ເຮັດແນວໃດດີ ເມື່ອຄຳພົບກ້ອນຊີ້ນທີ່ເຕົ້ານົມ

ຕ້ອງ​ຍອມ​ຮັບ​ແທ້ໆ ວ່າດຽວ​ນີ້​ຜູ້ຍິງ​ຕ້ອງ​ພົບກັບ​ພະຍາດ​ມະ​ເຮັງ​ເຕົ້າ​ນົມ ເຊິ່ງ​ເປັນ​ພະຍາດ​ທີ່​ ເປັນຕາ​ຢ້ານ​ອັນ​ດັບ​ຕົ້ນໆກັນ​ຫລາຍ​ຂຶ້ນ ແຕ່​ການ​ສັງເກດ​ຕົນ​ເອງ​ເພື່ອຈະ​ໄດ້​ປິ່ນປົວ​ຢ່າງ​ທ່ວງ​ທັນກ່ອນ ຖື​ວ່າ​ເປັນ​ເລື່ອງ​ທີ່​ດີ​ ສະ​ນັ້ນ​​ສາວໆ ຄວນ​ຈະ​ຄຳ​ເຕົ້ານົມ​ຕົນເອງ​ເພື່ອ​ເຊັກ​ເບິ່ງ​ວ່າ ​ມີ​ກ້ອນ​​ແປກໆ ຫລື ບໍ່ ແຕ່​ຖ້າ​ເກີດ​ຄຳ​ເຫັນ​ຂຶ້ນ​ມາ​ຈະ​ເຮັດ​ຢ່າງໃດ​ຕໍ່ໄປ​ດີ ມື້​ນີ້​ ​ໄດ້​ນຳ​ວິທີ​ປະຕິບັດ​ຕົນເມື່ອ​ຄຳ​ພົບ​ກ້ອນ​ເນື້ອທີ່​ເຕົ້າ​ນົມມາ​ຝາກ​ແລ້ວ ລອງ​ເຮັດ​ຕາມ​ນີ້​ເບິ່ງ​
1. ຢ່າ​ຕື່ນຕົກໃຈເມື່ອ​ຄຳ​ໄປ​ທີ່​ເຕົ້ານົມແລ້ວ​ພົບກ້ອນ​​ແປກໆ ກໍ​ຢ່າ​​ຕົກ​ໃຈ​ຫລາຍ​ເກີນ​ໄປ ເພາະ​ຄວາມ​ກັງ​ວົນ​ ຍິ່ງ​ເຮັດໃຫ້​ຮ່າງກາຍ​ ບໍ່ດີຫລາຍກວ່າ​ເກົ່າ ​ແລະ ​ໂອ​ກາດ​ທີ່​ມັນ​ຈະ​ເປັນກ່ອນເນື້ອາ​ທີ່​ບໍ່​ອັນຕະລາຍ​ກໍ່​ມີ​ຢູ່ ເຊິ່ງ​ພວກ​ກ້ອນ​ເນື້ອເຫລົ່າ​ນີ້ ໂດຍ​ສ່ວນຫລາຍ​ຈະ​ມາ​ປາກົດ​ຕົວ​ໃນ​ໄລຍະມີ​ປະຈຳ​ເດືອນ​ຂອງ​ທ່ານ ​ແລະ ​ຈະ​ລະ​ລາຍ​ຫາຍ​ໄປ​ໃນ​ທີ່ສຸດ ແຕ່​ຖ້າ​ອົດ​ຄິດ​ວິ​ຕົກ​ກັງ​ວົນ​ບໍ່​ໄດ້​ແທ້ໆ ກໍ​ຮີບ​ໄປ​ໂຮງໝໍ
2.  ໄປ​ພົບ​ແພດ ຖ້າ​ຫາກ​ພົບກ້ອນ​ຊີ້ນແປກໆ ທີ່​ເຕົ້ານົມ​ແລ້ວ​ຢ້ານ​ ຫລື ​ກັງ​ວົນ​ຕະຫລອດ​ເວລາ ໃຫ້​ຮີບ​ໄປ​ພົບ​ໝໍ ​ເພື່ອ​ກວດ​ຫາ​ສາ​ເຫດ​ທີ່​ແທ້​ຈິງ​ຂອງ​ກ້ອນ​ເນື້ອນັ້ນ ເພາະ​ແນ່ນອນ​ແລ້ວ​ແພດ​ກໍ​ຈະ​ຮູ້​ຂໍ້​ມູນ​ກ່ຽວກັບ​ກ້ອນ​ເນື້ອ ຮູ້​ວ່າ​ຂະໜາດ ຫລື ​ທິດ​ທາງ​ການ​ເຄື່ອນ​ຕົວ​ຂອງ​ມັນ​ເປັນ​ຢ່າງໃດ ແລ້ວ​ຈະ​ພິຈາລະນາ​ອອກ​ມາ​ໃຫ້​ທ່ານ​ຮູ້​ໄດ້​ຢ່າງ​ທັນທີ ຖ້າຫາກ​ເປັນ​ພະຍາດ​ຮ້າຍ​ກໍ​ຈະ​ໄດ້​ປິ່ນປົວ​ຕໍ່ໄປ ແຕ່​ຖ້າ​ຫາກ​ບໍ່​ມີ​ຫຍັງ​ອັນຕະລາຍ​ທ່ານ​ກໍ​ຈະ​ໄດ້​ສະບາຍ​ໃຈ​ໄດ້
