ເອົາແຄມທາງເປັນບ່ອນຝາກລົດ ເປັນສາເຫດເຮັດໃຫ້ການສັນຈອນຕິດຂັດ

 

ສະພາບການສັນຈອນຢູ່ເຂດຕະຫຼາດຫົວຂົວ ເມືອງໄຊເສດຖາ ແມ່ນມີຄວາມຫຍຸ້ງຍາກຍ້ອນພາກສ່ວນທີ່ກ່ຽວຂ້ອງອະນຸຍາດໃຫ້ນຳໃຊ້ແຄມທາງເປັນບ່ອນບໍລິການຮັບຝາກລົດເຮັດໃຫ້ເສັ້ນທາງຄັບແຄບ, ການສັນຈອນແອອັດ ແລ້ວພາໃຫ້ສະພາບລົດຕິດຂັດຢູ່ເສັ້ນທາງດັ່ງກ່າວ. ຈາກບັນຫາທີ່ເກີດຂຶ້ນ ກອງຕໍາຫຼວດຈະລາຈອນ ປກສ ເມືອງໄຊເສດຖານະຄອນຫຼວງວຽງຈັນ ຈຶ່ງໄດ້ສະເໜີໃຫ້ພາກສ່ວນກ່ຽວຂ້ອງຍົກເລີກການສຳປະທານເອົາແຄມທາງເປັນບ່ອນບໍລິ ການຮັບຝາກລົດ ເພື່ອຈະເປັນການແກ້ໄຂບັນຫາດັ່ງກາວໃຫ້ໄດ້ຢ່າງຂາດຕົວ.

ພັທ ອໍາພອນ ຄໍາອຸ່ນທອນ ຫົວໜ້າກອງຕໍາຫຼວດຈະລາຈອນ ເມືອງໄຊເສດຖາ ໄດ້ໃຫ້ສຳພາດວ່າ: ຜ່ານມາ, ເຈົ້າໜ້າທີ່ຕໍາຫຼວດຈະລາຈອນ ເມືອງໄຊເສດຖາ ໄດ້ດຳເນີນການແກ້ໄຂການສັນຈອນຢູ່ເຂດດັ່ງກ່າວຢ່າງຈິງຈັງແຕ່ກໍຍັງບໍ່ສາ ມາດແກ້ໄຂໄດ້ຢ່າງສິ້ນເຊີງ ເນື່ອງຈາກວ່າພາກສ່ວນທີ່ກ່ຽວຂ້ອງໄດ້ອະນຸຍາດໃຫ້ນໍາໃຊ້ແຄມທາງເປັນບ່ອນບໍລິການ. ເພື່ອແກ້ໄຂສະພາບການສັນຈອນຕິດຂັດຢູ່ເສັ້ນທາງດັ່ງກ່າວພາກສ່ວນທີ່ກ່ຽວຂ້ອງກໍຄືພະແນກໂຍທາທິການ ແລະ ຂົນສົ່ງນະຄອນຫຼວງວຽງຈັນ, ຫ້ອງການຄຸ້ມຄອງ ແລະ ບໍລິຫານຕົວເມືອງຕ້ອງໄດ້ພ້ອມກັນຫາທາງແກ້ໄຂ ໂດຍສະ ເພາະອອກຂໍ້ຕົກລົງຍົກເລີກການສຳປະທານເອົາແຄມທາງຢູ່ເຂດດັ່ງກ່າວເປັນບ່ອນຝາກລົດ. ສະນັ້ນ, ກອງຕໍາຫຼວດຈະລາຈອນ ເມືອງໄຊເສດຖາ ໄດ້ສະເໜີໃນກອງປະຊຸມແກ້ໄຂຄວາມບໍ່ເປັນລະບຽບຮຽບຮ້ອຍຕາມສາຍທາງທີ່ໄດ້ຈັດຂຶ້ນໃນວັນທີ 24 ເມສາ 2018 ທີ່ພະແນກ ຍທຂ ນວ. ໂດຍສະເໜີໃຫ້ມີການຍົກເລີກການສຳປະທານເອົາແຄມທາງເປັນບ່ອນຝາກລົດນັບແຕ່ວັນທີ 1 ພຶດສະພາ 2018 ເປັນຕົ້ນໄປ ແລະ ກໍານົດໃຫ້ລົດໄປຈອດຢູ່ລານກົງກັນຂ້າມ ກັບຕະຫຼາດຫົວຂົວ, ສໍາລັບລໍ້ ແລະ ລົດຂາຍໝາກໄມ້ຢູ່ໜ້າໂຮງໝໍໃຫ້ໄປຂາຍຢູ່ຕະຫຼາດໂນນຄໍ້ ເພື່ອເຮັດໃຫ້ບັນຫາດັ່ງກ່າວມີຄວາມເປັນລະບຽບຮຽບຮ້ອຍ ແລະ ຈົບງາມ. ແຕ່ການສະເໜີດັ່ງ ກ່າວໃນທີ່ປະຊຸມຍັງບໍ່ມີຄວາມຊັດເຈນ ກ່ຽວກັບການແກ້ໄຂ ໂດຍມອບໃຫ້ເມືອງນໍາໄປປຶກສາຫາລື ແລະ ຈັດຕັ້ງປະຕິບັດ.


ທ່ານ ທອງຄໍາ ວົງໂພສີ ຮອງຫົວ ໜ້າຫ້ອງການຄຸ້ມຄອງ ແລະ ບໍລິຫານ ຕົວເມືອງ (ຄບຕ) ປະຈໍາເມືອງໄຊເສດຖາ ກ່າວວ່າ: ການຝາກລົດຢູ່ຈຸດດັ່ງ ກ່າວແມ່ນເຈົ້າເມືອງໄຊເສດຖາ ເປັນຜູ້ອະນຸຍາດ ໂດຍມອບໃຫ້ຫ້ອງການ ຄບຕ ຈັດຕັ້ງປະຕິບັດ. ສະນັ້ນ, ຫ້ອງການ ຄບຕ ໄດ້ສົມທົບກັບເຈົ້າຂອງຕະຫຼາດຈັດຫາຜູ້ປະກອບການມາເຮັດໜ້າທີ່ບໍລິ ການນັບແຕ່ເດືອນກໍລະກົດ 2017 ເປັນຕົ້ນມາຈຸດປະສົງເພື່ອຈັດສັນລົດເຂົ້າ-ອອກຕະຫຼາດໃຫ້ມີຄວາມເປັນລະ ບຽບຮຽບຮ້ອຍ. ໃນແຕ່ລະເດືອນຫ້ອງການ ຄບຕ ໄດ້ຮັບເງິນເດືອນລະ 800.000-1.000.000 ກີບ ເຊິ່ງເງິນດັ່ງກ່າວໄດ້ນໍາໃຊ້ເຂົ້າໃນວຽກງານບໍລິຫານຫ້ອງການເຊັ່ນ: ທໍາຄວາມສະອາດບໍລິເວນດັ່ງກ່າວ ແລະ ຊື້ອຸປະກອນຮັບໃຊ້ ໃນເວລາເມືອງອອກແຮງງານລວມ. ຕໍ່ກັບການຍົກເລີກຍັງບໍ່ທັນມີຄວາມຊັດເຈນເທື່ອ ໂດຍທາງເມືອງມີຄໍາສັ່ງໃຫ້ ດໍາເນີນການຕໍ່ຈົນກວ່າຈະມີກອງປະຊຸມປຶກສາຫາລືກັນຕໍ່ໄປ.

ພາບ-ຂ່າວ: ນສພ ຄວາມສະຫງົບ