ແຄເບີພໍໃຈຫຼັງຜ່ານເຂົ້າຮອບ 2 ອອສເຕລຽນ ໂອເພັນ

 

ແອັງເຈີລິກ ແຄເບີ ເຣັກເກັດສາວເລືອດເບຍມື 1 ຂອງລາຍການ ອອສເຕລຽນ ໂອເພັນ ຊີ້ເກມຮອບທຳອິດມັນເປັນງານໜັກສະເໝີໂດຍສະເພາະໃນລາຍການແກນສະແລມ ຍອມຮັບວ່າຫຼິ້ນຜິດພາດໜ້ອຍໜຶ່ງຊ່ວງປາຍເຊັດສອງແຕ່ພໍໃຈຟອມຂອງຕົນເອງເຖິງວ່າເຮັດໄດ້ພຽງບົດຊະນະ ເລເຊຍ ຊູເຣັນໂກ ສາວຢູເຄຣນ 2-1 ເຊັດເທົ່ານັ້ນ.

 

ແອັງເຈີລິກ ແຄເບີ ນັກເທັນນິດສາວເຢຍລະມັນອອກມາຍອມຮັບວ່າ ຫຼິ້ນຜິດພາດເລັກນ້ອຍແຕ່ຍັງຮູ້ສຶກພໍໃຈຟອມການຫຼິ້ນຂອງຕົນເອງຢູ່ ຫຼັງຈາກທີ່ເອົາຊະນະ ເລເຊຍ ຊູເຣັນໂກ ຄູ່ແຂ່ງຈາກຢູເຄຣນ 2-1 ເຊັດ 6-2, 5-7, 6-2 ໃນເສິກແກນສະແລມ ອອສເຕລຽນ ໂອເພັນ ທີ່ນະຄອນເມວເບີນປະເທດອອສເຕເລຍເມື່ອວັນຈັນທີ່ຜ່ານມາ.

 

ນັກຫວດສາວມື 1 ຂອງລາຍການເຊິ່ງເປັນແຊມເກົ່າລາຍການນີ້ກ່າວວ່າ “ແນ່ນອນຂ້ອຍບໍ່ໄດ້ຮູ້ເສຍຫາຍຫຍັງ ຕັ້ງແຕ່ເລີ່ມເກມຂ້ອຍພະຍາຍາມຫຼິ້ນຕາມເກມຂອງຂ້ອຍ ຂ້ອຍເຮັດໄດ້ດີ ມີບາງຈັງຫວະທີ່ຂ້ອຍເຮັດໄດ້ບໍ່ຄ່ອຍດີ ຂ້ອຍຫຼິ້ນພາດໜ້ອຍໜຶ່ງໃນຊ່ວງປາຍເຊັດສອງ ແຕ່ຮອບທຳອິດເປັນງານໜັກສະເໝີ”.

 

“ຂ້ອຍຄິດວ່າມັນເປັນເລື່ອງດີໃນການມີເກມລັກສະນະນີ້ໃນຮອບທຳອິດ ຂ້ອຍໝາຍຄວາມວ່າມັນມັກເປັນເລື່ອງຍາກສຳຫຼັບທຸກຄົນໃນການຫາຈັງຫວະ ແລະ ໃນການເລີ່ມຕົ້ນທົວນາເມັນ ໂດຍສະເພາະຢ່າງຍິ່ງໃນລາຍການແກນສະແລມ ເຊິ່ງເປັນແກນສະແລມທຳອິດຂອງປີ ດັ່ງນັ້ນຂ້ອຍຄິດວ່າມັນກໍບໍ່ເສຍຫາຍເກີນໄປໃນການມີເກມລັກສະນະແບບນີ້ໃນຮອບທຳອິດ” ແຄເບີ ກ່າວ.