ເສືອໃຕ້ຈັບຣິເບຣີຕໍ່ສັນຍາໃໝ່ຮອດປີ 2018

 

ຟຣັອງ ຣິເບຣີ ດາວເຕະເລືອດນຳ້ຫອມຈົດປາກກາຕໍ່ສັນຍາກັບ ບາເຢິນ ມິວນິກ ອອກໄປຈົນຮອດປີ 2018 ຮຽບຮ້ອຍແລ້ວ ພ້ອມກັບຕັ້ງເປົ້າຊ່ວຍ “ເສືອໃຕ້” ເກັບແຊມອີກຫຼາຍໆເພື່ອຕອບແທນແຟນບານ.

 

ບາເຢິນ ມິວນິກ ຍັກໃຫຍ່ຂອງ ບຸນເດສລີກາ ເຢຍລະມັນຈັບ ຟຣັອງ ຣິເບຣີ ປີກປະສົບການສູງຂະຫຍາຍສັນຍາອອກໄປອີກ 1 ປີເປັນທີ່ຮຽບຮ້ອຍແລ້ວເມື່ອວັນອາທິດທີ່ຜ່ານມາ ສົ່ງຜົນໃຫ້ຈະໄດ້ຢູ່ໃນຖິ່ນ ອາລິອັນ ອາຣີນາ ໄປຈົນຮອດປີ 2018.

 

ດາວເຕະອາຍຸ 33 ປີຍ້າຍຈາກ ໂອລິມປິກ ມາກແຊ ສະໂມສອນໃນບ້ານເກີດມາຢູ່ກັບ “ເສືອໃຕ້” ຕັ້ງແຕ່ປີ 2007 ໂດຍເປັນກໍາລັງສໍາຄັນຂອງທີມມາຕະຫຼອດ ແລະ ລົງສະໜາມໄປແລ້ວຫຼາຍກວ່າ 300 ນັດລວມທຸກລາຍການເຮັດໃຫ້ສະໂມສອນຕອບແທນດ້ວຍການມອບສັນຍາໃໝ່ໃຫ້ຈົນຮອດປີ 2018.

 

ຣິເບຣີ ເຜີຍຫຼັງລົງລາຍເຊັນວ່າ “ຂ້ອຍມີຄວາມສຸກຫຼາຍທີ່ຕໍ່ສັນຍາຫຼິ້ນໃຫ້ ບາເຢິນ ໄປອີກ 1 ປີ ສະໂມສອນທີ່ຍິ່ງໃຫຍ່ແຫ່ງນີ້ ແລະ ເມືອງກາຍເປັນບ້ານຂອງຂ້ອຍ ທັງໃນເລື່ອງຂອງກິລາ ແລະ ສ່ວນຕົວ ຂ້ອຍຕັ້ງຕາລໍຖ້າທີ່ຈະມີໄລຍະເວລາທີ່ສວຍງາມຫຼາຍຂຶ້ນກັບແຟນບານ ບາເຢິນ ຂ້ອຍຕ້ອງການເປັນສ່ວນໜຶ່ງໃນຄວາມສຳເລັດຂອງທີມຕໍ່ໄປໃນຊ່ວງ 1 ປີເຄິ່ງຕໍ່ຈາກນີ້”.