ເຮຍມູ ກັບມາຕັ່ງຮ້ອນອີກແລ້ວ

ສື່ຈາກເມືອງຜູ້ດີຕີຂ່າວ ໂຊເຊ ມູຣິນໂຢ ນາຍໃຫຍ່ ເຊວຊີ ກັບມາສ່ຽງຕໍ່ການຖືກປົດອອກຈາກຕຳແໜ່ງຫຼັງຈາກທີ່ທີມເສຍໃຫ້ກັບ ບອນມັດ ໃນເກມລີກເມື່ອວັນເສົາ ຄາດກັນວ່າ ມູຣິນໂຢ ອາດຈະຖືກເດັ້ງອອກໃນອີກບໍ່ດົນເຖິງວ່າ ເຊວຊີ ຈະທຸບ ເອຟຊີ ປໍໂຕ້ ແລະ ຜ່ານເຂົ້າຮອບໃນລາຍການ ຢູຟາ ກໍຕາມ.

ໂຊເຊ ມູຣິນໂຢ ນາຍໃຫຍ່ຕັ່ງຮ້ອນຂອງ ເຊວຊີ ສະໂມສອນຍັກໃຫຍ່ຈາກລາຍການ ພຣີເມຍລີກ ອັງກິດ ຕົກເປັນຂ່າວວ່າກັບມາຢູ່ໃນສະຖານະການສຸ່ມສ່ຽງຕໍ່ການຖືກປົດອອກຈາກຕຳແໜ່ງຄຸມບັງຫຽນ ຫຼັງຈາກທີ່ ເຊວຊີ ເປີດບ້ານເສຍໄຊໃຫ້ກັບ ບອນມັດ ໃນເກມລີກເມື່ອວັນເສົາທີ່ຜ່ານມາ.

ເຊວຊີ ພາຍໃຕ້ການຄຸມທີມຂອງ ໂຊເຊ ມູຣິນໂຢ ເຮັດຜົນງານໄດ້ຕົກຕ່ຳທີ່ສຸດໃນເມືອງຜູ້ດີ ໂດຍຢູ່ອັນດັບທີ 14 ໃນຕາຕາລາງຄະແນນມີ 15 ແຕ້ມຈາກ 15 ນັດ ແລະ ເຖິງວ່າ ເຊວຊີ ຈະກັບມາປ່ອຍຟອມໄດ້ດີອີກຄັ້ງໃນຊ່ວງທີ່ຜ່ານມາ ແຕ່ຫຼັງຈາກທີ່ ເຊວຊີ ເສຍໃຫ້ກັບ ບອນມັດ ເມື່ອວັນເສົາທີ່ຜ່ານມາເຮັດໃຫ້ລ່າສຸດ “ເດິ ມິນເລີ” ສື່ກິລາຈາກເມືອງຜູ້ດີຕີຂ່າວວ່າ ອະດີດນາຍໃຫຍ່ ອິນເຕີ ມິລານ ກັບມາຮ້ອນທີ່ຈະເດັ້ງອອກຈາກຕຳແໜ່ງ ແລະ “ເດິ ສະເປຊຽວ ວັນ” ກໍອາດຈະຖືກ ເຊວຊີ ສັ່ງປົດໃນໄວໆນີ້ຕໍ່ໃຫ້ພາທີມຊະນະ ປໍໂຕ້ ແລະ ຜ່ານເຂົ້າຮອບ 16 ທີມສຸດທ້າຍໃນລາຍການ ຢູຟາ ໄດ້ສຳເລັດກໍຕາມ.

ທັງນີ້ຄາດກັນວ່າ ບອດບໍລິຫານຂອງ ເຊວຊີ ຮູ້ສຶກກັງວົນຫຼາຍຂຶ້ນວ່າ ມູຣິນໂຢ ຈະບໍ່ສາມາດພາທີມຫຼຸດພົ້ນອອກຈາກສະຖານະການໄດ້ ແລະ ອາດຈະຕັດສິນໃຈປົດນາຍໃຫຍ່ ປັອກຕຸຍການ ໃນອະນາຄົດອັນໃກ້ນີ້.

.......................................................................................................................................................