ເຮືອຮ່ວມວົງຜີ-ສິງລ່າຕົວເມນດີເສີມທັບ

 

ເບັນຈະມິນ ເມນດີ ຟູແບັກດາວລຸ້ງຂອງ ໂມນາໂກ ປ່ອຍຟອມໂຫດຈົນເຕະຕາ “ຜີສາດແດງ” ແລະ ເຊວຊີ ທີ່ພ້ອມທຸ່ມເງິນດຶງຕົວໄປເສີມທັບ ຂະນະທີ່ຫຼ້າສຸດ “ເຮືອໃບສີຟ້າ” ວາງແຜນຍື່ນຂໍ້ສະເໜີໃຫ້ຕົ້ນສັງກັດນັກເຕະພິຈາລະນາຫວັງດຶງໄປເສີມທັບເຊັ່ນກັນ.

 

ແມນເຊສເຕີ ຊີຕີ ສະໂມສອນຍັກໃຫຍ່ຂອງ ພຣີເມຍລີກ ພ້ອມຮ່ວມວົງຍາດ ເບັນຈະມິນ ເມນດີ ແບັກຊ້າຍດາວລຸ້ງຂອງ ອາແອສ ໂມນາໂກ ເສີມທັບຊຳເມີນີ້ໂດຍມີ ແມນເຊສເຕີ ຢູໄນເຕັດ ແລະ ເຊວຊີ ໃຫ້ຄວາມສົນໃຈເຊັ່ນກັນ ຈາກການລາຍງານຂອງ ເດິ ຊັນ ສື່ເມືອງຜູ້ດີເມື່ອວັນຈັນທີ່ຜ່ານມາ.

 

ຟູແບັກທີມຊາດຝຣັ່ງທີ່ມີຄ່າຫົວ 30 ລ້ານເອີໂຣເຮັດຜົນງານໄດ້ຢ່າງໂດດເດັ່ນຕໍ່ເນື່ອງ ແລະ ລົງສະໜາມໃຫ້ ໂມນາໂກ ໄປແລ້ວ 30 ນັດຕັ້ງແຕ່ຍ້າຍມາຈາກ ໂອລິມປິກ ມາກຊາຍ ໃນຊ່ວງຊຳເມີທີ່ຜ່ານມາສົ່ງຜົນໃຫ້ໄດ້ຮັບຄວາມສົນໃຈຈາກຫຼາຍທີມຊັ້ນນຳທົ່ວເອີຣົບ.

 

ກ່ອນໜ້ານີ້ມີລາຍງານວ່າ “ຜີສາດແດງ” ແລະ ເຊວຊີ ວາງໃຫ້ນັກເຕະເປັນເປົ້າໝາຍເພື່ອດຶງຕົວເສີມແນວຫຼັງ ຂະນະທີ່ຫຼ້າສຸດ ເດິ ຊັນ ເຜີຍວ່າ “ເຮືອໃບສີຟ້າ” ວາງແຜນຍື່ນຂໍ້ສະເໜີໃຫ້ ໂມນາໂກ ພິຈາລະນາຫວັງດຶງ ເມນດີ ມາເສີມທັບເພື່ອໄລ່ລ່າແຊມໃນລະດູການໜ້າ.