ເອຟເອເປີດສາກສືບເລື່ອງລະເມີດທາງເພດນັກເຕະ

 

ເອຟເອ ຖະແຫຼງດຳເນີນການສອບສວນເລື່ອງການລ່ວງລະເມີດທາງເພດສຳພັນນັກເຕະທີ່ເກີດຂຶ້ນມາຕະຫຼອດຫຼາຍ 10 ປີທີ່ຜ່ານມາ ຫຼັງຈາກທີ່ມີນັກເຕະຫຼາຍຄົນເຄີຍຖືກະທຳມາຕັ້ງແຕ່ຍັງເປັນນັກເຕະເຍົາວະຊົນແລ້ວ ຢັນຈະຊ່ວຍຕຳຫຼວດສືບສວນຫາຂໍ້ເທັດຈິງໃນເລື່ອງນີ້ແນ່ນອນ.

 

ສະມາຄົມບານເຕະອັງກິດ ຫຼື ເອຟເອ ອອກຖະແຫຼງການຢືນຢັນເມື່ອວັນອາທິດທີ່ຜ່ານມາວ່າ ກຽມດຳເນີນການສືບສວນຢ່າງຈິງຈັງເຖິງກໍລະນີການລ່ວງລະເມີດທາງເພດນັກເຕະອາຍຸນ້ອຍທີ່ເກີດຂຶ້ນໃນວົງການລູກໜັງແດນຜູ້ດີຕະຫຼອດຫຼາຍ 10 ປີທີ່ຜ່ານມາ.

 

ກ່ອນໜ້ານີ້ມີອະດີດນັກເຕະຫຼາຍຄົນອອກມາເຜີຍອະດີດທີ່ໂຫດຮ້າຍວ່າເຄີຍປະສົບກັບເຫດການດັ່ງກ່າວສະໄໝຍັງເປັນນັກເຕະດາວລຸ້ງ ໂດຍສະມາຄົມປ້ອງກັນການໃຊ້ຄວາມຮຸນແຮງຕໍ່ເດັກນາໆຊາດ (ເອັນເອສພີຊີຊີ) ໄດ້ຮັບໂທລະສັບສາຍດ່ວນຈາກເລື່ອງດັ່ງກ່າວກວ່າ 100 ຄັ້ງແລ້ວ.

 

ຖະແຫຼງການຂອງ ເອຟເອ ລະບຸວ່າ “ເຮົາກຳລັງເຮັດວຽກຢ່າງໃກ້ຊິດກັບເຈົ້າໜ້າທີ່ເພື່ອສະໜັບສະໜູນການສືບສວນໃນເລື່ອງດັ່ງກ່າວ ແລະ ໝັ້ນໃຈໄດ້ເລີຍວ່າເຮົາຈະບໍ່ເຮັດຫຍັງທີ່ຈະແຊກແຊງ ຫຼື ສົ່ງຜົນຕໍ່ຂະບວນການທາງອາຍາເດັດຂາດ”.

 

ນອກຈາກນີ້ ເອຟເອ ຍັງແຕ່ງຕັ້ງ ເຄດ ເກົາລາເຟັນ ທີ່ປຶກສາອິສະຫຼະຊັ້ນນຳ ມາຊ່ວຍກວດສອບໃນເລື່ອງດັ່ງກ່າວນຳ ພ້ອມກັບຈະດຳເນີນການກວດສອບພາຍໃນອີກວ່າມີຂໍ້ມູນໃດທີ່ກ່ຽວຂ້ອງ ຫຼື ພໍເປັນຫຼັກຖານໃນຊ່ວງດັ່ງກ່າວໄດ້ແນ່ ຂະນະທີ່ແຕ່ລະສະໂມສອນທີ່ຖືກພາດພິງມິປະຕິກິລິຍາ ຫຼື ດຳເນີນການໃນເລື່ອງດັ່ງກ່າວແບບໃດ.

 

ດ້ານໜ່ວຍງານຄຸ້ມຄອງເດັກໃນວົງການກິລາທີ່ໄດ້ຮັບການຊ່ວຍເຫຼືອຈາກ ເອຟເອ ໃນການພະຍາຍາມປ້ອງກັນເລື່ອງດັ່ງກ່າວມາຕັ້ງແຕ່ປີ 2000 ກໍຈະດຳເນີນການສືບສວນການປະຕິບັດງານຂອງ ເອຟເອ ຄວບຄູ່ກັນໄປນຳ.