ເຫມາະສົມຫລືບໍ່! ໄອເຕັກປະກາດເກັບຄ່າຝາກລົດທຸກປະເພດ

ຫລັງຈາກທີ່ພົບເຫັນປ້າຍປະກາດຢູ່ທີ່ສູນການຄ້າໄອເຕັກມໍ ວ່າຈະມີການເກັບຄ່າບໍລິການຝາກລົດທຸກປະເພດ ນັບຕັ້ງແຕ່ວັນທີ 4 ກໍລະກົດເປັນຕົ້ນໄປ ເຮັດໃຫ້ຫລາຍຄົນມີຄຳເຫັນວ່າ ບໍ່ເຫມາະສົມພໍປານໃດ ເພາະສູນການຄ້າໄອເຕັກມໍຫາກໍເປີດໃຫມ່ ແລະເປັນພຽງສູນການຄ້າບໍ່ພໍເທົ່າໃດແຫ່ງໃນລາວທີ່ໄລຍະຜ່ານມາບໍ່ເກັບຄ່າຝາກລົດໃຫຍ່ ເຊິ່ງກໍຖືວ່າເປັນຈຸດດີອີກຢ່າງຫນຶ່ງ. ແຕ່ພໍປະກາດນີ້ອອກມາເຮັດໃຫ້ຫລາຍຄົນລົງຄຳເຫັນວ່າ ເປັນການຂັບໄລ່ລູກຄ້າແບບທາງອ້ອມ ເພາະການເປີດບໍລິການສູນການຄ້າແມ່ນໃຫ້ລູກຄ້າໄປຈັບຈ່າຍຊື່ຂາຍແມ່ນບໍ່ຈຳເປັນຕ້ອງເສຍຄ່າຝາກລົດ (ເພາະໄດ້ຮັບກຳໄລຈາກການຂາຍສິນຄ້າແລ້ວ) ດັ່ງເຊັ່ນປະເທດເພື່ອນບ້ານກໍບໍ່ໄດ້ມີຄ່າບໍລິການຈຸດນີ້. ແຕ່ກໍມີບາງຄວາມເຫັນບອກວ່າເປັນການເຫມາະສົມແລ້ວເພາະແຕ່ໃດມາກໍພາກັນເສຍຄ່າຝາກລົດຈັກເປັນເລື່ອງປົກກະຕິ ແລະທາງຜູ້ຮັບຜິດຊອບຄົງຈະນຳເອົາລາຍຮັບຈາກການບໍລິການດັ່ງກ່າວໄປບູລະນະສະຖານທີ່.