ເອົາແທ້!!ບັກເຈຍໃຫຍ່ບ້າທຸ່ມ 40.5 ລ້ານປອນດຶງຊິຊາຣິໂຕ້

 

“ເຈຍໃຫຍ່” ບາເລັນເຊຍ ວາງແຜນລ່າໂຕ ຮາເວຍ ເອນານເດດ ຫົວຫອກຂອງ ໄບເອີ ເລເວີກູເຊັນ ໂດຍພ້ອມທີ່ຈະທຸ່ມເງິນກ້ອນໃຫຍ່ເຖິງ 40.5 ລ້ານປອນໄປແລກເອົາ.

 

ບາເລັນເຊຍ ສະໂມສອນດັງຂອງ ລາ ລີກາ ສະເປນ ຕົກເປັນຂ່າວເມື່ອວັນພຸດທີ່ຜ່ານມາພ້ອມທີ່ຈະທຸ່ມເງິນລະດັບ 40.5 ລ້ານປອນເພື່ອຂໍຊື້ໂຕ ຮາເວຍ ເອນານເດດ ກອງໜ້າເລືອດແມັກຊິກັນຂອງ ໄບເອີ ເລເວີກູເຊັນ ສະໂມສອນຊັ້ນນຳຂອງ ບຸນເດສລີກາ ເຢຍລະມັນມາເສີມທັບໃນຊ່ວງເປີດຕະຫຼາດຊື້ຂາຍນັກເຕະຮອບສອງເດືອນມັງກອນນີ້.

 

ເມື່ອອາທິດກ່ອນມີກະແສຂ່າວວ່າ ບາເລັນເຊຍ ແລະ ເຊບີຢາ ຕາງກຳລັງໃຫ້ຄວາມສົນໃຈກັບ ຊິຊາຣິໂຕ້ ແຕ່ກໍເຊື່ອວ່າຈະຕ້ອງເປັນເລື່ອງຍາກສຳລັບທັງສອງສະໂມສອນເພາະວ່າ ຊິຊາຣິໂຕ້ ມີຄ່າຈີກສັນຍາສູງເຖິງ 40.5 ລ້ານປອນ.

 

ຢ່າງໃດກໍຕາມຫຼ້າສຸດ “ອາສ” ສື່ກິລາຊື່ດັງຂອງແດນກະທິງລະບຸວ່າ “ເຈຍໃຫຍ່” ເອົາແທ້ກັບການລ່າໂຕອະດີດດາວຍິງຂອງ ແມນເຊສເຕີ ຢູໄນເຕັດ ແລະ ພ້ອມທຸ່ມເງິນຕາມຄ່າຈີກສັນຍາດັ່ງກ່າວຫຼັງຈາກທີ່ດາວເຕະທີມຊາດແມັກຊິໂກປ່ອຍຟອມເທບໄດ້ໃນລະດູການນີ້ ໂດຍຍິງໄປແລ້ວ 7 ເມັດຈາກການລົງຫຼິ້ນລວມທຸກລາຍການ 8 ນັດ.

 

ທັງນີ້ ເອນານເດດ ເຄີຍຫຼິ້ນທີ່ສະເປນມາແລ້ວກັບ ເຣອັນ ມາດຣິດ ເຊິ່ງເປັນການຫຼິ້ນແບບສັນຍາເຊົ່າໃນລະດູການ 2014-2015 ໂດຍຍິງໄປ 9 ລູກຈາກການລົງຫຼິ້ນທັງໝົດ 33 ນັດລວມທຸກລາຍການ.