ເສືອຈຸກເລີຍ!! ຣັອບເບັນເຈັບນັ່ງຕັ່ງຍາວ 5 ອາທິດ

 

ອາເຈັນ ຣັອບເບັນ ປີກຈອມເກົ໋າ ບາເຢິນ ມິວນິກ ຕ້ອງເບື່ອໂຕເອງພໍສົມຄວນເມື່ອມີບັນຫາເຈັບກ້າມຊີ້ນຕົ້ນຂາບໍ່ໄດ້ລົງຫຼິ້ນໃຫ້ “ເສືອໃຕ້” ດົນເຖິງ 5 ອາທິດເລີຍ.

 

ບາເຢິນ ມິວນິກ ສະໂມສອນຍັກໃຫຍ່ຈາກ ບຸນເດສລີກາ ໄດ້ຮັບຂ່າວຮ້າຍເມື່ອ ອາເຈັນ ຣັອບເບັນ ປີກຈອມພິ້ວຂອງທີມມີບັນຫາອາການບາດເຈັບກ້າມຊີ້ນຕົ້ນຂາຕ້ອງພັກຮັກສາໂຕປະມານ 5 ອາທິດ ຈາກການລາຍງານເມື່ອວັນພຸດນີ້.

ປີກຈອມເກົ໋າອາຍຸ 32 ປີ ມີບັນຫາເຈັບດັ່ງກ່າວ ຈົນຕ້ອງຖອນໂຕອອກຈາກທີມຊາດ ໂຮນລັງ ເກມແໍອຸ່ນເຄື່ອງກັບຝຣັ່ງ ແລະ ອັງກິດ ຕະຫຼອດອາທິດທີ່ຜ່ານມາ ສົ່ງຜົນໃຫ້ໝົດສິດລົງຮັບໃຊ້ “ເສືອໃຕ້” ໃນເກມ ຢູຟາ ແຊມປຽນລີກ ຮອບ 8 ທີມສຸດທ້າຍນັດພົບກັບ ເບັນຟີກາ ຂອງໂປຕຸເກດ ລວມທັງຍັງຕ້ອງລຸ້ນອີກວ່າຈະຟິດທັນລົງສະໜາມໃນຊ່ວງທ້າຍລະດູການນີ້ ຫຼື ບໍ່.

 

ບາເຢິນ ຍັງນຳເປັນຈ່າຝູງ ບຸນເດສລີກາ ດ້ວຍການເກັບຄະແນນໄປແລ້ວ 69 ແຕ້ມຈາກ 27 ນັດ ນຳອັນດັບສອງ ໂບຣຸສເຊຍ ດອດມຸນ ຢູ່ 5 ຄະແນນ.