ເວົ້າມົ້ວໆ!!ໄຣໂອລາບອກຜີແດງ-ມ້າລາຍຍັງບໍ່ບັນລຸເລື່ອງປັອກບາ

 

ມິໂນ ໄຣໂອລາ ນາຍໜ້າຄົນດັງຂອງ ພໍ ປັອກບາ ມິດຟິວຂອງ ຢູເວັນຕຸດ ລະບຸວ່າ ຕອນນີ້ ແມນຢູ ກັບ ມ້າລາຍ ຍັງບໍ່ໄດ້ບັນລຸຂໍ້ຕົກລົງຮ່ວມກັນໃນເລື່ອງການຍ້າຍທີມຂອງ ປັອກບາ ຫຼັງຈາກທີ່ກ່ອນໜ້ານີ້ລືກັນວ່າທັງສອງທີມຕົກລົງຄ່າຕົວກັນໄດ້ທີ່ 105 ລ້ານປອນ.

 

ມິໂນ ໄຣໂອລາ ນາຍໜ້າຂອງ ພໍ ປັອກບາ ກອງກາງຄົນດັງຂອງ ຢູເວັນຕຸດ ສະໂມສອນຍັກໃຫຍ່ຂອງ ກັນໂຊ ຊີີຣີ ອາ ກ່າວວ່າມັນຍັງບໍ່ມີການບັນລຸຂໍ້ຕົກລົງທີ່ຈະເຮັດໃຫ້ ປັອກບາ ຍ້າຍໄປຢູ່ກັບ ແມນເຊສເຕີ ຢູໄນເຕັດ ແຕ່ຢ່າງໃດ.

 

ປັອກບາ ຕົກເປັນຂ່າວກ່ຽວກັບການຍ້າຍທີມມາຕະຫຼອດເຊິ່ງ ແມນຢູ ເປັນທີມທີ່ມີຂ່າວຫຼາຍທີ່ສຸດໂດຍທີ່ມີ ເຣອັນ ມາດຣິດ ກັບ ເປເອັດເຊ ມາຮ່ວມວົງນຳ ແຕ່ຈົນຮອດຕອນນີ້ເຂົາກໍຍັງບໍ່ໄດ້ຍ້າຍທີມເທື່ອ.

 

ທັງນີ້ມີລາຍງານວ່າ ຢູເວັນຕຸດ ປະຕິເສດຂໍ້ສະເໜີ 85 ລ້ານປອນຈາກ ແມນຢູ ໄປແລ້ວຂະນະທີ່ ເລກິບ ສື່ຂອງເມືອງນ້ຳຫອມປ່ອຍຂ່າວວ່າທັງສອງທີມຕົກລົງເລື່ອງຄ່າໂຕໄດ້ທີ່ 105 ລ້ານປອນຖືວ່າສູງເປັນສະຖິຕິໂລກເລີຍ.

 

“ມັນບໍ່ໄດ້ມີການເຮັດຂໍ້ຕົກລົງໃດໆທັງນັ້ນກ່ຽວກັບ ພໍ ປັອກບາ ຫຼາຍຝ່າຍຄິດໄປເອງ” ໄຣໂອລາ ກ່າວຜ່ານທະວິດເຕີໂດຍ ເດິ ກາດຽນ ສື່ຊື່ດັງຂອງຜູ້ດີເຜີຍວ່ານາຍໜ້າຄົນດັງອາດຈະໄດ້ເງິນໄປ 18.4 ລ້ານປອນຖ້າວ່າການຍ້າຍທີມເກີດຂຶ້ນ.