ເສືອໃຕ້ກຽມເຈລະຈາສັນຍາໃໝ່ກັບຣຶເບຣີ-ຣັອບເບັນ

 

ຄາ-ຮາຍ ຣຸມເມນິເກ ຊີອີໂອຂອງ ບາເຢິນ ມິວນິກ ເຜີຍວ່າກຽມເຈລະຈາກັບ ຟຣັອງ ຣິເບຣີ ແລະ ອາເຢນ ຣັອບເບັນ 2 ນັກເຕະຫຼັກຂອງທີມເລື່ອງສັນສະບັບໃໝ່ ຫຼັງຈາກທີ່ທັງສອງເຫຼືອຂໍ້ຜູກມັດກັບທີມພຽງແຕ່ຈົບລະດູການນີ້ເທົ່ານັ້ນ ແຕ່ຢືນຢັນຈະບໍ່ບອກເຖິງໄລຍະເວລາໃນການສົນທະນາເນື່ອງຈາກຕ້ອງການເຮັດກັນເປັນການພາຍໃນ.

 

ຄາ-ຮາຍ ຣຸມເມນິເກ ປະທານບໍລິຫານຂອງ ບາເຢິນ ມິວນິກ ສະໂມສອນຍັກໃຫຍ່ຂອງ ບຸນເດສລີກາ ເຢຍລະມັນອອກມາເຜີຍເມື່ອວັນຈັນທີ່ຜ່ານມາວ່າ ຕົ້ນສັງກັດພ້ອມທີ່ຈະສົນທະນາເລື່ອງສັນຍາສະບັບໃໝ່ກັບ ຟຣັອງ ຣິເບຣີ ແລະ ອາເຢນ ຣັອບເບັນ 2 ປີກຕົວເກົ໋າຂອງທີມຫຼັງຈາກທີ່ປັດຈຸບັນທັງສອງເຫຼືອສັນຍາໃນຖິ່ນ ອະລິອັນ ອາຣີນາ ພຽງແຕ່ປີດຽວເທົ່ານັ້ນ.

 

ຣຸມເມນິເກ ສະແດງອອກຢ່າງຊັດເຈນວ່າຕ້ອງການທີ່ຈະດຶງ ຣິເບຣີ ແລະ ຣັອບເບັນ ເອົາໄວ້ຕໍ່ໄປເຖິງວ່າທັງສອງຈະມີອາຍຸຫຼາຍແລ້ວ ແລະ ປະສົບບັນຫາອາການບາດເຈັບຢູ່ຫຼາຍເທື່ອກໍຕາມ ແລະ ຫຼ້າສຸດເຜີຍວ່າກຽມທີ່ຈະເປີດການເຈລະຈາສັນຍາສະບັບໃໝ່ກັບທັງສອງຄົນແລ້ວ.

 

“ເຮົາຈະມີການລົມກັບພວກເຂົາໃນໄວໆນີ້ແຕ່ມັນຈະເປີດເຜີຍຕໍ່ສາທາລະນະບໍ່ໄດ້ວ່າເຮົາຈະເວົ້າກັນໃນຕອນໃດ ເຮົາຈະບໍ່ຕີແປ່ງ ແລະ ເຊື້ອເຊີນທຸກຄົນມາທີ່ສະໜາມຊ້ອມເພື່ອຮັບຟັງວ່າເຮົາກຳລັງລົມຫຍັງກັນຢູ່ ມັນບໍ່ມີຂໍ້ສົງໄສເລີຍກ່ຽວກັບເລື່ອງທີ່ວ່າ ຣັອບເບັນ ກຳລັງກັບມາໂຊຟອມໃນລະດັບສຸດຍອດອີກເທື່ອໜຶ່ງ” ຣຸມເມນິເກ ກ່າວ.