ເສີມຂະຫຍາຍການອ່ານກາບກອນ ແລະ ຂັບລຳ ສັງສິນໄຊ

ສະ­ມາ­ຄົມ​ສົ່ງ­ເສີມ​ການ​ອະ­ນຸ​ຮັກ​ສິ­ລະ​ປະ​ວັນ­ນະ­ຄະ­ດີ ຈັດ​ງານ​ບຸນ­ມະ­ໂຫ­ລານ ສັງ​ສິນ​ໄຊ ຄັ້ງ​ທີ II ພາຍ​ໃຕ້​ໂຄງ­ການ: ເສີມ​ຂະ­ຫຍາຍ​ການ​ອ່ານ​ກາບ­ກອນ ແລະ ຂັບ​ລຳ ສັງ​ສິນ​ໄຊ ປີ II ຂຶ້ນ​ໃນ​ວັນ​ທີ 30 ມິ­ຖຸ­ນາ 2018 ທີ່​ສູນ​ກິ­ລາ​ບູ​ໂດ ນະ­ຄອນ­ຫຼວງ​ວຽງ​ຈັນ ໃຫ້​ກຽດ​ເຂົ້າ​ຮ່ວມ​ຂອງ ທ່ານ​ປ້າ ຄຳ​ເມິງ ວໍ­ລະ​ຈິດ ປະ­ທານ​ຄອບ­ຄົວ​ການ​ນຳ ທ່ານ ບົວ​ເງິນ ຊາ​ພູ​ວົງ ຮອງ​ລັດ­ຖະ­ມົນ­ຕີ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ທ່ານ ບົວ​ລານ ສີ​ຣິ​ປັນ­ຍາ ຮອງ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກິ­ລາ ພ້ອມ​ດ້ວຍ ຜູ້­ຕາງ­ໜ້າ​ຈາກ​ອົງ­ການ​ກ່ຽວ­ຂ້ອງ ຕະ­ຫຼອດ​ຮອດ​ພະ­ນັກ­ງານ ຄູ-ອາ­ຈານ ນັກ­ຮຽນ​ຈາກ​ບັນ­ດາ​ໂຮງ­ຮຽນ ແລະ ພໍ່​ແມ່​ຜູ້​ປົກ­ຄອງ​ນັກ­ຮຽນ.

ທ່ານ​ນາງ ສຸ­ນັນ­ທາ ກັນ­ລະ­ຍາ ປະ­ທານ​ສະ­ມາ­ຄົມ​ສົ່ງ­ເສີມ​ການ​ອະ­ນຸ​ຮັກ​ສິ­ລະ​ປະ​ວັນ­ນະ­ຄະ­ດີ ກ່າວ​ວ່າ: ພວກ​ເຮົາ​ໄດ້​ເລີ່ມ​ຕົ້ນ ໂຄງ­ການ​ເສີມ​ຂະ­ຫຍາຍ​ການ​ອ່ານ​ກາບ­ກອນ  ແລະ ຂັບ​ລຳ ສັງ​ສິນ​ໄຊ ໂດຍ​ໄດ້​ຮັບ​ການ​ສະ­ໜັບ­ສະ­ໜູນ​ຫຼັກ ຈາກ​ຫ້ອງ­ການ​ພັດ­ທະ­ນາ ແລະ ການ​ຮ່ວມ​ມື​ຈາກ​ປະ­ເທດ​ສະ​ວິດ ຄັ້ງ​ທຳ​ອິດ ແມ່ນ​ໃນ​ສົກ​ປີ 2015-2016 ແລະ ຄັ້ງ​ທີ 2 ຄື ສົກ​ປີ 2017-2018 ກິດ­ຈະ­ກຳ​ໃນ​ໂຄງ­ການ ແມ່ນ​ການ​ຈັດ​ຊຸດ​ເຝິກ­ອົບ­ຮົມ​ຄູ​ເຝິກ 2 ຄັ້ງ ໃນ​ເດືອນ​ພະ­ຈິກ 2017 (18 ທ່ານ) ແລະ ເດືອນ​ມີ­ນາ (28 ທ່ານ) ໃນ​ນັ້ນ ມີ​ຕົວ​ແທນ​ຄູ-ອາ­ຈານ ທີ່​ມາ​ຈາກ 6 ແຂວງ (ຫຼວງ​ພະ​ບາງ ຊຽງ​ຂວາງ ໄຊ​ຍະ​ບູ​ລີ ວຽງ​ຈັນ ບໍ​ລິ​ຄຳ​ໄຊ ແລະ ນະ­ຄອນ­ຫຼວງ) ມີ 18 ໂຮງ­ຮຽນ ເພື່ອ​ສ້າງ​ຄູ​ເຝິກ​ຜູ້​ສືບ​ທອດ ທີ່​ຈະ​ຖ່າຍ​ທອດ​ຄວາມ​ຮູ້​ທາງ​ດ້ານ​ພາ­ສາ ວັນ­ນະ­ຄະ­ດີ ສ້າງ​ແຮງ​ບັນ­ດານ​ໃຈ ໃຫ້​ຄູ-ອາ­ຈານ ນຳ­ໄປ​ເຜີຍ­ແຜ່ ເພື່ອ​ໃຫ້​ກິດ­ຈະ­ກຳ​ນີ້ ກາຍ­ເປັນ​ສ່ວນ​ໜຶ່ງ ຂອງ​ກິດ­ຈະ­ກຳ​ຫຼັກ­ສູດ​ຂອງ​ໂຮງ­ຮຽນ​ທີ່​ນ້ອງໆ​ນັກ­ຮຽນ​ໄດ້​ມີ​ໂອ­ກາດ​ສຳ­ຜັດ ແລະ ນຳ​ໃຊ້​ໄດ້​ຢ່າງ​ເປັນ​ຂະ​ບວນ​ຟົດ­ຟື້ນ ໂດຍ​ສະ­ເພາະ ແມ່ນ​ຢາກ​ປູກ­ຝັງ​ຮາກ​ຖານ​ທາງ​ດ້ານ​ພາ­ສາ ແລະ ວັນ­ນະ­ຄະ­ດີ ໃຫ້​ເດັກ­ນ້ອຍ​ແຕ່​ຍັງ​ນ້ອຍ ໃຫ້​ເປັນ​ອາ­ພອນ​ວັດ­ທະ­ນະ­ທຳ​ປະ­ດັບ​ໂຕ ເຊິ່ງ​ຈະ​ຢູ່​ນຳ​ເຂົາ­ເຈົ້າ ແລະ ເບັ່ງ​ບານ​ຕໍ່ໆ​ໄປ.

