ເອກະຊົນລາວຈົກຖົງຕົນເອງສ້າງແຫລ່ງທ່ອງທ່ຽວຫາດດອນຈັນເພື່ອຕ້ອນຮັບປີໃໝ່ລາວ

ເອກະຊົນລາວໂດຍກຸ່ມບໍລິສັດຊີເອັນຟີຮ່ວມກັບພະແນກຖະແຫລງຂ່າວ ວັດທະນະທໍາ ແລະ ທ່ອງທ່ຽວນະຄອນຫລວງຈັນພັດທະນາສະຖານທີ່ທ່ອງທ່ຽວຫາດດອນຈັນເພື່ອຫວັງດຶງດູດມວນຊົນທັງພາຍໃນ ແລະ ຕ່າງປະເທດເຂົ້າທ່ຽວຊົມໃນໄລຍະປີໃໝ່ລາວນີ້ ຂະນະທີ່ ນະຄອນຫລວງວຽງຈັນເຊື່ອວ່ານີ້ຈະເປັນພັກຜ່ອນທີ່ໜ້າສົນໃຈສໍາແຂກທັງພາຍໃນ ແລະ ຕ່າງປະເທດ ທັງຈະເປັນການຊ່ວຍຫລຸດອຸບັດຕິເຫດບົນທ້ອງຖະໜົນ. 
ທ່ານ ນາງ ຈັນນະພາ ວົງສະນໍຣະພູມ ປະທານກຸ່ມບໍລິສັດຊີເອັນຟີ (CNP) ຂາເຂົ້າ-ຂາອອກຈໍາກັດໄດ້ໃຫ້ສໍາພາດສື່ມວນຊົນອາທິດຜ່ານມານີ້ວ່າ: ຕົນເອງມີຄວາມຮູ້ດີໃຈ ແລະ ສະແດງຄວາມຮູ້ບຸນຄຸນຕໍ່ການນໍາພັກ-ລັດໂດຍສະເພາະນະຄອນຫລວງວຽງຈັນທີ່ໂອກາດໄດ້ເຂົ້າມາພັດທະນາເຂດດັ່ງກ່າວເປັນປີທີ 2 ເພື່ອກະກຽມສະຖານທີ່ສະເຫລີມສະຫລອງສົ່ງທ້າຍປີເກົ່າ ພສ 2559 ແລະ ຕ້ອນຮັບປີໃໝ່ລາວ ພສ 2560 ໃຫ້ມີບັນຍາກາດຟົດຟື້ນເບີກບານມ່ວນຊື່ນໂດຍບໍລິສັດຂອງຕົນໄດ້ລົງທຶນເພື່ອພັດທະນາເຂດດັ່ງກ່າວໃຫ້ການເປັນສະຖານທີ່ໜ້າທ່ຽວຊົມເພື່ອດຶງດູດນັກທ່ອງທ່ຽວພາຍໃນ ແລະ ຕ່າງປະເທດ ທັງເປັນການສົ່ງເສີມ ແລະ ຮັກສາຮີດຄອງປະເພນີອັນດີງາມ ສ່ວນກິດຈະກໍາປະຕິມະກໍາຊາຍຢູ່ຫາດດອນຈັນທີ່ເຄີຍມີມາແຕ່ລະປີນັ້ນຈະບໍ່ມີປີນີ້ເພາະຫ້າງຫາກະກຽມບໍ່ທັນ.
ທ່ານ ປະທານກຸ່ມບໍລິສັດຊີເອັນຟີ (CNP)ຍັງໄດ້ຕື່ມອີກວ່າ ພາຍຫລັງໄດ້ຮັບອະນຸຍາດຈາກນະຄອນຫລວງວຽງຈັນ, ບໍລິສັດຂອງຕົນກໍໄດ້ເລີ່ມລົງມືປະຕິບັດຢ່າງຮີບດ່ວນ ເພື່ອສ້າງເປັນຈຸດດຶງດູດເຮັດໃຫ້ນັກທ່ອງທ່ຽວໄດ້ມີໂອກາດເຂົ້າມາສໍາຜັດ ແລະ ຜັກຜ່ອນຄາຍຄວາມຮ້ອນ ເຊິ່ງພວກເຮົາຈະເລີ່ມເປີດໃຫ້ບໍລິການນັບແຕ່ວັນທີ 13-16 ເມສາ 2017 ນີ້. ບໍລິສັດຂອງຕົນໄດ້ລົງທຶນຫລາຍກວ່າ 1 ຕື້ກີບ ໃນ ດຸດທາງເຂົ້າສະຖານທີ່, ສ້າງຕູບຊົງລາວໃຫ້ແຂກນັ່ງຫລິ້ນ 100 ຫລັງ, ສ້າງອ່າງ-ປະຕູນໍ້າພຸ, ຈັດສັນສິ່ງອໍານວຍສະດວກແຄມຫາດຊາຍ, ວາງເຂດປ້ອງກັນ, ຈຸດຖ່າຍຮູບ ພ້ອມນີ້ຍັງຈະມີການແຂ່ງຂັນກິລາຕົບພະຊາຍ (ຜູ້ຊະນະຈະໄດ້ຮັບເງິນ 5 ລ້ານກີບ), ການແຂ່ງຂັນກິລາປະເພດຕີໄກ່, ມວຍ, ກະຕໍ້, ການສະແດງສິລະປະ ແລະ ອື່ນໆ.
ພິເສດປີນີ້ ທາງບໍລິສັດຈະໄດ້ເອົາໃຈໃສ່ບັນຫາສິ່ງແວດລ້ອມ ແລະ ຄວາມປອດໄພເປັນພິເສດ ເຊິ່ງຈະໄດ້ວາງກະຕ່າຂີ້ເຫຍື້ອປະມານ 100 ຈຸດເພື່ອຮອງຮັບບັນຫາຂີ້ເຫຍື້ອ ແລະ ສິ່ງເສດເຫລືອບໍ່ໃຫ້ຕົກເຮ່ຍຊະຊາຍ ຫລື ໄຫລໄປນໍາ, ຈັດໜ່ວຍງານຮັກສາຄວາມປອດໄພ ແລະ ພະນັກງານອະນາໄມຕິດຕາມະສພາບໄປພ້ອມໆກັນ. 
ຫວ່າງບໍ່ດົນມານີ້ ນະຄອນຫລວງວຽງຈັນກໍໄດ້ເປີດເຜີຍວ່າ: ການຈັດກິດຈະກໍາຢູ່ຫາດດອນຈັນແມ່ນໜຶ່ງໃນຫລາຍມາດຕະການເພື່ອຫລຸດຜ່ອນອຸບັດຕິເຫດບົນທອ້ງຖະໜົນໂດຍສະເພາະຫລຸດຜ່ອນບໍ່ໃຫ້ມວນຊົນດື່ມສິ່ງມືນເມົາຕາມແຄມທາງ ແລະ ຂັບຂີ້ລົດ ເຊິ່ງຈະມີຄວາມສ່ຽງກໍໃຫ້ເກີດອຸບັດຕິເຫດ.

ທີ່ມາ: ປະເທດລາວ Pathedlao