ເສືອເຫຼືອງໜາວ!! ໂອບາເມຢອງບໍ່ຮັບປາກຢູ່ກັບທີມຕໍ່

 

ປິແອ-ເອເມີຣິກ ໂອບາເມຢອງ ກອງໜ້າຂອງ ໂບຣຸສເຊຍ ດອດມຸນ ເຜີຍບໍ່ຮູ້ວ່າຈະຢູ່ກັບທີມຕໍ່ໄປ ຫຼື ບໍ່ເມື່ອຈົບລະດູການນີ້ຫຼັງຈາກທີ່ມີຂ່າວລືກັບ ເຣອັນ ມາດຣິດ ແລະ ແມນເຊສເຕີ ຊີຕີ ອອກມາ ບອກຕອນນີ້ສົນໃຈແຕ່ການຊ່ວຍທີມໃຫ້ໄດ້ແຊມມາຄອງເທົ່ານັ້ນ.

 

ປິແອ-ເອເມີຣິກ ໂອບາເມຢອງ ຫົວຫອກຂອງ “ເສືອເຫຼືອງ” ໂບຣຸສເຊຍ ດອດມຸນ ສະໂມສອນຍັກໃຫຍ່ຂອງ ບຸນເດສລີກາ ອອກມາເຜີຍເມື່ອວັນອາທິດທີ່ຜ່ານມາວ່າເຂົາບໍ່ຮູ້ວ່າຕົນເອງຈະຍັງຄົງຢູ່ກັບຕົ້ນສັງກັດຕໍ່ໄປອີກ ຫຼື ບໍ່ຫຼັງຈາກທີ່ຈົບລະດູການນີ້.

 

ສະຕາທີມຊາດກາບອງປະກາດຊັດເຈນວ່າເຂົາຫວັງທີ່ຈະໄດ້ຮັບໂອກາດຫຼິ້ນກັບ “ລາຊາຊຸດຂາວ” ເຣອັນ ມາດຣິດ ຍອດສະໂມສອນຂອງສະເປນໃນອະນາຄົດເນື່ອງຈາກໃຫ້ຄຳໝັ້ນສັນຍາກັບປູ່ເອົາໄວ້ຂະນະທີ່ ແມນເຊສເຕີ ຊີຕີ ສະໂມສອນມະຫາເສດຖີຂອງ ພຣີເມຍລີກ ກໍຢາກໄດ້ນັກເຕະເຊັ່ນກັນຫຼັງນັກເຕະຫາກໍໂຊຟອມເກັ່ງຍິງອີກ 2 ປະຕູຊ່ວຍ ດອດມຸນ ທະລົ່ມ ໂບຣຸສເຊຍ ມິວເຊັນກັດບັກ 4-1 ເມື່ອວັນເສົາທີ່ຜ່ານມາ.

 

ເຖິງວ່າ ໂອບາເມຢອງ ປະກາດເມື່ອເດືອນພະຈິກທີ່ຜ່ານວ່າເຂົາອາດຈະພິຈາລະນາເລື່ອງການຢູ່ໃນຖິ່ນ ຊິກເນົາ ອິດູນາ ພາກ ຕໍ່ໄປຫຼັງມີສັນຍາກັບສະໂມສອນຮອດປີ 2020 ແຕ່ຫຼ້າສຸດດາວຍິງຕົວເກັ່ງກໍປະຕິເສດທີ່ຈະກາຣັນຕີອະນາຄົດຂອງຕົນເອງ.

 

“ຂ້ອຍບໍ່ຮູ້ວ່າຂ້ອຍຈະຢູ່ກັບທີມຕໍ່ໄປ ຫຼື ບໍ່ ຂ້ອຍຄິດແຕ່ການຫຼິ້ນທີ່ດີໃນຕອນນີ້ ຂ້ອຍຢາກເຮັດໃຫ້ດີທີ່ສຸດ ແລະ ຄວ້າແຊມ ຂ້ອຍຄິດຫາແຕ່ເລື່ອງກິລາບໍ່ແມ່ນເລື່ອງອື່ນ ເມື່ອປີກາຍຂ້ອຍຍິງ 18 ປະຕູກ່ອນຄຣິສມາສ ຂ້ອຍຫວັງທີ່ຈະເຮັດໃຫ້ດີຂຶ້ນໃນປີນີ້ ແຕ່ຂ້ອຍກໍຢາກຈະຈົດຈໍ່ຢູ່ກັບຊ່ວງເຄິ່ງຫຼັງຂອງລະດູການນີ້” ໂອບາເມຢອງ ກ່າວ.