ແບນຊິກຍັງບໍ່ແນ່ໃຈວ່າອາຊາຈະກັບມາລົງຊ້ອມທັນເກມຟາດເວວບໍ່

 

ມາກ ວິວມັອດ ຜູ້ຈັດການທີມຊາດແບນຊິກເຜີຍ ເອເດັນ ອາຊາ ມິດຟິວຂອງທີມຕ້ອງພາດລົງຊ້ອມເມື່ອວັນພຸດ ແລະ ຍັງບໍ່ຟັງທຸງວ່າຈະສົມບູນພ້ອມລົງຟາດກັບເວວໃນ ຢູໂຣ 2016 ວັນສຸກນີ້ຫຼັງຈາກທີ່ເຈັບມາຈາກເກມທີ່ພົບກັບຮັງກາລີເມື່ອວັນອາທິດທີ່ຜ່ານມາ.

 

ມາກ ວິວມັອດ ຜູ້ຈັດການທີມຊາດແບນຊິກອອກມາເຜີຍເມື່ອວັນພະຫັດນີ້ວ່າ ເອເດັນ ອາຊາ ເພເມກເກີຂອງທີມພາດລົງຊ້ອມເມື່ອວັນພຸດທີ່ຜ່ານມາ ແລະ ຍັງບໍ່ແນ່ວ່າຈະພ້ອມລົງຫຼິ້ນ ຫຼື ບໍ່ໃນເກມພົບກັບເວວຮອບ 8 ທີມສຸດທ້າຍວັນສຸກນີ້.

 

ສະຕາຂອງ ເຊວຊີ ໂຊຟອມໄດ້ດີໃນເກມຮອບ 16 ທີມສຸດທ້າຍທີ່ແບນຊິກເອົາຊະນະຮັງກາລີ 4-0 ເມື່ອວັນອາທິດທີ່ຜ່ານມາແຕ່ວ່າໄດ້ຮັບບາດເຈັບກ້າມຊີ້ນຕົ້ນຂາຈົນເຮັດໃຫ້ເຂົາຕ້ອງຖືກປ່ຽນໂຕອອກ ລວມທັງຍັງບໍ່ສາມາດລົງຝຶກຊ້ອມກັບທີມໄດ້ທັງໃນວັນອັງຄານ ແລະ ວັນພຸດທີ່ຜ່ານມາ.

 

“ຂ້ອຍຫວັງເປັນຢ່າງຍິ່ງວ່າຂ້ອຍຈະສາມາດລົງຝຶກຊ້ອມໄດ້ໃນວັນພະຫັດນີ້ແຕ່ເຂົາກໍຍັງມີບັນຫາອາການບາດເຈັບຢູ່ ດັ່ງນັ້ນ ເຂົາຈະໄດ້ຮັບການຮັກສາໃນຕອນແລງເຮົາກຳລັງເຮັດໃຫ້ເຂົາສົມບູນຮ້ອຍເປີເຊັນ ແຕ່ຂ້ອຍກໍບໍ່ສາມາບອກເຈົ້າໄດ້ແນ່ນອນວ່າມັນເກີດຂຶ້ນຕອນໃດ ຫຼື ເຂົາຈະບໍ່ເປັນຫຍັງ ຫຼື ບໍ່ ທີມແພດກຳລັງເຮັດວຽກກັນຢູ່” ວິວມັອດ ກ່າວ.

 

ຖ້າວ່າ ອາຊາ ບໍ່ສາມາດເຊົາເຈັບກັບມາທັນຈະຖືວ່າເປັນຂ່າວຮ້າຍຢ່າງຍິ່ງສຳລັບເຮົາເນື່ອງຈາກວ່າຕອນນີ້ເຂົາກຳລັງຢູ່ໃນສະພາວະທີ່ຟອມລະເບີດ ແລະ ຫາກໍຍິງໄດ້ລວມທັງສົ່ງໃຫ້ໝູ່ຍິງອີກ.