ເວນເກີເລັງດຶງເລີມາເສີມທັບ

 

ໂທມັດ ເລີມາ ກອງກາງດາວລຸ້ງເລືອດນຳ້ຫອມຕົກເປັນເປົ້າໝາຍຂອງ ອາເຊນອນ ທີ່ວາງແຜນທຸ່ມເງິນໃຫ້ ໂມນາໂກ ພິຈາລະນາຫວັງໃຫ້ຍອມໃຈອ່ອນປ່ອຍຕົວນັກເຕະຊ່ວງຊຳເມີນີ້ຄາດວ່າຄ່າຫົວຈະຢູ່ທີ່ປະມານ 25 ລ້ານປອນ.

 

ອາເຊນອນ ຍັກໃຫຍ່ ພຣີເມຍລີກ ກຽມຍື່ນຂໍ້ສະເໜີຂໍດຶງຕົວ ໂທມັດ ເລີມາ ມິດຟິວດາວລຸ້ງຂອງ ອາແອສ ໂມນາໂກ ຈ່າຝູງ ລີກແອັງ ຝຣັ່ງເຂົ້າມາເສີມທັບໃນຊ່ວງຊຳເມີນີ້ ຈາກການລາຍງານຂອງ ເດິ ມິນເລີ ສື່ຜູ້ດີເມື່ອວັນທີ່ 11 ທີ່ຜ່ານມາ.

 

ອາແຊນ ເວນເກີ ນາຍໃຫຍ່ເລືອດນຳ້ຫອມທີ່ສໍ່ແວວວ່າກຽມຕໍ່ສັນຍາຄຸມທັບ “ປືນໃຫຍ່” ແທນຂອງເກົ່າທີ່ກຳລັງຈະໝົດລົງຫຼັງຈົບລະດູການນີ້ ວາງແຜນເຂົ້າຕະຫຼາດໜ້າຮ້ອນເພື່ອຄວາມເທບຂອງທີມ ໂດຍເຂົາມັກໃນຄວາມສາມາດຂອງ ເລີມາ ແລະ ໝັ້ນໃຈວ່າດາວເຕະອາຍຸ 21 ປີຈະເຂົ້າມາເຮັດໃຫ້ປະສິດທິພາບແດນກາງຂອງທີມດີຂຶ້ນຢ່າງແນ່ນອນ.

 

ເລີມາ ທີ່ຄາດວ່າມີຄ່າຫົວປະມານ 25 ລ້ານປອນໂຊຟອມໄດ້ຢ່າງໂດດເດັ່ນຕໍ່ເນື່ອງນັບຕັ້ງແຕ່ຍ້າຍມາຈາກ ກັອງ ເມື່ອປີ 2015 ຈົນຖືກເອີ້ນຕົວໄປຕິດທີມຊາດຝຣັ່ງລວມທັງຍັງເປັນສ່ວນສຳຄັນທີ່ຊ່ວຍໃຫ້ ໂມນາໂກ ຜ່ານເຂົ້າເຖິງຮອບຮອງຊະນະເລີດຂອງ ຢູຟາ ແຊມປຽນ ລີກ ລະດູການນີ້ອີກດ້ວຍ.