ເສັ້ນທາງຜາເມືອງ-ທ່າສີ ສ້າງສຳເລັດສົມບູນແລ້ວເດີພີ່ນ້ອງ...

ຂປລ.ຫຼາຍປີຜ່ານມາ ພໍເຂົ້າສູ່ລະດູຝົນ ຜູ້ໃຊ້ລົດໃຊ້ຖະໜົນຢູ່ເສັ້ນທາງ ລະຫວ່າງປາກຊັນ-ຊຽງຂວງ,ຊຽງຂວາງ-ປາກຊັນ ແມ່ນໄດ້ພົບຄວາມຫຍຸ້ງຍາກ ຢ່າງໜັກໜ່ວງສົມຄວນ ເພາະວ່າເສັ້ນທາງເປ່ເພ,ເປັນຕົມໝື່ນ,ໂດຍສະເພາະ ແຕ່ເຂດບ້ານຜາເມືອງ-ທ່າສີ ເມືອງບໍລິຄັນ ແຂວງບໍລິຄຳໄຊ ມາຮອດປັນຈຸບັນ ຫຼື ນັບແຕ່ທ້າຍປີ2017 ໂຄງການການປັບປຸງສ້ອມແປງ ແລະຍົກລະດັບເສັ້ນທາງຈຸດດັ່ງກ່າວ ໄດ້ສຳເລັດສົມບູນແລ້ວ ເຮັດໃຫ້ການສັນຈອນໄປມາສະດວກສະບາຍຍີ່ງຂື້ນ.

ໂຄງການປັບປຸງ ແລະ ຂະຫຍາຍເສັ້ນທາງ ເລກ 21 ແຕ່ບ້ານຜາເມືອງ-ເສັ້ນທາງ 1D ບ້ານທ່າສີ ມີຄວາມຍາວ 28,77 ກິໂລແມັດ,ມີມູນຄ່າທັງໝົດ 134 ຕື້ກວ່າກີບ, ໂດຍງົບປະມານຂອງລັດຖະບານ ແລະ ກອງທຶນບູລະນະຮັກສາທາງຫຼວງ ເຊີ່ງປະຕິບັດແຕ່ທ້າຍປີ 2015 ແລະ ສຳເລັດສົມບູນໃນຕົ້ນປີ 2018,ປະຊາຊົນ,ພໍ່ຄ້າຊາວຂາຍ ແລະ ຜູ້ມີຈຸດປະສົງ ນຳໃຊ້ເສັ້ນທາງສາຍນີ້ ໂດຍສະເພາະແຕ່ ປາກຊັນ - ຊຽງຂວາງ ຫຼື ວຽງຈັນ-ຊຽງຂວາງ ເພື່ອແລກປ່ຽນສິນຄ້າ ແລະ ຈຸດປະສົງອື່ນໆ. ແມ່ນສາມາດເດີ່ນທາງໄປມາດ້ວຍຄວາມສະດວກສະບາຍ ສະເພາະເປັນທາງເປັນທາງປູຢາງ ຕະຫຼອດເສັ້ນ ຈຸດໃດ,ໄລຍະໃດ ທີ່ມີເປັນພູສູງ ຫຼື ຫ້ວຍເລິກແມ່ນ ໄດ້ຮັບການຕັດ,ການເຈາະ ແລະ ຖົມໃຫ້ມີລະດັບມາດຕະຖານດີສົມຄວນ.

ເມື່ອມີການປຽບທຽບການເດີນທາງ ແຕ່ວຽງຈັນ-ຊຽງຂວາງ ຫຼື ຊຳເໜືອ,ເມື່ອກ່ອນແມ່ນມີການນຳໃຊ້ເສັ້ນທາງເລກທີ 13 ເໜືອໄປລ້ຽວຂວາຈຸດສາມແຍກພູຄູນ ໄປຮອດຊຽງຂວາງ ແມ່ນໃຊ້ເວລາປະມານ 9-10ຊົ່ວໂມງ, ແຕ່ປັນຈຸບັນ ຫຼາຍຄົນໄດ້ນຳໃຊ້ເສັ້ນທາງ 13 ໃຕ້ ໄປລ້ຽວຊ້າຍທີ່ປາກຊັນ ຜ່ານເສັ້ນທາງເລກ 21 ຕໍ່ໃສ່ເສັ້ນທາງ 1D ຮອດຊຽງຂວາງໃຊ້ເວລາ 6-7 ຊົ່ວໂມງ,ຖ້າຫາກມີຈຸດປະສົງ ຢາກໄປຮອດຊຳເໜືອ ກໍ່ໃຊ້ເວລາປະມານ 12 ຊົ່ວໂມງ(ໜື່ງມື້).

ການປັບປຸງບູລະນະເສັ້ນທາງສາຍນີ້ ກໍ່ແມ່ນຄວາມມຸ່ງຫວັງຂອງ ພັກ-ລັດຖະບານ ເພື່ອອຳນວຍຄວາມສະດວກແກ່ປະຊາຊົນບັນດາເຜົ່າ,ນັກທຸລະກິດ ແລະ ນັກທ່ອງທ່ຽວໃຫ້ໄກ້ໄປຮອດໄປເຖິງ ແລະ ສາມາດປະຕິບັດພາລະກິດ ໄດ້ຮັບຜົນສຳເລັດຕາມແຜນການ.ສີ່ງສຳຄັນແມ່ນອຳນວຍຄວາມສະດວກແກ່ປະຊາຊົນທີ່ດຳລົງຊີວິດລຽບຕາມເສັ້ນທາງ ໃຫ້ສາມາດປະກອບການຄ້າຂາຍ ແລະ ບໍລິການຫຼາຍຂື້ນ ຕີຖອຍຄວາມທຸກຍາກລົງເທື່ອລະກ້າວ.

Cr: Lao Update