ເອຟຣາ ເປີດເຜີຍ ຍັງບໍ່ຢາກເວົ້າເລື່ອງທີ່ເຂົາຕ້ອງຍ້າຍອອກມາຈາກ ແມນຢູ

ພາທຣິສ ເອຟຣາ ແບັກຊ້າຍໂຕເກົ໋າຂອງ ຢູເວັນຕຸດ ເປີດເຜີຍ ເຖິງວ່າຈະຜ່ານມາດົນເປັນປີ ແຕ່ກໍຍັງບໍ່ຢາກເວົ້າເຖິງເລື່ອງທີ່ຕ້ອງຍ້າຍຈາກ ແມນເຊສເຕີ້ ຢູໄນເຕັດ ມາຫຼິ້ນໃນ ຕູຣິນ ທັງທີ່ຕອນນັ້ນເຊັນສັນຍາໃໝ່ 1 ປີ ກັບທີມໄປແລ້ວ ໂດຍບອກພຽງແຕ່ວ່າ ມີການປ່ອນເງື່ອນໄຂບາງຢ່າງລົງໃນສັນຍາທີ່ເຮັດໃຫ້ຮູ້ສຶກອຶດອັດ ແລະ ເລືອກມາຫຼິ້ນໃນ ອີຕາລີ ເພື່ອຄອບຄົວ.

ພາທຣິສ ເອຟຣາ ແບັກຊ້າຍຈອມບຸກຂອງ ຢູເວັນຕຸດ ຍັກໃຫຍ່ຈາກ ກັນໂຊ ຊີຣີ ອາ ອີຕາລີ ຍອມຮັບວ່າຕອນນີ້ເປັນເລື່ອງຍາກທີ່ຈະເວົ້າເຖິງເລື່ອງທີ່ເຂົາຕ້ອງຍ້າຍອອກຈາກ ແມນເຊສເຕີ້ ຢູໄນເຕັດ ທີມໃນດວງໃຈແຫ່ງເສິກ ພຣີເມຍລີກ ອັງກິດ ມາຫຼິ້ນຢູ່ໃນ ຢູເວັນຕຸດ ສະເຕດ້ຽມ ເມື່ອປີ 2014 ໂດຍຫວັງວ່າຈະເວົ້າຫຍັງໄດ້ຫຼາຍກວ່ານີ້ເມື່ອຍຸຕິອາຊີບໄປແລ້ວ.

ແບັກຊ້າຍທີມຊາດ ຝຣັ່ງ ຍຸຕິການຫຼິ້ນ 8 ປີກັບ “ຜີສາດແດງ” ແລະ ມາຫຼິ້ນໃຫ້ກັບ “ບຽງໂຄເນຣີ” ເມື່ອປີທີ່ຜ່ານມາ ທັງທີ່ສອງເດືອນກ່ອນການຍ້າຍທີມ ເຂົາຫາກໍເຊັນສັນຍາໃໝ່ 1 ປີ ໂດຍທີ່ມີຂ່າວລືວ່າ ເອຟຣາ ຍ້າຍທີມເພາະມີບັນຫາກັບ ຫຼຸຍ ຟານກາວ ຜູ້ຈັດການທີມຊາດ ໂຮນລັງ ແລະ ລ່າສຸດຈາກປາກຄຳຂອງ ເອຟຣາ ເຂົາບອກວ່າໜຶ່ງໃນສາເຫດທີ່ບີບໃຫ້ມີການຍ້າຍທີມຄື “ເງື່ອນໄຂ” ທີ່ປ່ອນເຂົ້າມາໃນສັນຍາຂອງເຂົາ.

ເອຟຣາ ກ່າວກັບ “ອາເອັມຊີ” ສື່ຈາກແດນນໍ້າຫອມວ່າ “ທຸກມື້ນີ້ຂ້ອຍຍັງບໍ່ຢາກເວົ້າເຖິງເລື່ອງການຍ້າຍທີມອອກມາ ແຕ່ມື້ໜຶ່ງເມື່ອຂ້ອຍເຊົາຫຼິ້ນແລ້ວ ຂ້ອຍຈະເວົ້າເຖິງເລື່ອງນີ້ຂຶ້ນມາ ຂ້ອຍມາ ຕູຣິນ ເພື່ອຄອບຄົວ ເພາະທີ່ ແມນເຊສເຕີ ຢູໄນເຕັດ ພວກເຂົາໃສ່ເງື່ອນໄຂເຂົ້າໄປໃນຂໍ້ຕົກລົງ ທີ່ເຮັດໃຫ້ສະຖານະການປ່ຽນແປງ ມັນກວນໃຈຂ້ອຍຫຼາຍໆ”

ເມື່ອລະດູການທີ່ຜ່ານມາ ເອຟຣາ ຊ່ວຍໃຫ້ “ບຽງໂຄເນຣີ” ໄດ້ແຊ້ມ ກັນໂຊ ຊີຣີ ອາ ກັບ ໂຄປາ ອີຕາເລຍ ລວມເຖິງການຜ່ານເຂົ້າຮອບຊິງຊະນະເລີດ ຢູຟາ ແຊມປ້ຽນລີກ ແຕ່ເສຍໃຫ້ກັບ ບາເຊໂລນາ 1-3.

.......................................................................................................................................................................