ແຂ່ງຂັນກ໊ອບການກຸສົນ ລະດົມທຶນຊ່ວຍເຫລືອຄົນ ພິການ-ຜູ້ອາຍຸສູງ

ຂປລ. ກະຊວງ​ແຮງ​ງານ ​ແລະ ສະຫວັດດີ​ການ​ສັງຄົມ ​ໄດ້​ຈັດງານ​ແຂ່ງ­ຂັນ​ກິລາ​ກ໊ອບ ການ​ກຸສົນ, ເນື່ອງ​ໃນ​ໂອ­ກາດ​ສະ­ເຫລີມ­ສະ­ຫລອງ ​ວັນຄົນພິການແຫ່ງຊາດ 27 ກັນຍາ ແລະ ວັນ​ສາ­ກົນຜູ້ອາຍຸສູງ 1 ຕຸລາ, ຊຶ່ງ​ມີ​ຂຶ້ນ ​ໃນວັນ​ທີ 23 ກັນຍາ 2017 ນີ້, ຢູ່­ໜາມຄັນ​ທຣີ​ກ໊ອບຄຣັບ ຫລັກ 14 ນະຄອນຫລວງ​ວຽງ​ຈັນ, ​ໂດຍ​ມີ ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ, ທ່ານ ຄຳ​ແພງ ​ໄຊ​ສົມ​ແພງ ລັດຖະມົນຕີກະຊວງ​ແຮງ​ງານ ​ແລະ ສະຫວັດດີ​ການ​ສັງຄົມ, ມີ​ບັນ­ດາ​ການ​ນຳ​ຂັ້ນ​ສູງ, ຜູ້­ຕາງ­ໜ້າ​ອົງ​ການ­ຈັດ­ຕັ້ງ​ສາ­ກົນ​ປະ­ຈຳ​ລາວ, ບໍ­ລິ­ສັດ, ​ຫ້າງ​ຮ້ານ, ນັກ­ທຸ­ລະ­ກິດ ​ທັງ​ພາຍ​ໃນ ແລະ ຕ່າງ­ປະ­ເທດ ​ເຂົ້າ​ຮ່ວມ.

ການ​ຈັດ​ງານ​ແຂ່ງ­ຂັນ​ກ໊ອບ​ການ​ກຸ­ສົນ​ໃນຄັ້ງ​ນີ້, ​ເປັນ​ກິດ­ຈະ­ກຳ​ໜຶ່ງ ທີ່ນອກ­ຈາກ​ຈະເປັນ​ການ​ສະ­ເຫລີມ­ສະ­ຫລອງ​ວັນຄົນພິການແຫ່ງຊາດ 27 ກັນຍາ ແລະ ວັນ​ສາ­ກົນຜູ້ອາຍຸສູງ 1 ຕຸລາ ​ແລ້ວ ຍັງ​ເປັນ​ການ​ລະ­ດົມ​ທຶນຊ່ວຍ​ເຫລືອ​ຄົນ​ພິການ, ຜູ້​ອາຍຸ​ສູງ​​​ໃຫ້ໄດ້​ມີ​ຊີວິດ​ການ​ເປັນ​ຢູ່ທີ່​ດີ​ຂຶ້ນ, ​​ມີອາຊີບ, ມີ​ວຽກ​ເຮັດ​ງານ​ທຳ​ທີ່​ໝັ້ນຄົງ ​ແລະ ອື່ນໆ.

​ການ​ແຂ່ງຂັນ​ໃນ​ຄັ້ງ​ນີ້​, ທີ​ມທີ່​ຊະນະ​ເລີດ ​​ແມ່ນໄດ້​ຮັບ​ຂັນລາງວັນ, ພ້ອມຖົງ​ກ໊ອບ ​ແລະ ລາງ ວັນ​ອື່ນໆ ຕື່ມອີກ​ຫລາຍ​ລາງວັນ.

ຂ່າວ-ຮູບ ທະນູ​ທອງ