ເອເຢນເຜີຍມີພຽງ 4 ຍັກທີ່ສາມາດດຶງເອັມບັບເປໄດ້

 

ປາສການ ບົວໂຊ ນາຍໜ້າຂອງ ຄີລຽນ ເອັມບັບເປ ຫົວຫອກດາວລຸ້ງຂອງ ອາແອສ ໂມນາໂກ ລະບຸມີພຽງ 4 ສະໂມສອນເທົ່ານັ້ນທີ່ສາມາດດຶງຕົວນັກເຕະຄົນນີ້ໄປຮ່ວມທັບໄດ້ ໝັ້ນໃຈວ່າຄ່າຫົວຂອງ ເອັມບັບເປ ບໍ່ຕຳ່ກວ່າ 100 ລ້ານເອີໂຣ.

 

ປາສການ ບົວໂຊ ເອເຢນຂອງ ຄີລຽນ ເອັມບັບເປ ກອງໜ້າດາວລຸ້ງ ອາແອສ ໂມນາໂກ ສະໂມສອນດັງຂອງ ລີກແອັງ ຝຣັ່ງເຊື່ອວ່າເວລານີ້ມີພຽງ ບາເຊໂລນາ, ເຣອັນ ມາດຣິດ, ແມນເຊສເຕີ ຊີຕີ ແລະ ແມນເຊສເຕີ ຢູໄນເຕັດ ເທົ່ານັ້ນທີ່ມີກຳລັງດ້ານການເງິນສູງພໍໃນການດຶງນັກເຕະ ເອັມບັບເປ ໄປຮ່ວມທັບ.

 

ຫົວຫອກທີມຊາດຝຣັ່ງອາຍຸ 18 ປີໂຊຟອມໄດ້ເທບສຸດໆໃນລະດູການນີ້ໂດຍການຍິງໄປແລ້ວ 23 ປະຕູຈາກການລົງຫຼິ້ນໃຫ້ ໂມນາໂກ ລວມທຸກລາຍການ 37 ນັດຈົນກາຍເປັນທີ່ຕ້ອງການຂອງບັນດາສະໂມສອນຍັກໃຫຍ່ຂອງເອີຣົບ ເຊິ່ງເມື່ອບໍ່ດົນມານີ້ ອາແຊນ ເວນເກີ ຜູ້ຈັດການທີມ ອາເຊນອນ ຍອມຮັບວ່າທີມຕົນບໍ່ໜ້າຈະສູ້ທີມອື່ນໄດ້ຖ້າຄິດຈະດຶງ ເອັມບັບເປ ມາຮ່ວມທັບ.

 

“ທຸກມື້ນີ້ມີພຽງແຕ່ສີ່ຍັກໃຫຍ່ໃນໂລກທີ່ສາມາດດຶງຕົວເຂົາໄດ້ນັ້ນກໍຄື ບາຊາ, ເຣອັນ, ຊີຕີ ແລະ ຢູໄນເຕັດ ການຍ້າຍທີມຊ່ວງຊຳເມີນີ້ອາດຈະມີເລື່ອງບໍ່ດີເກີດຂຶ້ນກັບຕົວເຂົາກໍໄດ້ ມັນຍັງບໍ່ແມ່ນປີທີ່ດີເທົ່າໃດ ຕອນນີ້ເຂົາກຳລັງໄປໄດ້ດີ ລະດັບການຫຼິ້ນຂອງເຂົາບໍ່ແມ່ນເດັກນ້ອຍຂຶ້ນໃໝ່ແລ້ວ ແຕ່ຕໍ່ໃຫ້ລະດູການໜ້າຟອມຂອງເຂົາຈະດຣັອບລົງ ໂມນາໂກ ກໍຄົງຈະໄດ້ຂໍ້ສະເໜີລະດັບ 100 ລ້ານເອີໂຣຢູ່ດີ” ບົວໂຊ ກ່າວຜ່ານ ເລກິບ ສື່ດັງຂອງເມືອງນຳ້ຫອມ.

 

ບົດຄວາມໃຫມ່ໆ