ເອັນຣິເກ້ ບໍ່ໝັ້ນໃຈວ່າ ຣາຄີຕິດ ຈະສົມບູນທັນ ເອວ ກລາສິໂກ້ ຫຼື ບໍ່

ຫຼຸຍ ເອັນຣິເກ້ ນາຍໃຫຍ່ຂອງ ບາເຊໂລນາ ບໍ່ແນ່ໃຈວ່າ ອິວານ ຣາຄີຕິດ ຫ້ອງເຄື່ອງໂຕເກັ່ງຂອງທີມ ຈະສົມບູນທັນກັບມາຊ່ວຍທີມນັດພົບກັບ ເຣອັນ ມາດຣິດ ປາຍເດືອນພະຈິກນີ້ ຫຼື ບໍ່ ຫຼັງຈາກທີ່ມີອາການເຈັບນ່ອງຈາກນັດທີ່ພົບກັບ ບາເຕ້ ເກມແຊມປຽນລີກ ວັນພຸດທີ່ຜ່ານມາ ຊີ້ແຈງຂຶ້ນຢູ່ກັບນັກເຕະ ແລະ ແພດ.

ຫຼຸຍ ເອັນຣິເກ້ ນາຍໃຫຍ່ ບາເຊໂລນາ ສະໂມສອນຍັກໃຫຍ່ຈາກ ລາ ລີກາ ສະເປນ ຍອມຮັບວ່າ ບໍ່ແນ່ໃຈວ່າ ອິວານ ຣາຄີຕິດ ກອງກາງຂອງທີມຈະສົມບູນກັບມາລົງຫຼິ້ນໃຫ້ກັບຕົ້ນສັງກັດໃນລີກນັດ “ເອວ ກລາຊິໂກ້” ທີ່ຈະບຸກໄປຢາມ ເຣອັນ ມາດຣິດ ທີ່ ຊານດິເອໂກ້ ເບີນາເບວ ວັນເສົາທີ 21 ພະຈິກນີ້ ຫຼື ບໍ່ ຫຼັງຈາກນັກເຕະໄດ້ຮັບອາການບາດເຈັບກ້າມຊີ້ນນ່ອງຂວາຈີກ ຈາກເກມທີ່ພົບ ບາເຕ້ ໃນລາຍການ ແຊມປຽນລີກ ຮອບແບ່ງກຸ່ມ ອີ ນັດທີ 4 ທີ່ສະໜາມ ແຄັມນູ ເມື່ອວັນພຸດທີ 4 ພະຈິກທີ່ຜ່ານມາ.

“ບໍ່ວ່ານັກເຕະຄົນໃດໄດ້ຮັບບາດເຈັບເປັນເລື່ອງທີ່ໜ້າຜິດຫວັງສະເໝີ ເຮົາບໍ່ມີໂຊກເລີຍ ເຮົາຕ້ອງມີບັນຫາອາການບາດເຈັບແບບບໍ່ຢຸດ ຂ້ອຍບໍ່ຮູ້ວ່າ ຣາຄີຕິດ ຈະໄດ້ຫຼິ້ນໃນ ເອວ ກລາສິໂກ້ ຫຼື ບໍ່ ມັນຂຶ້ນຢູ່ກັບນາຍແພດ ແລະ ນັກເຕະ ແຕ່ໃນເວລານີ້  ເຂົາໝົດສິດທີ່ຈະຫຼິ້ນໃນເກມຕໍ່ໄປແນ່ນອນ ເກມນີ້ມີຫຍັງດີໆຫຼາຍຢ່າງເພາະການເກັບໄຊຊະນະໃນລາຍການ ຢູຟາ ບໍ່ແມ່ນເລື່ອງງ່າຍ ສ່ວນເລື່ອງທີ່ບໍ່ດີຄືເລື່ອງຂອງ ຣາຄີຕິດ”

ບາເຊໂລນາ ເປັນຈ່າຝູງໃນຕາຕາລາງຄະແນນກຸ່ມ ອີ ມີ 10 ຄະແນນຈາກ 4 ເກມ ແລະ ຈະຜ່ານເຂົ້າຮອບ 16 ທີມສຸດທ້າຍທັນທີຖ້າວ່າເອົາຊະນະ ໂຣມາ ໃນເກມຖັດໄປໄດ້ເຊິ່ງ ເອັນຣິເກ້ ເປີດເຜີຍວ່າຕ້ອງການທີ່ຈະຈົບອັນດັບ 1 ຂອງກຸ່ມ ອີ ໃຫ້ໄດ້ “ເຮົາຕ້ອງຈົບໂດຍການເປັນອັນດັບ 1 ຂອງ ກຸ່ມ, ເຮົາຕ້ອງຊະນະ ໂຣມາໃຫ້ໄດ້ ແລະ ຜ່ານເຂົ້າຮອບ 16 ທີມສຸດທ້າຍຕໍ່ໄປ” ເອັນຣິເກ້ ກ່າວ.

.......................................................................................................................................................................

ບົດຄວາມໃຫມ່ໆ