ແຂວງວຽງຈັນບໍ່ອະນຸຍາດຂະຫຍາຍເນື້ອທີ່ປູກກ້ວຍ

ຂປລ. ສະພາບການລົງທຶນປູກກ້ວຍ ເປັນສິນຄ້າສົ່ງອອກຂອງນັກລົງທຶນຈາກປະເທດເພື່ອນບ້ານສປ ຈີນ ໃນໄລຍະຜ່ານມາ ແມ່ນມີຈຳນວນຫລາຍຢູ່ພາກເໜືອຂອງລາວ ແລະ ໄດ້ຂະຫຍາຍກິດ ຈະການລົງສູ່ພາກກາງ ໂດຍສະເພາະເມືອງວັງວຽງ ແລະ ເມືອງຫີນເຫີບ ແຂວງວຽງຈັນ ໃນປັດຈຸບັນ ມີທັງໝົດ 177 ເຮັກຕາ ແຕ່ດ້ວຍຄວາມເອົາໃຈໃສ່ຂອງເຈົ້າໜ້າທີ່ຂະແໜງປູກຝັງ ໃນການຕິດ ຕາມກວດກາຢ່າງເຂັ້ມງວດ ເຮັດໃຫ້ສະພາບການໃຊ້ສານເຄມີ ໃນແຂວງດັ່ງກ່າວ ບໍ່ໄດ້ສົ່ງຜົນກະທົບຕໍ່ສິ່ງແວດລ້ອມ ແລະ ສຸຂະພາບຂອງປະຊາຊົນແຕ່ຢ່າງໃດ.
ທ່ານ ກູ່ຄຳ ແສງດາລາ ວິຊາການຂະແໜງປູກຝັງ ພະແນກກະສິກຳ ແລະ ປ່າໄມ້ ແຂວງວຽງຈັນ, ໄດ້ຢືນຢັນຕໍ່ນັກຂ່າວສຳນັກຂ່າວສານປະເທດລາວວ່າ: ການລົງທຶນປູກກ້ວຍຢູ່ແຂວງວຽງຈັນ ມີ 2 ບໍລິສັດ ຄື: ບໍລິສັດ ຂິນຊຸນ ແລະ ບໍລິສັດ ຊຸນຟານ ເຊິ່ງຍັງດຳເນີນການປູກໃນສະພາບປົກ ກະຕິຕາມເນື້ອທີ່ລັດຖະບານອະນຸຍາດ, ສະເພາະຢູ່ເມືອງວັງວຽງ (ບ້ານນາແຄ) ເປັນການສຳປະທານທີ່ດິນຂອງລັດ ຈຳນວນ 36 ເຮັກຕາ. ສ່ວນຢູ່ເມືອງຫີນເຫີບ (ເຂດບ້ານມຸກ-ນາຫວາຍ-ວັງໝ້ຽງ) ເປັນການສຳປະທານ ດິນຂອງປະຊາຊົນ 141 ເຮັກຕາ. 2-3 ປີຜ່ານມາ ເຫັນວ່າການຜະລິດກ້ວຍ ແມ່ນໄດ້ຮັບໝາກຜົນເປັນຢ່າງດີ ຂະບວນການສົ່ງອອກ ໄປຕ່າງປະເທດ (ຈີນ) ແມ່ນຄຶກຄື້ນດີ. ຢ່າງໃດກໍຕາມ ໃນປັດຈຸບັນ ແມ່ນມີຫລາຍບໍລິສັດ ໄດ້ສະແດງເຈດຈຳນົງຂໍເຂົ້າມາລົງທຶນປຸກກ້ວຍຢູ່ແຂວງວຽງຈັນ ໃນຂະນະທີ່ ບໍລິສັດເດີມ ກໍມີຄວາມປະສົງຂໍຂະຫຍາຍກິດຈະການດັ່ງກ່າວອອກຕື່ມອີກ, ແຕ່ກໍບໍ່ໄດ້ອະນຸຍາດ ເນື່ອງຈາກລັດຖະບານສັ່ງຫ້າມເດັດຂາດ ບໍ່ໃຫ້ມີການລົງທຶນປູກກ້ວຍ ແລະ ຂະຫຍາຍກິດຈະການປູກກ້ວຍຕື່ມອີກໃນທົ່ວປະເທດ. ພ້ອມສັ່ງໃຫ້ໜ່ວຍງານກ່ຽວຂ້ອງເອົາໃຈໃສ່ຕິດຕມກວດກາຢ່າງເຂັ້ມງວດ ການນຳໃຊ້ສານເຄມີ ໃນສວນກ້ວຍ ເພື່ອປ້ອງກັນຜົນກະທົບຕໍ່ສິ່ງແວດລ້ອມ.
ທ່ານ ກູ່ຄຳ ແສງດາລາ ແຈ້ງໃຫ້ຮູ້ຕື່ມວ່າ: ໃນໄລຍະຜ່ານມາ ທາງວິຊາການຂະແໜງປູກຝັງ ໄດ້ເອົາໃຈໃສ່ລົງຕິດຕາມກວດກາ ແລະ ແນະນຳ ໃຫ້ທັງສອງບໍລິສັດ ຈົ່ງເຄົາລົບລະບຽບກົດໝາຍຂອງສປປ ລາວ ໂດຍສະເພາະການນຳໃຊ້ສານເຄມີ ກຳຈັດພືດໃນສວນກ້ວຍ (ຢາຂ້າຫຍ້າ) ໃຫ້ຖືກຕ້ອງຕາມຫລັກວິຊາການ ແລະ ມີຄວາມລະມັດລະວັງ ບໍ່ໃຫ້ໃຊ້ເກີນຂະໜາດ ເພາະຢ້ານວ່າຈະສົ່ງຜົນກະທົບຕໍ່ສິ່ງແວດລ້ອມ ແລະ ສຸຂະພາບຂອງປະຊາຊົນ. ຫາກເຈົ້າໜ້າກວດພົບເຫັນການນຳໃຊ້ສານເຄມີທີ່ບໍ່ຖືກຕ້ອງ ແລະ ເກີນກຳນົດ ກໍຈະດຳເນີນການທາງກົດໝາຍ ຫລື ອາດປິດກິດຈະການ ຕາມຄວາມເໝາະສົມ.

ແຫຼ່ງຂ່າວ: Pathedlao Lao.