ເຮຍມູບອກຜິດຫວັງຜີບຸກເສຍເຟເຢນູດຢູໂຣປາລີກ

 

ໂຊເຊ ມູຣິນໂຢ ນາຍໃຫຍ່ ຜີສາດແດງ ແມນເຊສເຕີ ຢູໄນເຕັດ ຮັບວ່າບໍ່ແຮັບປີ້ແນ່ນອນທີ່ເຫັນຕົ້ນສັງກັດອອກໄປຖືກເຜົາເຄື່ອງໃນຖິ່ນ ເຟເຢນູດ 0-1 ປະເດີມເກມ ຢູໂຣປາ ລີກ ກຸ່ມເອເມື່ອວັນພະຫັດທີ່ຜ່ານມາ ຊີ້ໃນຂັນນ້ອຍເອີຣົບໃຜກໍຢາກລົ້ມ ຜີແດງ ທັງນັ້ນ.

 

ໂຊເຊ ມູຣິນໂຢ ຜູ້ຈັດການທີມຈອມແທັກຕິກຂອງ ແມນເຊສເຕີ ຢູໄນເຕັດ ສະໂມສອນຍັກໃຫຍ່ຂອງ ພຣີເມຍລີກ ຍອມຮັບຕົນຜິດຫວັງທີ່ສຸດທີ່ລູກທີມອອກໄປເສຍໃຫ້ກັບ ເຟເຢນູດ 0-1 ທີ່ສະໜາມ ເດີ ຄາຍ ໃນລາຍການ ຢູຟາ ຢູໂຣປາ ລີກ ຮອບແບ່ງກຸ່ມຂອງກຸ່ມເອນັດທຳອິດເມື່ອວັນພະຫັດທີ່ຜ່ານມາ.

 

“ຜີສາດແດງ” ອອກເລີ່ມບານຂັນເອີຣບໄດ້ບໍ່ຄ່ອຍໂສພາປານໃດເມື່ອຖືກ ທອນນີ ວິວເຮນາ ນັກເຕະເຈົ້າບ້ານຍິງປະຕູໄຊໃນນາທີ 79 ສົ່ງຜົນໃຫ້ທີມດັງຂອງ ໂອນ ທຣາຟເຟິດ ເສຍແບບໜ້າເຈັບໃຈ ແລະ ເປັນການເສຍເກມທີ 2 ຕິດຕໍ່ກັນຫຼັງຈາກທີ່ກ່ອນໜ້ານີ້ຖືກ ແມນເຊສເຕີ ຊີຕີ ບຸກຊະນະໃນເກມລີກເມື່ອທ້າຍອາທິດທີ່ຜ່ານມາ.

 

ມູຣິນໂຢ ສະແດງຄວາມເຫັນຫຼັງຈົບເກມວ່າ “ແນ່ນອນວ່າຂ້ອຍບໍ່ພໍໃຈກັບຜົນການແຂ່ງຂັນເຮົາເສຍໃນເກມນີ້ເຊິ່ງມັນເປັນໄລຍະເວລາທີ່ເຮົາບໍ່ຄວນຈະເສຍ ເຊິ່ງໃນເຄິ່ງຫຼັງເກມເຮົາເໜືອກວ່າຢ່າງຊັດເຈນເຮົາສາມາດຄອງເກມເອົາໄວ້ໄດ້ຕະຫຼອດ ເຮົາພະຍາຍາມທີ່ຈະຊະນະສ່ວນພວກເຂົາພະຍາຍາມທີ່ຈະບໍ່ເສຍ”.

 

“ມັນເປັນເລື່ອງທີ່ໂຊກຮ້າຍຄູນສອງເພາະຈັງຫວະທີ່ໄດ້ປະຕູເຫັນໄດ້ຊັດເຈນວ່າເປັນຈັງຫວະລ້ຳໜ້າ ສຳລັບເຄິ່ງຫຼັງເກມຂອງເຮົາດີກວ່າໃນເຄິ່ງທຳອິດໃນເກມ ຢູໂຣປາ ລີກ ເຮົາເປັນທີມທີ່ທຸກໆສະໂມສອນຕ້ອງການທີ່ຈະລົ້ມໃຫ້ໄດ້” ອະດີດນາຍໃຫຍ່ ເຊວຊີ ກ່າວ.