ເສືອເຫຼືອງຂໍມິດເລື່ອງໂອບາເມຢອງກຽມຍ້າຍໄປເຮືອໃບ

 

ຊາສຊາ ຟລິກເກີ ກະບອກສຽງຂອງ ໂບຣຸສເຊຍ ດອດມຸນ ເຜີຍ “ເສືອເຫຼືອງ” ຂໍປິດງຽບກັບກະແສຂ່າວທີ່ ປີແອ-ເອເມີຣິກ ໂອບາເມຢອງ ກຽມຍ້າຍໄປ ແມນເຊສເຕີ ຊີຕີ ພ້ອມລະບຸວ່າທີມຕົນບໍ່ຮູ້ຫຍັງເລີຍກ່ຽວກັບເລື່ອງນີ້.

 

ຊາສຊາ ຟລິກເກີ ໂຄສົກຂອງ ໂບຣຸສເຊຍ ດອດມຸນ ສະໂມສອນດັງຂອງ ບຸນເດສລີກາ ເປີດເຜີຍວ່າທີມຂອງຕົນຂໍບໍ່ໃຫ້ຄວາມຄິດເຫັນຫຍັງກ່ຽວກັບກະແສຂ່າວທີ່ລະບຸວ່າ ປີແອ-ເອເມີຣິກ ໂອບາເມຢອງ ກອງໜ້າໂຕເກັ່ງຂອງທີມກຳລັງຈະຍ້າຍໄປຮ່ວມທີມ ແມນເຊສເຕີ ຊີຕີ ສະໂມສອນມະຫາເສດຖີຂອງ ພຣີເມຍລີກ ຊ່ວງຊຳເມີນີ້.

 

ກ່ອນໜ້ານີ້ມີກະແສຂ່າວວ່າຫົວຫອກທີມຊາດກາບອງກຳລັງຢູ່ໃນການເຈລະຈາກັບ “ເຮຶອໃບສີຟ້າ” ແຕ່ວ່າຫຼ້າສຸດ ຟລິກເກີ ລະບຸຊັດວ່າ ດອດມຸນ ຍັງບໍ່ຮູ້ຫຍັງເລີຍກ່ຽວກັບເລື່ອງດັ່ງກ່າວ.

 

“ເຮົາບໍ່ຮູ້ຫຍັງເລີຍກັບເລື່ອງນີ້ ແລະ ເຮົາກໍຈະບໍ່ໃຫ້ຄວາມເຫັນໃດໆກັບຂ່າວລືແບບນີ້” ໂຄສົກ ດອດມຸນ ກ່າວ.

 

ທັງນີ້ ດອດມຸນ ຫາກໍເສຍ ອີຄາຍ ກຸນໂດກັນ ກອງກາງຂອງທີມໄປໃຫ້ກັບ ແມນ ຊີຕີ ເມື່ອອາທິດຜ່ານມາ ຂະນະທີ່ ໂອບາເມຢອງ ກໍຍັງໄດ້ຮັບຄວາມສົນໃຈຈາກ ແມນເຊສເຕີ ຢູໄນເຕັດ ແລະ ອາເຊນອນ ເຊັ່ນກັນ.