ເຫດການໜ້າເສົ້າກ່ອນເຖິງວັນຄູ ເຫັນພາບແລ້ວອົດກັ້ນນໍ້າຕາບໍ່ໄດ້

  

    ກ່ອນຈະເຂົ້າສູ່ງານວັນຄູແຫ່ງຊາດໃນແຕ່ລະປີ ແຕ່ລະໂຮງຮຽນກໍຕ່າງພາກັນຫ້າງຫາກະກຽມເພື່ອຈັດກິດຈະກຳວັນຄູ ລວມທັງຜູ້ເປັນລູກສິດກໍກະກຽມໃນການອວຍພອນຄູ ແຕ່ສໍາຫຼັບໂຮງຮຽນແຫ່ງນີ້ ຕາມທີ່ເຫັນຢູ່ໃນຮູບພາບຄື ສາວຄູກໍາລັງເຂ່ຍຊອກຫາປຶ້ມຮຽນ ແລະ ເອກະສານ ທີ່ອາດລອດເຫຼືອຈາກໄຟໄໝ້ໃນບາງສ່ວນ, ເນື່ອງຈາກໃນຄໍ່າຄືນເວລາປະມານ 2:20 ໂມງຂອງວັນທີ 5 ຕຸລາ 2016 ທີ່ຜ່ານມາໄດ້ເກີດເຫດການໄຟໄໜ້ໂຮງຮຽນປະຖົມສົມບູນບ້ານແກ້ງສາວ ເມືອງ ປາກລາຍແຂວງໄຊຍະບູລີ.

      ຈາກການບອກເລົ່າຂອງປະຊາຊົນທີ່ເຫັນເຫດການແມ່ນເຫັນໄຟລຸກຂຶ້ນຢູ່ເທິງຫຼັງຄາ ແລະ ຊາວບ້ານຈຶ່ງໄດ້ພາກັນເຂົ້າຊ່ວຍມອດໄຟ ແຕ່ໄຟລຸກແຮງຫລາຍຈຶ່ງບໍສາມາດຄວບຄຸມໄຟໄວ້ໄດ້ ເຮັດໃຫ້ໂຮງຮຽນແຫ່ງດັ່ງກ່າວເສຍຫາຍໄປຫຼາຍສົມຄວນ. ສ່ວນສາເຫດໄຟໄໜ້ຄັ້ງນີ້ເຈົ້າໜ້າທີກຳລັງພິສູດທຳການສືບສ່ວນສອບສວນຫາສາເຫດຕື່ມ ເພື່ອມາຂະຫຍາຍຜົນ.

     ສະນັ້ນຈິ່ງຂໍໃຫ້ສັງຄົມທຸກພາກສ່ວນທີ່ມີຄວາມພ້ອມໃນເລື່ອງດັ່ງກ່າວໃຫ້ການປະກອບສ່ວນຊ່ວຍເຫຼືອແກ່ໂຮງຮຽນແຫ່ງດັ່ງນີ້ດວ້ຍເຫັນແລ້ວເສົ້າກັບເຫດການນີ້ ແລະ ພວກເຮົາທາງທີມງານເວັບໄຊຄິອອກ ກໍຂໍເປັນກໍາລັງໃຈໃຫ້ແກ່ຄູອາຈານ ແລະ ນ້ອງນັກຮຽນທຸກຄົນ.

ແຫຼ່ງຂ່າວ: ໂທລະໂຄ່ງ.