ເສືອເຫຼືອງເຊັງ!!ເບີກີດ້ຽງຍາວຮອດປີໃໝ່

 

ໂຣມັນ ເບີກີ ນາຍທະວານຂອງ ໂບຣຸສເຊຍ ດອດມຸນ ກຽມເຂົ້າຜ່າຕັດຫຼັງຈາກທີ່ມີອາການມືຫັກຈາກເກມເອົາຊະນະ ບາເຢິນ ມິວນິກ 1-0 ວັນເສົາທີ່ຜ່ານມາ ຄາດວ່າຕ້ອງພັກຢ່າງໜ້ອຍ 8 ອາທິດເຮັດໃຫ້ ໂຣມັນ ໄວເດັນເຟວເລີ ປະຕູມືສອງຈະຮັບໂອກາດເຮັດໜ້າທີ່ແທນ.

 

ໂຣມັນ ເບີກີ ນາຍທະວານ ໂບຣຸສເຊຍ ດອດມຸນ ສະໂມສອນຍັກໃຫຍ່ຂອງ ບຸນເດສລີກາ ເຢຍລະມັນຈະຕ້ອງພັກຮັກສາໂຕຍາວເຖິງທ້າຍປີນີ້ຫຼັງຈາກທີ່ໄດ້ຮັບບາດເຈັບມືຫັກຈາກເກມທີ່ເອົາຊະນະ ບາເຢິນ ມິວນິກ 1-0 ໃນເກມລີກເມື່ອວັນເສົາທີ່ຜ່ານມາ.

 

ເບີກີ ກຽມເຂົ້າຮັບການຜ່າຕັດທີ່ໂຮງໝໍໃນເມືອງບຣັກເຄວ ນັ້ນກໍໝາຍຄວາມວ່າເຂົາຈະຕ້ອງພັກຮັກສາໂຕຢ່າງໜ້ອຍ 8 ອາທິດໂດຍທີ່ນາຍທະວານທີມຊາດສະວິດເຊີແລນເກັບຄລີນຊີບໄດ້ເປັນຄັ້ງທີ 3 ຈາກ 4 ເກມຫຼັງສຸດລວມທຸກລາຍການພ້ອມກັບນຳ “ເສືອເຫຼືອງ” ຢູ່ອັນດັບ 3 ຂອງລີກ ໂດຍມີແຕ້ມນຳຫຼັງ ບາເຢິນ ອັນດັບ 2 ຢູ່ 3 ແຕ້ມ ແລະ ແອເບ ໄລຊິກ ມ້າມືດທີ່ຂຶ້ນຈ່າຝູງໃນຕອນນີ້ຢູ່ 6 ແຕ້ມ.

 

ທັງນີ້ ໂຣມັນ ໄວເດັນເຟວເລີ ນາຍທະວານມື 2 ຂອງ ດອດມຸນ ຈະໄດ້ລົງເຮັດໜ້າທີ່ເຝົ້າເສົາແທນໃນເກມທີ່ຈະພົບກັບ ລີເກຍ ວໍຊໍ ຄູ່ແຂ່ງຈາກໂປໂລຍໃນ ຢູຟາ ແຊມປຽນ ລີກ ວັນອັງຄານນີ້.