ເຮຍມູມັກແລ້ວ!!ຜີເລັງຍື່ນສັນຍາມາຕ້າຮອດປີ 2020

 

ສື່ຜູ້ດີຕີຂ່າວ ຮວານ ມາຕ້າ ມິດຟິວເກມບຸກຂອງ ແມນເຊສເຕີ ຢູໄນເຕັດ ກຽມໄດ້ຮັບລາງວັນຈາກຕົ້ນສັງກັດເມື່ອ “ຜີສາດແດງ” ເລັງຍື່ນສັນຍາຈົນຮອດປີ 2020 ໃຫ້ເຂົາຮັບໄປພິຈາລະນາຫຼັງຈາກທີ່ ໂຊເຊ ມູຣິນໂຢ ປະທັບໃຈໃນຟອມການຫຼິ້ນຂອງນັກເຕະຊ່ວງຕົ້ນລະດູການນີ້.

 

“ເດລີ ມິນເລີ” ສື່ກິລາຊື່ດັງຂອງແດນຜູ້ດີລາຍງານຂ່າວວ່າ ແມນເຊສເຕີ ຢູໄນເຕັດ ສະໂມສອນຍັກໃຫຍ່ຂອງ ພຣີເມຍລີກ ກຽມທີ່ຈະຍື່ນສັນຍາສະບັບໃໝ່ໄລຍະຍາວ 4 ປີໃຫ້ກັບ ຮວານ ມາຕ້າ ເພເມກເກີທີມຊາດສະເປນເພື່ອຫວັງດຶງໂຕໄວ້ກັບທີມຕໍ່ໄປ ຫຼັງຈາກທີ່ນັກເຕະປ່ອຍຟອມເທບໃນຊ່ວງຕົ້ນລະດູການນີ້.

 

ກອງກາງອາຍຸ 28 ປີລົງສະໜາມຢ່າງສະໝ່ຳກັບ ແມນຢູ ໃນ ພຣີເມຍລີກ ລະດູການນີ້ເຖິງວ່າ ໂຊເຊ ມູຣິນໂຢ ຜູ້ຈັດການທີມຈະບໍ່ຄ່ອຍມັກໃນໂຕນັກເຕະ ຫຼັງເຄີຍຂາຍອອກຈາກທີມຕອນຄຸມ ເຊວຊີ ຢ່າງໃດກໍຕາມຈາກຜົນງານຍິງ 2 ປະຕູບວກັບ 1 ແອສຊິດຈາກການຫຼິ້ນເກມລີກ 6 ນັດພຽງພໍທີ່ຈະໂນ້ມນ້າວໃຫ້ “ເດິ ສະເປຊຽວ ວັນ” ພະຍາຍາມດຶງໂຕ ມາຕ້າ ໄວ້ກັບທີມຕໍ່ໄປ.

 

ສຳລັບ ມາຕ້າ ຈະໝົດສັນຍາກັບ ແມນຢູ ໃນປີ 2018 ແລະ ເຄີຍຕົກເປັນຂ່າວວ່າເຂົາອາດຈະຍ້າຍໄປຮັບໃຊ້ ບາເລັນເຊຍ ກັບ ເອເວີຕັນ ເມື່ອຊ່ວງຊຳເມີຈາກການມາຂອງ ມູຣິນໂຢ.