ເສືອໃຕ້ປະກາດດຶງໂກມັອງຮ່ວມທັບຖາວອນ

 

ຄິງສະລີ ໂກມັອງ ປີກອະນາຄົດໄກເຊັນສັນຍາຖາວອນກັບ ບາເຢີນ ມິວນິກ ຈົນຮອດປີ 2020 ແລ້ວຫຼັງຈາກຍ້າຍຈາກ ຢູເວັນຕຸດ ມາຢູ່ກັບ “ເສືອໃຕ້” ດ້ວຍສັນຍາຢືມຕົວຕັ້ງແຕ່ປີ 2015 ຄາດວ່າຈ່າຍຄ່າຫົວໃຫ້ “ມ້າລາຍ” ປະມານ 21 ລ້ານເອີໂຣ.

 

ບາເຢີນ ມິວນິກ ສະໂມສອນຍັກໃຫຍ່ຂອງ ບຸນເດສລີກາ ເຢຍລະມັນ ປະກາດຢືນຢັນເຊັນສັນຍາດຶງ ຄິງສະລີ ໂກມັອງ ມິດຟິວດາວລຸ້ງຝຣັ່ງເຂົ້າມາຮ່ວມທັບແບບຖາວອນແລ້ວ ເມື່ອວັນພຸດທີ່ຜ່ານມາ ໂດຍເຊັນສັນຍາກັບທີມຈົນຮອດເດືອນມິຖຸນາປີ 2020.

 

ປີກອາຍຸ 20 ປີຍ້າຍຈາກ ຢູເວັນຕຸດ ຍັກໃຫຍ່ລີກອີຕາລີມາຢູ່ກັບ “ເສືອໃຕ້” ດ້ວຍສັນຍາເຊົ່າ 2 ປີເມື່ອປີ 2015 ກ່ອນທີ່ ບາເຢີນ ຈະໃຊ້ເງື່ອນໄຂໃນການຊື້ຂາດໂດຍລາຍງານລະບຸວ່າ ຄ່າຕົວຈະຢູ່ທີ່ປະມານ 21 ລ້ານເອີໂຣເຮັດໃຫ້ ໂຈເຊບ ກວາດິໂອລາ ນາຍໃຫຍ່ຂອງ ແມນເຊສເຕີ ຊີຕີ ທີ່ໃຫ້ຄວາມສົນໃຈເຂົາຕ້ອງຜິດຫວັງໄປຕາມລະບຽບ.

 

ຂະນະທີ່ ຄາວ-ຮາຍ ຣຸມເມນິກເກ ປະທານບໍລິຫານສະໂມສອນຂອງ “ເສືອໃຕ້” ເຜີຍວ່າ “ຄິງສະລີ ໂກມັອງ ເປັນນັກເຕະສຳຄັນໃນອະນາຄົດຂອງທີມເຮົາ ດັ່ງນັ້ນເຮົາຈຶ່ງຕັດສິນໃຈໃຊ້ຕົວເລືອກຊື້ຂາດ ຄິງສະລີ ເປັນນັກເຕະທີ່ມີດີ ເຮົາເຊື່ອວ່າເຂົາຈະຊ່ວຍເຮົາໄດ້ໃນຊ່ວງຫຼາຍໆປີທີ່ທາງໜ້າ”.

 

ທັງນີ້ ໂກມັອງ ລົງຫຼິ້ນໃຫ້ກັບ ບາເຢີນ ໄປແລ້ວ 23 ນັດລວມທຸກລາຍການໃນລະດູການນີ້ ແລະ ຍິງໄດ້ 2 ປະຕູ.