຕັ່ງປະທານ ຟີຟາ ຕໍ່ໄປ

“ຟີຟາ” ອອກຖະແຫຼງການຢືນຢັນຄວາມບໍລິສຸດຂອງ ເຊບ ແບຣັດເຕີ ຜູ້ຮັກສາການຕຳແໜ່ງປະທານ “ຟີຟາ” ຫຼັງຈາກທີ່ຖືກສອບສວນປະເດັນເລື່ອງການທຸຈະລິດ ພ້ອມກັບປະກາດຈະນັ່ງຕັ່ງຕໍ່ໄປຈົນກວ່າຈະຮອດການເລືອກຕັ້ງສະໄໝໜ້າ.

ສຳນັກຂ່າວຕ່າງປະເທດລາຍງານເມື່ອວັນທີ 29 ກັນຍາ ວ່າ ເຊບ ແບຣັດເຕີ ຮັກສາການຕຳແໜ່ງປະທານສະຫະພັນບານເຕະນານາຊາດ “ຟີຟາ” ອອກມາຖະແຫຼງການຢືນຢັນຄວາມບໍລິສຸດຂອງຕົນເອງຫຼັງຈາກທີ່ຖືກສອບສວນປະເດັນເລື່ອງການທຸຈະລິດ ແລະ ຍັງຄົງຈະນັ່ງຕັ່ງປະທານຕໍ່ໄປຈົນຮອດການເລືອກຕັ້ງສະໄໝໜ້າທີ່ຈະເກີດຂຶ້ນໃນເດືອນກຸມພານີ້.

ແບຣັດເຕີ ໄດ້ລາອອກຈາກຕຳແໜ່ງຫົວເຮືອໃຫຍ່ຂອງວົງການລູກໜັງໂລກ ຫຼັງຈາກທີ່ຊະນະການເລືອກຕັ້ງສະໄໝທີ 5 ໃນເດືອນພຶດສະພາທີ່ຜ່ານມາ ເນື່ອງຈາກບໍ່ສາມາດທົນຕໍ່ກະແສຂ່າວເບື້ອງລົບ ແລະ ຈາກກໍລະນີທີ່ສະມາຊິກຈາກອົງກອນຖືກເຈົ້າໜ້າທີ່ຕຳຫຼວດຂອງປະເທດ ສະວິດເຊິແລນ ແລະ ເຈົ້າໜ້າທີ່ສຳນັກງານສອບສວນກາງຂອງສະຫະລັດ “ເອັຟບີໄອ” ບຸກເຂົ້າຈັບໂຕຄາໂຮງແຮມທີ່ພັກໃນນະຄອນ ຊູຣິກ ຫຼັງຈາກທີ່ທັງໝົດຕົກເປັນຜູ້ຖືກຫາໃນຄະດີ ສໍ້ໂກງ, ຟອກເງິນ ແລະ ກໍ່ເຫດສໍ້ສົນຫຼາຍຄັ້ງໃນຊ່ວງ 20 ປີທີ່ຜ່ານມາ, ຈົນໃນວັນສຸກທີ່ຜ່ານມານັ້ນ ສຳນັກງານໄອຍະການສູງສຸດຂອງປະເທດສະວິດເຊິ ແລນ (ໂອເອຈີ) ໄດ້ປະກາດເລີ່ມການສອບສວນປະມຸກລູກໜັງໂລກຄົນສະວິດເຖິງການກະທຳຄວາມຜິດທັງທຸຈະລິດ ແລະ ປະພຶດຕົນບໍ່ເໝາະສົມຈົນຮອດປະເດັນທີ່ວ່າ ເຂົາຈ່າຍເງິນທຸຈະລິດໃຫ້ ມິເຊວ ພລາຕິນີ ປະທານສະພາສະມາຄົມບານເຕະເອີຣົບ “ຢູຟາ” ເມື່ອເດືອນກຸມພາປີ 2011.

ລ່າສຸດ ຟີຟາ ອອກຖະແຫຼງການເຖິງເລື່ອງນີ້ໂດຍລະບູວ່າ “ໃນມື້ນີ້ ປະມານແບຣັດເຕີ ໄດ້ສົນທະນາກັບທີມງານຂອງ ຟີຟາ ແລະ ແຈ້ງກັບທີມງານວ່າເຂົາຈະໃຫ້ຄວາມຮ່ວມມືກັບເຈົ້າໜ້າທີ່ຕຳຫຼວດຢ່າງເຕັມທີ່ ພ້ອມກັບເນັ້ນຢຳວ່າເຂົາບໍ່ໄດ້ເຮັດຫຍັງຜິດກົດໝາຍ ຫຼື ບໍ່ເໝາະສົມ ພ້ອມທັງລະບຸວ່າເຂົາຍັງຄົງເປັນປະທານ ຟີຟາ ຕໍ່ໄປ”.

“ສຳລັບກໍລະນີຂອງ ມິເຊວ ພລາຕິນີ ທາງປະທານ ແບຣັດເຕີ ໄດ້ເຜີຍກັບຕຳຫຼວດສະສິດເມື່ອວັນສຸກວ່າ ພລາຕິນີ ເປັນທີມງານທີ່ຊົງຄຸນຄ່າຂອງ ຟີຟາ ແລະ ເປັນທີ່ປຶກສາຂອງປະທານມາຕັ້ງແຕ່ທຳອິດໃນປີ 1998 ເຂົາໄດ້ຊີ້ແຈງກັບເຈົ້າໜ້າທີ່ໄອຍະການວ່າເງິນຈຳນວນດັ່ງກ່າວນີ້ ເປັນຄ່າຕອບແທນທີ່ຖຶກກົດໝາຍ ບໍ່ມີຫຍັງທີ່ເກີຍໄປກວ່ານັ້ນ ແລະ ຢູ່ໃນບັນຊີຂອງຟີຟາຢ່າງຖືກຕ້ອງຕາມກົດ ເຊິ່ິງລວມເຖິງການຫັກພາສີ ທີ່ຈ່າຍຂອງຄ່າປະກັນສັງຄົມ.”

“ແຕ່ເນື່ອງຈາກຍັງຢູ່ໃນລະຫວ່າງການສອບສວນ ປະທານ ແບຣັດເຕີ ຈະບໍ່ມີການຕອບຄຳຖາມໃດໆເພີ່ມຕື່ມໃນຕອນນີ້.”

................................................................................................................................