ເຮືອເລັງທຸ່ມ 20 ລ້ານປອນລາກຟາເບຣກັສເສີມກາງ

 

ເປັບ ກວາດິໂອລາ ຜູ້ຈັດການທີມ ແມນ ຊີຕີ ເລັງແກ້ບັນຫາຟອມຕົກຂອງ “ເຮືອໃບສີຟ້າ” ໃນໄລຍະຫຼັງໂດຍການເດີນໜ້າລ່າ ເຊສ ຟາເບຣກັສ ມິດຟິວສໍາຮອງຂອງ ເຊວຊີ ມາຢູ່ນຳກັນອີກເທື່ອໜຶ່ງໃນຊ່ວງເປີດຕະຫຼາດຮອບສອງໂດຍພ້ອມທຸ່ມເງິນ 20 ລ້ານປອນເພື່ອລໍ້ໃຈ ເຊວຊີ.

 

ແມນເຊສເຕີ ຊີຕີ ສະໂມສອນມະຫາເສດຖີຂອງ ພຣີເມຍລີກ ກຽມສ້າງຄວາມຕະລຶງໂດຍການທຸ່ມເງິນ 20 ລ້ານປອນເພື່ອດຶງ ເຊສ ຟາເບຣກັສ ກອງກາງຂອງ ເຊວຊີ ມາປັ້ນເກມໃນຊ່ວງເປີດຕະຫຼາດຊື້ຂາຍນັກເຕະເດືອນມັງກອນນີ້ ຈາກການລາຍງານຂອງ ເດິຊັນ ສື່ດັງເມືອງຜູ້ດີເມື່ອວັນອາທິດທີ່ຜ່ານມາ.

 

ດາວເຕະເລືອດກະທິງເຄີຍບອກປັດຂໍ້ສະເໜີຂອງ ເອຊີ ມິລານ ແລະ ຢູເວັນຕຸດ 2 ຂາໃຫຍ່ໃນອີຕາລີຊ່ວງຊຳເມີທີ່ຜ່ານມາແຕ່ກໍລົງເປັນຕົວຈິງໃນ ພຣີເມຍລີກ ພາຍໃຕ້ກັບນຳທັບຂອງ ຄອນເຕ້ ພຽງນັດດຽວເທົ່ານັ້ນ.

 

ທາງດ້ານ “ເຮືອໃບສີຟ້າ” ກໍາລັງຢູ່ໃນໄລຍະຟອມຕົກບໍ່ຊະນະມາຕະຫຼອດ 4 ເກມຫຼັງສຸດເຮັດໃຫ້ ເປັບ ກວາດິໂອລາ ເຊື່ອວ່າທີມຂາດການສ້າງສັນເກມໃນແດນກາງ ແລະ ເບິ່ງວ່າແຄ່ງທີມຊາດສະເປັນແມ່ນໂຕຕອບໂຈດ ເພາະຜິດຫວັງໃນຜົນງານຂອງ ແຟນັນດິນໂຢ ລວມທັງບໍ່ເຫັນວ່າ ແຟນັນດິນໂຢ ກັບ ຢາຢາ ຕູເຣ ຈະແກ້ບັນຫາດັ່ງກ່າວໄດ້.

 

ນອກຈາກນັ້ນ ແມນ ຊີຕີ ຍັງຍິນດີເພີ່ມຄ່າເມື່ອຍຂອງ ຟາເບຣກັສ ທີ່ປັດຈຸບັນຮັບຢູ່ 160,000 ປອນຕໍ່ອາທິດ ແລະ ອາດຈະຕໍ່ຍອດໃນການຍ້າຍໄປຫຼິ້ນໃຫ້ ນິວຢອກ ຊີຕີ ເອຟຊີ ສະໂມສອນໃນ ເມເຈີລີກ ຊັອກເກີ ອາເມລິກາ ຕາມທີ່ນັກເຕະເຄີຍວາງແຜນໄວ້ຖ້າວ່າຕ້ອງລາການຫຼິ້ນໃນລີກເອີຣົບ.