ສຳ­ລັບ​ງານ​ໃນ​ຄັ້ງ​ນີ້ ແມ່ນ​ຜົນ­ສຳ­ເລັດ​ຂອງ​ໂຄງ­ການ ເປັນ​ການ​ສະ­ຫຼຸບ​ສັງ​ລວມ​ໃຫ້​ເຫັນ​ວ່າ ກິດ­ຈະ­ກຳ​ມ່ວນໆ​ແບບ​ນີ້ ແມ່ນ​ໃຜ​ເປັນ​ຄົນ​ເຮັດ ແມ່ນ​ຄູ-ອາ­ຈານ​ພາ­ສາ​ລາວ-ວັນ­ນະ­ຄະ­ດີ ຄູ​ສອນ​ກິດ­ຈະ­ກຳ ແລະ ນ້ອງໆ​ນັກ­ຮຽນ​ນັ້ນ​ເອງ ຫຼັງ​ຈາກ​ທີ່​ຄູ-ອາ­ຈານ​ໄດ້​ໄປ​ເຝິກ ແລະ ກໍ່​ໄດ້​ພາ​ນັກ­ຮຽນ​ອ່ານ​ເປັນ​ບັ້ນ ຈົນ​ຈື່ ແລະ ລ່ຽນ­ໄຫຼ ຈຶ່ງ​ມາ​ຈັດ​ສະ­ແດງ ຮ້ອງ­ເພງ ແລະ ເຕັ້ນ​ແຣັບ​ສັງ​ສິນ​ໄຊ ລະ­ຄອນ​ຄຳ​ກອນ ລະ­ຄອນ​ອີ່​ປ໋ອກ ແລະ ຂັບ​ລຳ ເຂົ້າ​ຮ່ວມ​ສະ­ແດງ​ມີ​ນ້ອງໆ​ນັກ­ຮຽນ​ຊັ້ນ​ປະ­ຖົມ ແລະ ມັດ­ທະ­ຍົມ ຈຳ­ນວນ 234 ນ້ອງ ຈາກ 6 ແຂວງ 15 ໂຮງ­ຮຽນ ທັງ​ພາກ​ລັດ ແລະ ເອ­ກະ​ຊົນ ທັງ​ນີ້ ກໍ່​ເພື່ອ​ເປັນ​ການ​ຊຸກ­ຍູ້​ລູກ​ຫຼານ​ຮຸ່ນ​ສືບ​ທອດ ໃຫ້​ມີ​ຈິດ­ໃຈ ມັກ​ຮັກ ແລະ ອະ­ນຸ​ຮັກ ສິ­ລະ​ປະ​ວັດ­ທະ­ນະ­ທຳ ອັນ​ເປັນ​ມໍ­ລະ­ດົກ ຂອງ​ຊາດ ໂດຍ​ສະ­ເພາະ ສັງ​ສິນ​ໄຊ ເປັນ​ຄຳ​ກອນ ອາ­ຍຸ​ເກືອບ 400 ປີ ຂອງ​ນັກ​ປະ­ພັນ​ປາງ​ຄຳ.