ເອສຊີຈີ ສະໜັບສະໜູນ ທຶນການສຶກສາ ໃນລາວ

​ໃນ​ວັນ​ທີ 2 ຕຸລາ 2015 ​ຄະນະ​ກຳມະການ ​ເອ​ສຊີ​ຈີ (SCG ) ​ໄດ້ລົງ​ຢ້ຽມຢຽມ ​ນັກ​ຮຽນ ທີ່​ສົ່ງ​ບົດ​ຄວາມ​ເຂົ້າ​ແຂ່ງຂັນ ຮອບ​ຄັດ​ເລືອກ ຊິງ​ທຶນ​ການ​ສຶກສາ ຈາກ​ໂຄງການ ແບ່ງປັນ​ຄວາມ​ຝັນ​ກັບ SCG sharing the Dream ຄັ້ງ​ທີ 4, ​ທີ່ ​ໂຮງຮຽນ ມສ ນາ​ຊາຍ​ທອງ ​ເຊິ່ງ​ເປັນ​ໂຄງການ​ຕໍ່​ເນື່ອງ ​ໃນ​ການ​ຊ່ວຍ​ເຫ​ລື​ອ​ທຶນ​ການ​ສຶກສາ ສຳລັບນັກ​ຮຽນ ທີ່​ມີ​ຄວາມ​ກະຕັນຍູ ​ແລະ ຕັ້ງ​ໃຈຮຽນ ​ແຕ່​ຄອບຄົວ​ທຸກ​ຍາກ​ຂາດ​ເຂີນ  ບໍ່​ມີ​ທຶນຮອນ​ສຶກສາ​ຮ່ຳຮຽນຕໍ່ ສະ​ເພາະ​ປີ​ນີ້ ເອ​ສຊີ​ຈີ ຈະ​ມອບ​ທຶນ​ໃຫ້​ນັກຮຽນທັງໝົດ 230 ທຶນ ​ໃນ​ນັ້ນ​ນະຄອນຫລວງ​ວຽງຈັນ ມີ​ຈຳນວນ 150 ທຶນ ​ແລະ ​ແຂວງ​ຄຳ​ມວນ 80 ທຶນ ​ໃນ​ສົກ​ປີ 2015-2016 ​ເຊິ່ງໄດ້​​ເພີ່ມ​ຈາກ​ປີຜ່ານມາ 30 ທຶນ.

ນາງ ​ແສງ​ຈັນ ​ໄຊ​ຍະ​ທຳ​ມະ​ວົງ ອາຍຸ 16 ປີ ຊັ້ນ ມ 6/3 ​ເປັນອີກ​ນ້ອງໜຶ່ງ ທີ່​ໄດ້​ເຂົ້າ​ຮ່ວມ​ກິດ​ຈະ​ກຳ​ດີໆ ຈາກ​ໂຄງການ​  ​​ໂດຍໄດ້​ຂຽນບົດ​ຄວາມ ສົ່ງ​ເຂົ້າ​ປະ​ກວດ​ໃນ​ຫົວ​ຂໍ້ ຄອບ​ຄົວ​ໃນ​ຝັນ​ຂອງ​ຂ້ອຍ ນ້ອງ​ແສງ​ຈັນ ​ເປັນ​ນັກ​ຮຽນດີຮຽນ​ເກັ່ງ, ​ເອົາ​ໃຈ​ໃສ່​ໃນ​ການ​ຮ່ຳຮຽນ ປະຕິບັດ​ກົດ​ລະບຽບ, ​ ​ຢ່າງ​ເຂັ້ມງວດ ​ໂດຍ​ສະ​ເພາະ​ ການ​ເຄ່ືອ​ນ​ໄຫວ​ນອກ​ຫລັກ​ສູດ ຖື​ວ່າ​ເປັນ​ຄົນ​ທີ່​ມີ​ຄວາມ​ຫ້າວຫັນ  ​ແຕ່​ຍ້ອນ​ສະພາບ​ຄອບຄົວ ຍັງ​ຂາດ​​ເຂີນທຶນ​ຮອນ ​​ເຂົ້າໃນ​ການ​ສຶກສາຮ່ຳຮຽນ ​ຈຶ່ງ​ໄດ້​ເຂົ້າ​ຮ່ວມ​ໂຄງການ ​ເພື່ອ​ຢາກ​ຫລຸດຜ່ອນ​ຄ່າ​ໃຊ້​ຈ່າຍ ​ຂອງພໍ່ແມ່ ສະ​ນັ້ນ, ໂຄງການ ​ ແບ່ງປັນ​ຄວາມ​ຝັນ​ກັບ SCG ມີ​ຄວາມ​ມຸ່ງໝັ້ນຢາກ​ຈະ​ສານ​ຕໍ່​ຄວາມ​ຝັນ ​ໃຫ້​ນ້ອງນັກຮຽນ ມ5-ມ7  ​ຜູ້​ທີ່ມີ​ຄວາມ ​ຕ້​​ອງການ​​ຮຽນຈົບ ​ມັດທະຍົມ​ປາຍ ​ແລະ ສືບ​ຕໍ່​ຮຽນວິ​ຊາ​ຊີບ​ຕໍ່​ໄປ.

ທ່ານ ພອນ​ສະ​ເຫລີ​ມ ຂຸດ​ທະ​ກະ​ພັນ ຜູ້​ບໍລິຫານ SCG ​ໄດ້​ເປີດ​ເຜີຍ​ວ່າ: SCG ມີ​ຄວາມ​ຕັ້ງ​ໃຈ ທີ່​ຈະສົ່ງ​ເສີມ ໃຫ້​ນັກຮຽນມັດທະຍົມ​ປາຍ ​ໃນສປປ ລາວ​​ ໃຫ້ມີ​ໂອກາດ​ເຂົ້າ​ເຖິງ​ ການ​ສຶກສາຫລາຍ​ຂຶ້ນ ​​ແລະ ຮູ້ສຶກ​ພາກພູມ​ໃຈ​ທີ່ ​​ເປັນສ່ວນໜຶ່ງທີ່​ຊ່ວຍ​ພັດທະນາ ວຽກງານ​ການ​ສຶກສາ​ໃນ​ລາວ ​ແລະ ​ໃນ​ອະນາ​ຄົດ ຈະ​ມອບ​ທຶນ​ສຶກສາ ​ເພີ້​ມຂຶ້ນ ຫລາຍ​ກວ່າ​ເກົ່າ ​ໃນ​ສົກຮຽນຕໍ່​ໄປ ​.