ເອເຢນແວຣັດຕິຂູ່ຍ້າຍທີມຖ້າສື່ດ່າບໍ່ເຊົາ

 

ເອເຢນຂອງ ມາໂກ ແວຣັດຕິ ຫ້ອງເຄື່ອງອີຕາລີຂອງ ປາຣີ ແຊັງ-ແຊັກແມັງ ດ່າສື່ວິຈານ ແລະ ໂຈມຕີນັກເຕະໃນຄວາມດູແລຂອງຕົນແບບບໍ່ເປັນທຳ ແລະ ອາດຈະເປັນປັດໄຈກະຕຸ້ນໃຫ້ຍ້າຍທີມກໍໄດ້ໃນອະນາຄົດ ເຖິງວ່າຢາກຢູ່ໄດ້ແຊມກັບທີມກໍຕາມ.

 

ໂດນາຕິ ດິ ຄຳປລິ ນາຍໜ້າຂອງ ມາໂກ ແວຣັດຕິ ກອງກາງທີມຊາດອີຕາລີຂອງ ປາຣີ ແຊັງ-ແຊັກແມັງ ສະໂມສອນຍັກໃຫຍ່ຂອງ ລີແອັງ ຝຣັ່ງອອກມາຂູ່ວ່າອາດຈະພານັກເຕະຍ້າຍທີມໃນອະນາຄົດກໍໄດ້ຖ້າວ່າສື່ທັງຫຼາຍຍັງບໍ່ເຊົາຊອກຫາມູມທີ່ບໍ່ດີມາໂຈມຕີເຂົາຕໍ່ເນື່ອງແບບທີ່ເປັນຢູ່.

 

ແວຣັດຕິ ເປັນຂ່າວຫຼາຍເທື່ອໃນລະດູການນີ້ໂດຍສະເພາະເມື່ອຖືກຫຼິ້ນຂ່າວວ່າມີເລື່ອງຂັດແຍ່ງກັບ ອູໄນ ເອເມຣີ ນາຍໃຫຍ່ຂອງທີມເມື່ອອາທິດທີ່ຜ່ານມາ ທີ່ເຂົາສະແດງຄວາມບໍ່ພໍໃຈທີ່ຖືກປ່ຽນໂຕອອກໃນນາທີ 59 ແລະ ມີປາກສຽງກັບໂຄດໃນເກມສະເໝີກັບ ໂອລິມປິກ ມາກແຊ ແບບບໍ່ມີສະກໍ ຂະນະທີ່ຫຼ້າສຸດໃນເກມຊະນະ ລີວ 1-0 ເມື່ອວັນສຸກທີ່ຜ່ານມາເຂົາຫຼິ້ນໜຶ່ງຊົວໂມງກ່ອນຖືກປ່ຽນໂຕອອກໃຫ້ ອາເດຣິຢົງ ຣາບິໂອ ລົງຫຼິ້ນແທນ.

 

ຫຼ້າສຸດ ນາຍໜ້າຂອງນັກເຕະທີ່ໄດ້ຮັບຄວາມສົນໃຈທັງຈາກ ຢູເວັນຕຸດ ແລະ ເອຊີ ມິລານ ກ່າວວ່າ “ແວຣັດຕິ ຢາກປະສົບຄວາມສຳເລັດກັບ ເປເອັດເຊ ຢ່າງໃດກໍຕາມຖ້າວ່າສື່ຝຣັ່ງຍັງບໍ່ເຊົາໂຈມຕີເມື່ອນັ້ນ ມາໂກ ກໍອາດຈະປະເມີນສະຖານະການຂອງເຂົາ ແລະ ຍ້າຍອອກຈາກປາຣີໃນທີ່ສຸດກໍໄດ້”.