ເສັ້ນທາງແຕ່ 3 ແຍກຈີ່ນາຍໂມ້ ຫາຫາດຊາຍຟອງ ຄືບໜ້າແລ້ວ 60%

ການກໍ່ສ້າງເສັ້ນທາງເບຕົງເສີມເຫຼັກແຕ່ 3 ແຍກຈີ່ນາຍໂມ້ ຫາບ້ານຊາຍຟອງ, ພາຍຫຼັງທີ່ໄດ້ເລີ່ມ ລົງມືກໍ່ສ້າງມາແຕ່ກາງປີ 2016 ມາຮອດປະຈຸບັນ ໜ້າວຽກໂດຍລວມມີຄວາມຄືບໜ້າແລ້ວ 60%, ຄາດວ່າຈະສຳເລັດສົມບູນພາຍໃນຮອດເດືອນເມສາ ປີ 2018. 

ທ່ານ ຄູນສົມບັດ ເຟື້ອຍມະນີວົງ ຫົວໜ້າໂຄງການກໍ່ສ້າງເສັ້ນທາງເບຕົງເສີມເຫຼັກແຕ່ 3 ແຍກຈີ່ນາຍໂມ້ ຫາບ້ານຊາຍຟອງ ກ່າວວ່າ: ໂຄງການກໍ່ສ້າງເສັ້ນທາງເບຕົງເສີມເຫຼັກແຕ່ 3 ແຍກຈີ່ນາຍໂມ້ ເມືອງສີສັດຕະນາກ ຫາ ບ້ານຊາຍຟອງ ເມືອງຫາດຊາຍຟອງ ນະຄອນຫຼວງວຽງຈັນ, ທີ່ໄດ້ເລີ່ມລົງມືກໍ່ສ້າງມາແຕ່ເດືອນເມສາ 2016, ຊຶ່ງມີຄວາມຍາວ 14 ກິໂລແມັດ ແລະກວ້າງ 15 ແມັດ, ພ້ອມດ້ວຍທາງຄົນຍ່າງເບື້ອງລະ 1,5 ແມັດ, ໂດຍແມ່ນບໍລິສັດຫາຍ ຫານການທຸລະກິດຈຳກັດ ເປັນຜູ້ຮັບເໝົາກໍ່ສ້າງ, ຜ່ານການຈັດຕັ້ງປະຕິບັດມາຮອດປະຈຸບັນໂດຍລວມຂອງໂຄງການແມ່ນຄືບໜ້າແລ້ວ 60%, ໃນນັ້ນ ໄດ້ປູເບຕົງສຳເລັດແລ້ວ 7 ກິໂລແມັດ, ສ່ວນວຽກວາງທໍ່ລະບາຍນ້ຳຍັງເຫຼືອ 2 ກິໂລແມັດ ແມ່ນຈະສຳເລັດ ແລະວຽກເກັບມ້ຽນສິ່ງກີດຂວາງແມ່ນສໍາເລັດແລ້ວ, ສະເພາະວຽກໜ້າທາງແກ້ໄຂຄວາມຫຍຸ້ງຍາກ ແມ່ນຈະໃຫ້ສຳເລັດໃນທ້າຍເດືອນທັນວາປີນີ້ ແລະໃຫ້ໄດ້ເຂົ້າສູ່ການຕົບແຕ່ງ ແມ່ນຕົ້ນປີ 2018 ເພື່ອຮັບປະກັນທຸກ ໜ້າວຽກສຳເລັດປະມານເດືອນເມສາ. 

ເຖິງຢ່າງໃດກໍຕາມໃນນາມຫົວໜ້າໂຄງການຢາກຮຽກຮ້ອງມາຍັງພໍ່ແມ່ປະຊາຊົນກ່ຽວກັບການໃຊ້ລົດໃຊ້ຖະໜົນ ເນື່ອງຈາກ ເສັ້ນທາງນີ້ຖືວ່າເປັນສິ່ງໃໝ່, ດັ່ງນັ້ນ ຈະເຫັນໄດ້ວ່າປະຊາຊົນຈຳນວນຫຼາຍແມ່ນດີໃຈທີ່ຈະໄດ້ທາງໃໝ່, ແຕ່ທັງນີ້ກໍປາສະຈາກບໍ່ໄດ້ໃນເລື່ອງຂອງການເກີດອຸບັດເຫດ, ເພາະມີປະຊາຊົນຈຳນວນໜຶ່ງຍັງຂາດສະຕິເປັນເຈົ້າການໃນການສັນຈອນ ໂດຍສະເພາະການຂັບຂີ່ລົດໄວເກີນສ່ຽງຕໍ່ການເກີດອຸປະຕິເຫດ ສະນັ້ນເພື່ອຫຼີກລຽງບັນຫາ ດັ່ງກ່າວນັ້ນ ຈຶ່ງຢາກຝາກເຖິງພໍ່ແມ່ປະຊາຊົນໃນບໍລິເວນນີ້ ຜູ້ໃຊ້ລົດໃຊ້ຖະໜົນໃຫ້ຄ່ອຍໄປຄ່ອຍມາ, ມີສະຕິໃນການຂັບຂີ່ຫຼາຍຂຶ້ນ, ທ່ານ ຄຸນສົມບັດ ເຟື້ອຍມະນີວົງ ກ່າວຕື່ມວ່າ.

ທ່ານ ແຢນ ມ້າຍ ຊາວ ຜູ້ຈັດການບໍລິສັດຫາຍຫານການທຸລະກິດ ຈຳກັດຜູ້ດຽວກ່າວວ່າ: ປະຈຸບັນເປັນຊວງລະດູຝົນ, ສະນັ້ນ ການຈັດຕັ້ງປະຕິບັດແມ່ນສຸມໃສ່ວຽກວາງທໍ່ລະບາຍນ້ຳ, ສ່ວນວຽກປູໜ້າທາງແມ່ນຈະສືບຕໍ່ຫາກວ່າຝົນເຊົ່າ ແລະຕາມແຜນການຈະໃຫ້ປູເບຕົງສຳເລັດໃນທ້າຍປີນີ້, ຫຼັງຈາກນັ້ນ ຈິ່ງກ້າວສູ່ວຽກຕົບແຕ່ງປະດັບປະດາເປັນຕົ້ນທາງຄົນຍ່າງ, ການຕິດຕັ້ງເສົາໄຟເຢືອງທາງ ແລະປ້າຍສັນຈອນ, ຊຶ່ງຕາມແຜນຂອງໂຄງການແມ່ນ ຈະໃຫ້ສຳເລັດທຸກຢ່າງໃນເດືອນ 4 ປີ 2018 ແລະມອບຮັບຢ່າງເປັນທາງການແມ່ນທ້າຍເດືອນ 5 ຂອງປີດຽວກັນ.

Cr: ເສດຖະກິດ-ສັງຄົມ