ເອົາຮາຫວານິ!!ມູບອກປັອກບາຫຼິ້ນເຊັນເຕີໄດ້

 

ມູຣິນໂຢ ນາຍໃຫຍ່ ແມນເຊສເຕີ ຢູໄນເຕັດ ສ້າງຄວາມຮືຮາໃຫ້ກັບ ເດັກຜີ ອີກຮອບໜຶ່ງຫຼັງຈາກຊີ້ແນວທາງແກ້ບັນຫາເກມຮັບໂດຍການເລັງໃຊ້ ປໍ ປັອກບາ ກອງກາງທີມຊາດຝຣັ່ງ ຊີ້ນັກເຕະລາຍນີ້ມີດີທັງທັກສະ ແລະ ຮູບຮ່າງ ຊິ່ງເໝາະກັບການເປັນກອງຫຼັງຊັ້ນດີ.

 

ໂຊເຊ ມູຣິນໂຢ ຜູ້ຈັດການທີມຂອງ ແມນເຊສເຕີ ຢູໄນເຕັດ ສະໂມສອນຍັກໃຫຍ່ຂອງ ພຣີເມຍລີກ ເກີດແນວຄິດແຫວກແນວບອກ ປໍ ປັອກບາ ກອງກາງຄ່າໂຕແພງສາມາດທີ່ຈະຫຼິ້ນຕຳແໜ່ງເຊັນເຕີແບັກໄດ້ເພາະມີທັກສະ ແລະ ຮູບຮ່າງໃຫຍ່ເໝາະກັບຕຳແໜ່ງນີ້.

 

“ຜີສາດແດງ” ຕ້ອງພົບກັບວິກິດການໃນເກມຮັບຢ່າງໜັກຫຼັງຈາກທີ່ ເອຣິກ ໄບຢີ ກອງຫຼັງຟອມລະເບີດຂອງທີມໄດ້ຮັບບາດເຈັບໜັກທີ່ຫົວເຂົ່າໃນເກມເສຍໃຫ້ ເຊວຊີ 0-4 ເມື່ອວັນອາທິດທີ່ຜ່ານມາສົ່ງຜົນໃຫ້ມີໂອກາດເປັນໄປໄດ້ສູງທີ່ຕົ້ນສັງກັດຈະບໍ່ໄດ້ໃຊ້ງານນັກເຕະດົນເຖິງ 2 ເດືອນ.

 

ໃນສ່ວນການໃຊ້ ຄຣິສ ສະມອນລິງ ຄູ່ກັບ ດາເລ ບລິນ ເບິ່ງແລ້ວບໍ່ຄ່ອຍເໝາະສົມຫຼັງເກມຫຼ້າສຸດຖືກ ເຊວຊີ ສອນມວຍໄປແບບເລະເທະ ຂະນະທີ່ ມາກອສ ໂຣໂຮ ກໍບໍ່ແມ່ນຕົວເລືອກທີ່ ເຮຍມູ ຕ້ອງການໃຊ້ງານແຕ່ຢ່າງໃດກໍຕາມເວລານີ້ ເຮຍມູ ມີທາງເລືອກໃໝ່ແລ້ວນັ້ນກໍຄືການໃຊ້ງານ ປັອກບາ ມາຢືນເປັນກອງຫຼັງຕົວກາງ.

 

ມູຣິນໂຢ ໃຫ້ເຫດຜົນວ່າມິດຟິວຄ່າໂຕ 89 ລ້ານປອນມີຄຸນສົມບັດທັງດ້ານຮ່າງກາຍ ແລະ ຄວາມສາມາດທີ່ຈະເຮັດໜ້າທີ່ຄຸມແນວຮັບໄດ້ສະບາຍໆ “ເຂົາເປັນນັກເຕະຊັ້ນດີ ແລະ ຂ້ອຍຄິດວ່າເຂົາສາມາດເປັນເຊັນເຕີແບັກທີ່ເກັ່ງໄດ້ແນ່ນອນ ໂດຍຄຸນນະພາບໃນການຜ່ານບານ, ອ່ານເກມຂາດ, ຄວາມຄ່ອງໂຕທັງທີ່ຮ່າງກາຍໃຫຍ່ ແນ່ນອນວ່າເຂົາສາມາດເປັນກອງຫຼັງຕົວກາງທີ່ດີໄດ້”.