ເອວກລາສິໂກນອກສະໜາມ!! ບາຊາ-ມາດຣິດ ເລັງຍາດມາຊີຢານຈາກຜີ

 

ອອງໂຕນີ ມາຊີຢານ ຫົວຫອກຂອງ ແມນເຊສເຕີ ຢູໄນເຕັດ ເນື້ອຫອມສົມຄວນເມື່ອ 2 ຂາໃຫຍ່ຂອງສະເປນຄື ບາເຊໂລນາ ແລະ ເຣອັນ ມາດຣິດ ສົນໃຈຢາກດຶງໄປຮ່ວມທີມຄາດວ່າຄ່າຕົວອາດຈະສູງເຖິງ 60 ລ້ານປອນ.

 

ບາເຊໂລນາ ແລະ ເຣອັນ ມາດຣິດ 2 ຍັກໃຫຍ່ ລາ ລີກາ ສະເປນ ກຽມເຮັດເສິກ ເອວ ກລາສິໂກ ນອກສະໜາມເມື່ອຕາງກໍໝາຍຕາຢາກໄດ້ ອອງໂຕນີ ມາຊີຢານ ກອງໜ້າດາວລຸ້ງຂອງ ແມນເຊສເຕີ ຢູໄນເຕັດ ມາເສີມທັບຈາກການລາຍງານຂອງ ເດິ ຊັນ ສື່ຊື່ດັງຂອງເມືອງຜູ້ດີເມື່ອວັນອາທິດທີ່ຜ່ານມາ.

 

ຫົວຫອກທີມຊາດຝຣັ່ງຍ້າຍຈາກ ອາແອສ ໂມນາໂກ ມາຫຼິ້ນໃນ ໂອນ ທຣາຟເຟິດ ດ້ວຍຄ່າໂຕມະຫາສານຕັ້ງແຕ່ໜ້າຮ້ອນປີກ່ອນ ແລະ ເຮັດຜົນງານໄດ້ດີໂດຍການຍິງໄປ 17 ປະຕູໃນທຸກລາຍການ ແລະ ເປັນດາວຍິງສູງສຸດຂອງສະໂມສອນເມື່ອລະດູການທີ່ຜ່ານມາ.

 

ຢ່າງໃດກໍຕາມລະດູການນີ້ເຂົາໄດ້ລົງຕົວຈິງບໍ່ສະໝຳ່ສະເໝີໃນຍຸກຂອງ ໂຊເຊ ມູຣິນໂຢ ຂະນະທີ່ຍິງໄດ້ພຽງ 4 ລຸກຈາກ 16 ນັດໂດຍ 2 ລູກໃນນັ້ນມາຈາກເກມທະລົ່ມ ເວສແຮມ ຢູໄນເຕັດ 4-1 ໃນລາຍການ ອີເອຟແອວ ຄັບ ເມື່ອກາງອາທິດຜ່ານມາ.

 

ຈາກສະຖານະການດັ່ງກ່າວເຮັດໃຫ້ ບາຊາ ກັບ ເຣອັນ ມາດຣິດ ພ້ອມທຸ່ມຂໍ້ສະເໜີດຶງດາວຍິງ 20 ປີທີ່ຄາດວ່າມີຄ່າຫົວປະມານ 60 ລ້ານປອນໂດຍ “ລາຊາຊຸດຂາວ” ຖືກຍົກໃຫ້ເປັນຕົວເຕັງທີ່ຈະໄດ້ໂຕເນື່ອງຈາກວ່າກໍາລັງເບິ່ງແຄ່ງຊັ້ນນໍາເຂົ້າມາແທນ ຮາເມສ ໂຣດຣິເກດ ເພເມກເກີໜ້າໃສທີ່ບໍ່ມີຄວາມສຸກກັບການເປັນສຳຮອງໃນຖິ່ນ ຊານດີເອໂກ ເບີນາເບວ ຂະນະທີ່ “ຜີສາດແດງ” ຕົກເປັນຂ່າວສົນໃຈຢາກໄດ້ສະຕາທີມຊາດໂຄລຳເບຍເຊັ່ນກັນ.

 

ບົດຄວາມໃຫມ່ໆ