ແຂວງ ໄຊຍະບູລີ ກຽມພ້ອມຈະແຫ່ຄາລະວານຊ້າງ ງານສະເຫຼີມສະຫຼອງຄົບຮອບ 20 ປີ ຫຼວງພະບາງເມືອງມໍລະດົກໂລກ.

ຈາກແຫລ່ງຂ່າວເສດຖະກິດ ການຄ້າ ຕອນບ່າຍວັນທີ 8 ກັນຍານີ້ , ທີ່ສະມາຄົມນັກຂ່າວ ໄດ້ມີພິິທີຖະແຫຼງຂ່າວກ່ຽວກັບການກະກຽມຄວາມພ້ອມໃນການແຫ່ຄາລະວານຊ້າງແຕ່ແຂວງໄຊຍະບູລີຫາແຂວງຫຼວງພະບາງ ໂດຍການເປັນປະທານຂອງ ທ່ານ ສົມສະໜຸກ ມີໄຊ ຮອງປະທານສະມາຄົມນັກຂ່າວ, ທ່ານ ເຊບັດສຕຽນ ດຸຍຟີໂຢ ເຈົ້າຂອງແລະຜູ້ຈັດການທົ່ວໄປສູນອະນຸລັກຊ້າງ. 


ທ່ານ ເຊບັດສຕຽນ ດຸຍຟີໂຢ ກ່າວວ່າ : ປີນີ້ແມ່ນປີພິເສດທີ່ພວກເຮົາໄດ້ມີການຈັດຂະບວນຄາລະວານຊ້າງ ແຕ່ແຂວງ ໄຊຍະບູລີຫາ ແຂວງຫຼວງພະບາງເພື່ອເຂົ້າຮ່ວມງານສະເຫຼີມສະຫຼອງຄົບຮອບ 20 ປີ ທີ່ຫຼວງພະບາງໄດ້ເປັນເມືອງມໍລະດົກໂລກ , ເຊິ່ງຈະໃຊ້ເວລາແຫ່ຈາກໄຊຍະບູລີຫາຫຼວງພະບາງປະມານ 40-45 ວັນ ໃນໄລຍະທາງ 500 ກິໂລແມັດ. 
ຂະບວນຄາລະວານມີຊ້າງທັງໝົດ 12 ເຊືອກ ທີ່ຈະແຫ່ໄປສົມທົບຊ້າງຢູ່ທີ່ຫຼວງພະບາງ ຈຳນວນ 8 ເຊືອກ ລວມເປັນ 20ເຊືອກ, ເຊິ່ງຈະເລີ່ມອອກເດີນທາງ ຈາກແຂວງໄຊຍະບູລີ ແມ່ນ ວັນທີ 30 ຕຸລາ ຄາດວ່າ ຈະຮອດແຂວງຫຼວງພະບາງ ໃນວັນທີ 6-7 ທັນວາ ເພາະງານສະເຫຼີມສະຫຼອງຈະໄດ້ຈັດຂື້ນໃນວັນທີ 9 ທັນວາ 2015 , ເມື່ອການສະແດງສຳເລັດບັນດາຊ້າງດັ່ງກ່າວກໍ່ຈະຖືກນຳສົ່ງກັບສູນອະນຸລັກຊ້າງຄືນທີ່ແຂວງໄຊຍະບູລີ ດ້ວຍລົດບັນທຸກ. 


ທ່ານຍັງໄດ້ກ່າວຕື່ມວ່າ : ກິດຈະກຳ ຄາລະວານຊ້າງຄັ້ງນີ້ຈະໃຊ້ງົບປະມານ 150.000ໂດລາສະຫະລັດແຕ່ມາຮອດປະຈຸບັນບັນດາບໍລິສັດ ຫ້າງຮ້ານແລະບຸກຄົນກໍ່ໄດ້ໃຫ້ການສະໜັບສະໜູນໄດ້ປະມານ 60% ຍັງ 40% ເຊິ່ງປະຈຸບັນພວກເຮົາກໍ່ກຳລັງລະດົມສ່ວນທີ່ເຫຼືອຢູ່.

ທີ່ມາ CRI-FM93

ບົດຄວາມໃຫມ່ໆ