ເອັມບາຍ ນຽງ ຢັນຊັດເຈນຢູ່ກັບມິລານຕໍ່ໄປ

 

ເອັມບາຍ ນຽງ ດາວຍິງອະນາຄົດໄກຂອງ ເອຊີ ມິລານ ຢັນຕົນເອງບໍ່ເຄີຍເວົ້າເລື່ອງການຍ້າຍທີມ ຫຼື ເລື່ອງຕ້ອງການລາ “ຜີສາດແດງ-ດຳ” ລະບຸຊັດເຈນວ່າຢາກເຮັດວຽກຮ່ວມກັບ ວິນເຊັນໂຊ ມອນເຕວລາ ນາຍໃຫຍ່ຄົນໃໝ່ ແລະ ຫວັງຈະເຮັດທຸກຢ່າງໃຫ້ດີທັງໃນ ແລະ ນອກສະໜາມ.

 

ເອັມບາຍ ນຽງ ກອງໜ້າໄວລຸ້ນເລືອດຝຣັ່ງຂອງ ເອຊີ ມິລານ ສະໂມສອນດັງຂອງ ກັນໂຊ ຊີຣີ ອາ ເປີດໃຈວ່າ ຕົນບໍ່ເຄີຍເວົ້າເລື່ອງການຍ້າຍໜີຈາກ “ຜີສາດແດງ-ດຳ” ແລະ ຢືນຢັນວ່າຈະຢູ່ໃນຖິ່ນ ຊານ ຊີໂຣ ໃນລະດູການໜ້າຕໍ່ໄປ.

 

ຫົວຫອກອາຍຸ 21 ປີເຊິ່ງເຄີຍຕົກເປັນຂ່າວວ່າ ເລສເຕີ ຊີຕີ ທຸ່ມເງິນ 16 ລ້ານປອນເພື່ອດຶງໄປຮ່ວມທັບເມື່ອເດືອນມັງກອນທີ່ຜ່ານມາ ຕົກເປັນຂ່າວເລື່ອງການຍ້າຍໄປຫຼິ້ນໃນ ພຣີເມຍລີກ ມາຕະຫຼອດໃນຊ່ວງເດືອນມິຖຸນາທີ່ຜ່ານມາໂດຍນອກຈາກທັບ “ຈິງຈອກເງິນ” ແລ້ວຍັງມີ ເອເວີຕັນ ແລະ ເວສແຮມ ຢູໄນເຕັດ ທີ່ຈັບຕາອະນາຄົດຂອງ ນຽງ ແບບໃກ້ຊິດ.

 

ນຽງ ທີ່ຫາກໍລົງສະໜາມເກມອຸ່ນເຄື່ອງຊະນະ ບັອກໂດ 2-1 ເມື່ອວັນເສົາທີ່ຜ່ານມາຢືນຢັນວ່າຕ້ອງການເຮັດວຽກຮ່ວມກັບ ວິນເຊັນໂຊ ມອນເຕລລາ ນາຍໃຫຍ່ຄົນໃໝ່ຂອງທີມ “ຂ້ອຍບໍ່ເຄີຍລົມເລື່ອງຕະຫຼາດຊື້ຂາຍນັກເຕະ ແລະ ບໍ່ເຄີຍຄິດເລື່ອງການຍ້າຍທີມ ຂ້ອຍມີຄວາມສຸກກັບທີມ ແລະ ຈະຢູ່ກັບ ມິລານ ຕໍ່ໄປ”.

 

“ຂ້ອຍຢາກເປັນນັກເຕະຄົນສຳຄັນຂອງທີມຕັ້ງແຕ່ມື້ທຳອິດທີ່ຂ້ອຍກັບມາ ຂ້ອຍໄດ້ເຮັດຫຍັງຫຼາຍໆຢ່າງກັບຜູ້ຈັດການທີມ ຕອນນີ້ຂ້ອຍຮູ້ເຖິງເລື່ອງທີ່ຂ້ອຍຕ້ອງເຮັດຖ້າຂ້ອຍຢາກຈະເປັນແຊມ ຂ້ອຍຕັ້ງໃຈຟັງສິ່ງທີ່ຜູ້ຈັດການແນະນຳ ຂ້ອຍຕ້ອງການເຮັດສິ່ງດີໆທັງໃນ ແລະ ນອກສະໜາມ” ນຽງ ລະບຸ.