3.  ເຮັດ​ແບບ​ທົດສອບ​ວິ​ນິດໄສ ໃນ​ການ​ພິຈາລະນາ​ຫາ​ສາ​ເຫດ​ຂອງ​ກ້ອນ​ຊີ້ນ​ນັ້ນ ທ່ານອາດຈະ​ຕ້ອງ​ເຮັດ​ ແມມ​ໂມ​ແກມ ເອັກຊະ​ເລ ເພື່ອ​ກວດ​ຫາ​ມະ​ເຮັງ​ເຕົ້າ​ນົມ ເຊິ່ງ​ຈະ​ເຮັດໃຫ້​ຮູ້​ວ່າ​ກ້ອນ​ຊີ້ນນັ້ນ​ປົກກະຕິ​ຫລື ບໍ່​ປົກກະຕິ ໂດຍ​ການເຮັດ​ແບບ​ທົດສອບ​ພິຈາລະນາ​ຈະໃຫ້​ຄຳ​ຕອບ​ໄດ້ 3 ແບບ ຄື ກ້ອນ​ຊີ້ນ​ນັ້ນ​ບໍ່ແມ່ນ​ມະ​ເຮັງ ແລະ​ ຕ້ອງ​ກໍ່ການ​ຕັດ​ເນື້ອ​ເຍື່ອ​ໄປ​ກວດ​ພິຈາລະນາ​ພະຍາດ​ຕໍ່ໄປ ຖ້າ​ຜົນ​ອອກ​ມາ​ວ່າ​ ກ້ອນ​ຊີ້ນ​ນັ້ນ​ອາດ​ບໍ່ແມ່ນ​ມະ​ເຮັງ ເຈົ້າ​ກໍ​ຕ້ອງ​ກັບ​ໄປ​ເຮັດ​ແບບ​ທົດສອບ​ພິຈາລະນາ​ອີກ​ຄັ້ງ​ໃນ​ອີກ 6 ເດືອນ​ຂ້າງ​ໜ້າ
4.ຕັດ​ເນື້ອ​ເຍື່ອ​ໄປ​ກວດ ການ​ຕັດ​ເນື້ອ​ເຍື່ອ​ໄປ​ກວດ ເປັນ​ສິ່ງ​ທີ່​ຈຳ​ເປັນ​ຢ່າງ​ຫລີກ​ລ້ຽງ​ບໍ່​ໄດ້ ຫາກ​ຜົນ​ການ​ກວດ​ຂອງ​ເຈົ້າ​ອອກ​ມາ​ແບບ​ສະຫລຸບ​ໄດ້​ບໍ່​ຊັດເຈັນ ໂດຍ​ວິທີ​ການ​ຕັດ​ເນື້ອ​ເຍື່ອ​ໄປ​ກວດ​ເຮັດ​ໄດ້​ດ້ວຍ​ວິທີ​ການ​ດູດ​ເຈາະ​ດ້ວຍ​ເຂັມ​ນ້ອຍ​ ຫລື​ ການ ຕັດ​ຊິ້ນ​ເນື້ອ​ໂດຍ​ໃຊ້​ເຂັມ​ເຈາະ ເພື່ອ​ນຳ​ໄປ​ກວດ​ເບິ່ງ​ດ້ວຍ​ກ້ອງ​ຈຸລະທັດ​ວ່າ​ເປັນ​ມະ​ເຮັງ​ ຫລື​ ບໍ່
        ສຳລັບ ສາວໆຄົນ​ໃດ​ທີ່​ຢ້ານ​ພະຍາດ​ມະ​ເຮັງ​ເຕົ້າ​ນົມ​ຫລາຍ ກໍ​ລອງ​ກວດ​ເຊັກ​ດ້ວຍ​ຕົວ​ເອງ​ໂດຍ​ການ​ຄຳ​ໄປ​ທີ່​ເຕົ້ານົມເລື້ອຍໆ ຫາກ​ໄປ​ພົບ​ແພດ​ແລ້ວ​ພົບ​ວ່າ​ຕົວ​ເອງ​ເກີດ​ເປັນ​ມະ​ເຮັງ​ຂຶ້ນ​ມາ​ແທ້ໆ ກໍ​ຄວນ​ຈະ​ສ້າງ​ກຳ​ລັງ​ໃຈ​ໃຫ້​ຕົວ​ເອງ​ ເຮັດ​ຈິດ​ໃຈ​ໃຫ້​ສະບາຍ​ສະເໝີ ແຕ່​ຖ້າ​ບໍ່​ເປັນ​ພະຍາດ​ຮ້າຍ​ໃດໆ ນັ້ນ​ຖື​ວ່າທ່ານໂຊກດີ