ເສີມທັບ!!ບາຊາເລັງດຶງມາຕາເສີມກາງ

 

ບາເຊໂລນາ ຫວັງຍົກລະດັບຄວາມແຂງແກ່ນໃຫ້ທີມໃນລະດູການໜ້າໂດຍຫຼ້າສຸດຫັນເປົ້າໄປທີ່ ຮວານ ມາຕາ ເພເມກເກີຂອງ ແມນຢູ ເຖິງວ່ານັກເຕະຈະຢາກຢູ່ຊ່ວຍທັບ “ຜີສາດແດງ” ກໍຕາມ.

 

ບາເຊໂລນາ ສະໂມສອນດັງຂອງ ລາ ລີກາ ສະເປນ ຕົກເປັນຂ່າວເມື່ອວັນຈັນທີ່ຜ່ານມາວ່າ ກຳລັງພິຈາລະນາທີ່ຈະອອກລ່າໂຕ ຮວານ ມາຕາ ກອງກາງຂອງ ແມນເຊສເຕີ ຢູໄນເຕັດ ສະໂມສອນດັງຈາກ ພຣີເມຍລີກ ມາເສີມທັບໃນຊ່ວງຊຳເມີນີ້.

 

ອະນາຄົດຂອງນັກເຕະໃນ ໂອນ ທຣາຟເຟິດ ຂອງ ມາຕາ ເລີ່ມບໍ່ມີຄວາມແນ່ນອນຫຼັງຈາກທີ່ ໂຊເຊ ມູຣິນໂຢ ເຂົ້າມາເປັນຜູ້ຈັດການທີມຄົນໃໝ່ຂອງທີມ “ຜີສາດແດງ” ເນື່ອງຈາກເຂົາເຄີຍຖືກ “ເຮຍມູ” ຂາຍຖິ້ມໃຫ້ ແມນຢູ ສະໄໝຫຼິ້ນໃຫ້ກັບ ເຊວຊີ ເມື່ອປີ 2014.

 

ເຖິງວ່າກ່ອນໜ້ານີ້ມີກະແສຂ່າວວ່າ ມາຕາ ຍິນດີຈະຮ່ວມງານກັບ ມູຣິນໂຢ ອີກຮອບແຕ່ວ່າຫຼ້າສຸດ ມຸນໂດ ເດປໍຕິໂບ ສື່ກິລາຂອງແດນກະທິງລະບຸວ່າ ບາຊາ ພ້ອມທີ່ຈະດຶງ ມາຕາ ໄປຮ່ວມຖິ່ນ ແຄມນູ ເພື່ອລຸ້ນແຊມ ຢູຟາ ແຊມປຽນລີກ ໃນລະດູການໜ້າ ຫຼັງຈາກທີ່ລະດູການຫຼ້າສຸດຖືກ ແອັດເລຕິໂກ ມາດຣິດ ເຂ່ຍຕົກຮອບກ່ອນຮອງຊະນະເລີດ.

 

ສຳລັບລະດູການ 2015-2016 ທີ່ຜ່ານມາ ມາຕາ ລົງຫຼິ້ນໃຫ້ ແມນຢູ ລວມທຸກລາຍການ 54 ນັດຍິງໄດ້ 10 ປະຕູ.